Rəşad Sadıqov: "O sualın Qurban Qurbanova da ünvanlanması mənə qəribə gəldi”
Misli premyer-liqasının 10-cu turunda “Zirə” "doğma divarlar" arasında “Sabah”ı qəbul etdi - 1:1.
"Football-plus.az" xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavabladı.
- Hər iki komanda üçün ağır oyun oldu. Gözlənilən də bu idi. Hər iki tərəf qələbə qazanmağa çalışırdı. Oyunun əvvəlində gözlənilməz oldu ki, bəzi oyunçular passiv başladılar. Rəqibə üstünlük verdik, qol vurdular. Ancaq sonrakı 65-70 dəqiqə bizim nəzarətimizdə keçdi. Bunu qola çevirə bilmirdik. 100 faizlik qol imkanları yarada bilmirdik. “Sabah” çox yaxşı, usta komandadı. Bunu hiss edirdik. İkinci hissədə daha böyük qüvvə ilə irəli atıldıq. Yalnız sonlarda qol vurduq. Belə gedən oyunda bir xal da qazanc oldu. “Sabah” kimi komandanı üç xal önümüzə buraxmadıq. Psixoloji cəhətdən də uduzmamaq önəmli idi. Ədalətli nəticə oldu.
- Meydana ehtiyatdan çıxan oyunçular matçın taleyini həll etdi. Ehtiyat qüvvə yetərincədimi?
- Zədəlilərin sıraya dönməsi, oyuna bütün heyətlə hazırlaşmağımız yaxşıdı. Ehtiyat qüvvəmiz daha yaxşı idi, rəqibdə itkilər var idi. İkinci hissədə hücumameyilli oyunçuları meydana saldıq. O hücumu qurmaq çətin idi, amma futbolçular ustalıqla davrandılar. Bu gün rəqibdən daha geniş heyətimiz var idi. Bu, həlledici oyun idi.
- Rafael Utziqin oyunundan razı qaldız?
- Apardığı mübarizədən, fədakarlığından razı qaldım. Rəqiblər də bilir ki, o, bizim əsas qol silahımızdı. Ona xüsusi diqqət var. Çox istəkli idi. Rəqib müdafiəsini gərginlikdə saxlayırdı. Hesab oyuna görə oldu.
- Papunaşvili bərabərlik qolunu vurdu. Tam formadadı? Onu yaxın gələcəkdə əsas heyətin üzvü kimi görə biləcəyik?
- Oyundan əvvəl planımız o idi ki, 60-cı dəqiqədə meydana daxil olacaq. Amma elə alınmadı. Ehtiyat edirik. Zədəyə görə 4 ay oynamayıb. Amma çox istəklə işləyir. Bəzən ehtiyat edirəm ki, addım-addım gedək və uzunmüddətli zədə almasın. Çıxışından razıyam. Məşqlərdə də özünü yaxşı göstərir. Yaxşı da qol vurdu. Ondan razıyam.
- Son günlər milli məsələsi çox müzakirə olunur. İlqar Qurbanov bildirib ki, milliyə tapşırıqlar oyunçu dəvət olunurdu. Yığmanın sabiq kapitanı olaraq buna münasibətiniz?
- Son günlər mən də mediadan izləyirəm. Bu sual bütün məşqçilərə verilib. Elə mövzudu ki, bu sualı bir cavabla cavablandırmaq asan deyil. Qurban Qurbanova da sual veriblər. Mən buna təəssüfləndim. Son illərdə ən uğurlu, ən ədalətli milli periodu o idi. Ona da sualın ünvanlanması mənə qəribə gəldi. İlqar Qurbanovdan iddianın detallarına varmaqdan ötrü, ona əlavə olaraq suallar vermək lazımdı. Ehtimal edirəm, hansı məqamları gözünün qabağında canlandırıb bu fikri səsləndirib. Bu fikirdən bütün məşqçilərə o sualı ünvanlandırmaq düzgün deyil. Periodik olaraq milliyə dəvət olunanlar birmənalı qarşılanmırdı. İnanmıram ki, sırf sifariş, zəng olsun ki, filan oyunçunu oynat. Bəzi məşqçilər təzyiq altında istəmədiyi qərarlarda qalır. Suallar çox olub. Elə mövzudu ki, gərək 1-2 saat analiz edəsən, 2010-da kim dəvət edildi, hansı məşqçinin dövründə kim dəvət olundu. Kim milliləşdirildi, sonra lazım olmadı? Daha geniş yanaşılsa, daha düzgün olar. Bu qədər.
RÖYANƏ OĞUZ
Digər xəbərlər
