Kassano Kriştiano Ronaldonun qəzəbinə tuş gəldi
“Roma” ilə “Real”ın sabiq hücumçusu Antonio Kassano bugünlərdə maraqlı açıqlama verib.
Antonionun dediyinə görə, Kriştiano Ronaldo ona qəzəbli səsli mesaj, qazandığı titulların və vurduğu qolların siyahısını göndərib. Portuqaliyalı İtaliya futbolunun ulduzlarından birinə yaxınlarda dediyi sözlərə görə məhz belə cavab verməyi lazım bilib.
Hər şey nədən başlayıb?
Kassano sentyabrın sonunda deyib ki, Ronaldo futbolu necə oynamalı olduğunu bilmir, onun yeganə hədəfi həmişə qol vurmaqdı. “Viva El Futbol” podkastının qonağı olan Kassanonun fikirləri:
“İquayn, Aquero, Benzema, Levandovski, İbrahimoviç ə Suares komanda ilə qarşılıqlı əlaqəni necə təmin etməyi bilirdilər. Onlar yeganə hədəfi çox qol vurmaq olan Ronaldodan fərqli daha çox şey bacarırdılar”.
Kriştianonun bacısı Elma Aveyro dərhal onun müdafiəsinə qalxıb:
“Bu bədbəxti tanımıram, onunla işim yoxdu. Ancaq sizə bir söz demək istəyirəm: Ronaldo futbol oynamağı bacarmırsa və bununla yanaşı 900 qol vurursa, onda təsəvvür edin ki, oynamağı bacarsaydı, nə olardı... Deyirlər ki, Kassano futbolçu olub. Düşünürəm ki, adamlar səhv edir – o, bolboy olub”.
Bugünlərdə BSMT podkastının qonağı olan 42 yaşlı italiyalı yaxınlarda tanımadığı nömrədən qəzəbli səsli mesaj, eləcə də titulların və qolların siyahısını aldığını bildirib:
“Kriştianonun mənim üçün ən yaxşı futbolçuların “10-luğ”una daxil olmadığını bildirəndən sonra İspaniya telefon kodu ilə, yəni +34 ilə olan nömrədən mesaj aldım. Bu o idi, qazandığı bütün titulları sadalayıb. Ronaldo həmçinin səsli mesajda mənim ona hörmətsizlik göstərdiyimi bildirib”.
Antonionun dediyinə görə, portuqaliyalı onun cəmi 150 qol vurmasını və dörd titul qazanmasını da başına qaxınc edib. Bəs Kassano portuqaliyalıya necə cavab verib? “Mən ona belə cavab verdim:
“Əziz Kriştiano Ronaldo, mənə qulaq as. Sən problemin nədən ibarət olduğunu bilirsən. Bir futbolçu kimi səni bəyənmirəm”.
Kassano çoxdan Kriştianonu qıcıqlandırır
Etiraf edək ki, Antonio Lionel Messinin böyük fanatı kimi tanınır. Hələ bir dəfə də deyib ki, “mənim üçün yalnız bir Ronaldo var” (braziliyalıya işarə ilə). Argentinalı karyerasındakı 7-ci “Qızıl top”u alandan sonra isə Kassano vurğulayıb ki, Kriştiano hətta futbol tarixinin ən yaxşı 5 oyunçusu sırasına daxil deyil. Antonionun yeni fikirləri:
“Bugünlərdə Ronaldodan gələn mesajı gördüm. Mənə deyir ki, qollarına, titullarına, karyerasına hörmət etməliyəm. Buffona zəng etdim, öyrənmək istədim ki, Kriştiano mənim nömrəmi kimdən alıb”.
Ronaldonun tənqidə dözümü yoxdu
Kriştiano karyerası boyunca onun haqqında deyilənləri və yazılanları dəfələrlə süngü ilə qarşıayıb. Məsələn, “Yuventus”da çıxış edərkən məşhur “Transfermarkt” portalının müəyyənləşdirdiyi qiymət portuqaliyalının xoşuna gəlməmişdi. Onda adı çəkilən portal sosial şəbəkədə Jorje Mendeşin agenti olduğu futbolçuların rəmzi yığmasını hazırlamışdı. Və Ronaldodan başqa bütün futbolçular xəbərə taq edilmişdi. Kriştiano cavabında həmin saytın səhifəsini blokladı.
Bu ilin sentyabrında Rio Ferdinandın podkastının qonağı olan “Əl-Nəssr”in hücumçusu televiziyada onu tənqid edən ekspertləri ittiham etdi:
“Adamlar həmişə səndə yaxşını yox, pisi görür. Ancaq iki siçovulun tənqidlərinə görə karyeramı bitirmək fikrində deyiləm. Dünya məni sevir, azarkeşlər məni sevir. Futbol oynamağa davam etməyim üçün əsas motivasiya budu. Heç kimin tanımadağı iki adam daim televiziyada məni tənqid etdiyinə görə parlaqlığımı əldən verən deyiləm”.
Digər xəbərlər
