"Bəzən komandalarda eniş yaşanır. Əslində bu normal haldı. Səbəblərdən biri rəqiblərin "Turan Tovuz"u daha yaxşı təhlil etməsi, bu komandaya qarşı oyunlara daha məsuliyyətli yanaşmasıdı. Belədə "bozqurd" həm fiziki, həm də psixoloji cəhətdən hazırlıqlı olmalıdı. Təbii ki, bu məqamlarda yaranan boşluqlar nəticəyə təsir edir. Kurban Berdıyevin istefasıyla bağlı xəbərlərə isə inanmıram. Baş məşqçinin işi göz qabağındadı. Komanda ümumi planda xeyli inkişaf edib. Mənə elə gəlir ki, mütəxəssisin istefası haqda hansısa müzakirə aparılmır. Sadəcə, bəzi mətbuat orqanları xal itkisi olanda belə mövzuları gündəmə gətirir, dezinformasiya yayır. Belə məsələləri ciddiyə almaq lazım deyil. Futbolçuların səhvlərinə gəlincə, yanlış addımlar qaçılmazdı. Futbol belə hadisələr əsasında qurulub. Bəzən gərginlik oyunçunu səhv etməyə məcbur edir. Təbii haldı. Məncə "Turan Tovuz" mövsümü ilk "dördlük"də başa vuracaq. Komanda avrokuboklar üçün ən iddialı namizədlərdən biridi. Amma bir şərtlə: kollektiv gücləndirilməlidi. Oyunlar geridə qaldıqca zədəlilər və cəzalılar olur. Ehtiyat qüvvə lazımdı. Klub qış fasiləsində 2-3 oyunçu transfer etməklə ümumi performansını qorumalıdı".