“İlk növbədə qəzetinizə təşəkkürlərimi bildirmək istəyirəm ki, veteran futbolçuları həmişə işıqlandırırsız. Bu ən vacib məqamlardan biridi. Mən “Neftçi”nin təlim-məşq toplanışına ilk dəfə 1974-cü ildə qoşulmuşam. Tofiq həmin illərdə “Neftçi”nin əsas oyunçularından biri idi. Sağ yarımmüdafiəçi mövqeyində oynayırdı. Biz həmin futbolçuları televizorda və stadionlarda görmüşdük. Təlim-məşq toplanışına gələndən sonra Tofiq müəllim bizə müəyyən istiqamətlər verirdi. Təcrübəsindən istifadə edir, tövsiyələrini çatdırırıdı. 1976-cı ildə bizi təcrübə üçün “Avtomobilçi”yə göndərmişdilər. 1977-ci ildə “Neftçi” yüksək liqaya vəsiqə qazanandan sonra bizləri geri qaytardılar. “Ağ-qaralar”ın əsas heyətinə daxil etdilər. 1977, 1978-ci illərdə və 1979-cu ilin 1-ci yarısına kimi Tofiq müəllimlə birlikdə oyunlara hazırlaşırdıq. SSRİ çempionatının oyunlarında çiyin-çiyinə mübarizə aparırdıq. Tofiq, səhv etmirəmsə, Sumqayıt futbol məktəbinin yetirməsi olub. “Neftçi”nin heyətində 200-dən oyunda iştirak edib. 1978-ci ildə Bakıda Tiflis “Dinamo"suna çox gözəl qol vurmuşdu. Təəssüf ki, 1990-cı ildə ailəsi ilə birlikdə Moskvaya köçdü. 1990-cı illərin sonunda mən Moskvada olarkən dəfələrlə oyunlarda və ya asudə vaxtı görüşlərimiz olurdu, “Neftçi”dəki günlərimizi yada salırdıq. Qızı Türkiyədə yaşayırdı. Səhv etmirəmsə, sonradan oraya köçdü. Ürəyində problem olduğuna görə dünyasını dəyişdi. Həmin dövrün futbolçuları haqda az adamım məlumatı var. Tofiq müəllimlə çalışan məşqçilərdən məlumat aldım, mənə söylədilər ki, Türkiyədə dəfn olunacaq”.