“Neftçi” Misli premyer-liqasının 17-ci turunda “Turan Tovuz”la heç-heçə edib - 1:1.

“Football-plus.az” xəbər verir ki, oyundan sonra qonaqların baş məşqçisi Samir Abasov mətbuat konfransında görüş haqda fikirlərini bildirib.

- Sağ olsunlar, azarkeşlər bu soyuqda uzun yol gəliblər. Gələ bilməyən azarkeşlər də sağ olsunlar. İlk hissə rahat idi. Oyunu idarə edirdik. İkinci hissədə Boqomolski və Ozobiçin yorğunluğu özünü göstərdi. Rəqibin oyununu bilirdik. Futbolçularım mübarizə apardı. 10-12 günlük istirahətə gedirik. Fikirləşirəm ki, buna ehtiyacımız var. Çox vaxtımız yoxdu.

- Ervin Koffini mərkəzdə oynatmağı əvvəlcədən planlaşdırmışdız?
- Məşqlərdə bunu çıxış yolu kimi sınadıq. Ozobiç artıq oyundan qopmağa başladı. Bunlar normal şeylərdi. Məşqlərdə bəzi elemetlərin üzərində dayandıq.

- Qoldan başqa Neftçi nin real qol vəziyyəti yoxdu. “Neftçi”nin əzəmətli futbol oynaması üçün nə çatmır?
- Şəxslərdən danışmayacam. Hər şey nəzarətimiz altındadı. Zaman lazımdı. Bizim üçün hələ ki, prioritet nəticədi. Digər komandalar dəhşət futbol oynayır, təkcə "Neftçi" oynamır demək düzgün deyil. Bizim üçün nəticə önəmli olsaydı, müdafiə olunardıq. Bəlkə də digər komandaların oyunlarına baxsaq, “Neftçi” oynamır. Təzəyik. Komandanı qururuq. Alınanlar da var, gec alınanlar da, alınmayanlarda...

- Çətin dönəmdə komandanın başına gəldiz. Qışdan sonra çətinliklərin arxada qalacağını düşünmək olar?
- Xeyr, geridə qalmayıb. Yaya qədər bu çətinliklər olacaq. Biz gələndə anlayırdıq ki, indiki durumda dəyişmək çətindi. Komanda uduzmaqdan qorxur. Qış fasiləsində futbolçular dincələcək. Özlərinin də analiz etməli olduğu şeylər var. İşimiz çoxdu.

- Qışda komandadan gedən olacaq?
- İndi bunu demək yersiz olar. Transferlərin üzərində işləyirik. Gücləndirməli olduğumuz mövqelər var. Amma qışda transfer etmək çətindi. Əlimizdə olan oyunçuları göndərsək, bunun əziyyətini çəkə bilərik.

- Dominant “Neftçi”ni nə zaman görəciyik?
- Martın 22-si (gülür). Nə deyim? Necə olsun?

- Kilan Lebonun performansının aşağı düşməsi nəylə bağlıdı?
- Bütün futbolçuların bizimlə Tovuza gəlməsini tapşırmışdım. Çünki çox vacib matç idi. Oynamamağı zədə səbəbindəndi. Tək Lebonu deməzdim, komanda şəklində yaxşı deyilik.

ƏSƏD SEYİDOV