"İlk növbədə onu deyim ki, Denis Marandiçi üçün çox üzüldüm. Ağır zədədi, Allah şəfa versin. Keyfiyyəti ilə seçilən futbolçudu. Hətta deyərdim ki, bəzən matçın nəticəsinə təsir edə biləcək səviyyədə çıxış edir. Belə keyfiyyətli oyunçuya Azərbaycanda bir çox komandaların ehtiyacı var. Nəticələrə gəlincə, bəli, ürəkaçan deyil. Amma Kurban Berdıyev təcrübəli mütəxəssisdi və əminəm ki, durumu düzəltmək üçün müəyyən planı mövcuddu. Komanda son iki mövsümdə heyətini qoruyub-saxlayıb. "Turan Tovuz" qış "transfer pəncərəsi" dönəmində bir neçə yeni futbolçu alacağı təqdirdə rahatlıqla yaxşı nəticələr qazana biləcək. Amma unutmayaq ki, qışda yaxşı futbolçu cəlb etmək elə də asan olmur. İndi tovuzlular mütləq ilk "üçlük" uğrunda mübarizə aparmalıdı. Düzdü, ilk baxışdan kubok avrokuboklara aparan ən qısa yol kimi görünür. Bu matçların da özünəməxsus özəlliyi var. Komandalar kubok görüşlərinə tam fərqli hazırlaşır. Bunları nəzərə alsaq, "Turan Tovuz"un işi kubokda mübarizəni davam etdirən komandalara nisbətən asandı. Özü də həmin kollektivlər tovuzluların birbaşa rəqibləridi. Qısası, çempionat oyunlarında başqaları sıx qrafikdə çıxış edəcəksə, "Turan Tovuz" rahatlıqla nəticə qazana biləcək".