Azərbaycan xalqı növbəti dəfə dünyaca məşhur bir futbolçunu qarşılamağın, onunla eyni şəhərdə yaşamağın, eyni havada nəfəs almağın xoşbəxtliyini yaşadı.

Messi və onunla birlikdə Luis Suares, Serxio Buskets, Xordi Alba Bakıya təşrif buyurdular. Düzdü, çoxları düşünür ki, bu məşhurların Azərbaycana gəlişi ölkəmizin dünyaya tanıdılması baxımından təbliğat üçün vacibdi. Amma mən Messinin “instaqram”dakı səhifəsinə göz atdım. Orda Bakıya səfərlə bağlı hansısa paylaşıma rast gəlmədim. Sanki onların Bakıya gəlməsindən dünya xəbər tutmasın deyə, səfərə gizlin çıxıblar. Bizim də sevincimiz yerə-göyə sığmır. Allah eləsin, dünya ulduzları Bakıdan qayıdandan sonra paytaxtımız haqda təəssüratlarını sosial şəbəkələrdə paylaşınlar. Dünya da bunu görsün, dostlar sevinsin, düşmənlərin bağrı çartlasın.

Ötən ay da belə “xoşbəxtlik” yaşamışdıq. FİFA prezidenti Canni İnfantinio və braziliyalı futbol veteranı Ronaldinyo Bakıya gəlmişdilər. Hər ikisi paytaxtımızın gözəlliklərindən ağızdolusu danışmaqla yanaşı, futbolumuzu tərifləmişdilər, inkişafda olduğumuzu demişdilər. Elə həmin günlərdə milli komandalarımız böyükdən kiçiyə məğlubiyyətləri sıralamağa başladılar. Sanki futbolun ədalət tanrısı bizi yuxudan oyandırmağa çalışdı. Üzümüzə tərs bir sillə vurdu ki, qəflət yuxusundan ayılın, hansı gününüzə feyziyab olmusuz? Amma bizi belə sillələr, yəni ki, belə məğlubiyyətlər qəflət yuxusundan ayıldan deyil. Şair demişkən, dindirir əsr bizi, dinməyiriz, atılan toplara diksinməyiriz...

Azərbaycan futbolu problemlər içində boğulur, amma biz Ronaldinyonun, Messinin gəlişindən feyziyab oluruq. Həmin o problemlər heç kimin vecinə deyil. Millimiz FİFA-nın reytinq cədvəlində xəritədə yeri belə bilinməyən ölkələrin arasında itib-batıb, ikinci yüzlüyün ortalarına doğru sürətlə “irəliləyirik”. Millətlər Liqasında isə həvəskarların arasına düşmüşük. Əlbəttə, bütün bunlar futbolun içində olan şeylərdi. Hamı uda bilməz ki. Amma məsələnin vacib bir tərəfi var ki, biz bütün bu “uğurları” milyonları havaya sovura-sovura əldə edirik. İllərdi əcnəbi mütəxəssislər Azərbaycanda kef-damaq içində yaşayır. Berti Foqts, Robert Prosineçki, Canni de Byazi, Fernando Santuş kimilər bizim neft və milyonlar səltənətində krallar kimi yaşayırlar. Qismətimiz isə böyükhesablı məğlubiyyətlər, ildən-ilə geriləməkdi.

Bu yaxınlarda belə bir xəbər çıxdı ki, AFFA Santuşla yolları ayırmağa hazırlaşır, portuqaliyalı təqaüdçünü İcraiyyə Komitəsinin iclasından sonra yola salacaqlar. Sevindik ki, futbolumuzun başbilənləri səhvlərini anlayıblar, zərərinin yarısından dönmək istəyirlər. Deyəsən, sevinməyə tələsmişik. Belə ki, Santuş 1-ci liqanın “Baku Sportinq” – “Difai” qarşılaşmasına canlı baxmaq üçün Buzovna qəsəbəsindəki stadiona yollanıbmış, dünən də püşkatma mərasimində iştirak etdi. 1-ci liqa qarşılaşmasını izləmək yaxşıdı. Amma biz yaxşı bilirik ki, ordakıların milli səviyyəsinə yüksəlməsi mümkünsüzdü.

Santuşun konkret kiməsə göz qoyması, milliyə futbolçu axtarması heç də inandırıcı deyil. Burda mistik bir məna var. Santuş demək istəyir ki, siz başınızı Messiylə qatın, mən də öz işimdəyəm, heç yerə getmək fikrim də yoxdu. Sizlə elə belə davranmaq lazımdı.

AMAL