“Bizim üçün kubok və ya çempionat oyununun fərqi yoxdu. Hətta çempionat mənim üçün daha önəmlidi, çünki birinci liqada qalmaq üçün mübarizə aparacağıq. Sadəcə, bizim kimi komandalar zamanla o gücü götürür. Son turlarda hiss olunurdu ki, qələbə yaxındadı. Həm də klubun mərhum rəhbəri Rəhman Əliyevin ən böyük arzusu komandasının elita təmsilçisi ilə qarşılaşması olub. Ötən il bizə qismət olmadı, bu il şansımızdan bizə uyğun komanda düşdü, bilirdik bu rəqibi keçsək, şans qazanarıq. Rəhmanın xatirəsinə görə futbolçular döyüşdü, mübarizə apardı. “Lerik”lə çempionat oyununda hesab açılmamışdı. Amma hiss etmişdim ki, bu dəfə qələbə qazana, kubokda mərhələ keçə bilərik. Stadion yağışdan pis vəziyyətə düşməsəydi, bəlkə də fərq daha böyük olardı. Mənim üçün kubokda "Kəpəz"lə qarşılaşma, sadəcə, formal xarakter daşıyır. Yəni reallığı danışsaq, hər şey ortadadı. Bu gün elita klubu ilə 1-ci liqa arasında uçurum varsa, elita ilə 2-ci liqa arasında uçurumdan da böyük şey var. Əlavə bir şey gözləmirəm. Düzdü, komandaya bunu demirəm, amma reallığı qəbul edirəm. "Kəpəz"lə aramızda hər cəhətdən müqayisəyəgəlməz səviyyə fərqi var. Mənim üçün ən önəmlisi rəhmətlik Rəhmanın ruhuna görə o şansı yaxalamaq, yəni elita klubu ilə qarşılaşmaq idi. Digər önəmli məqam isə komandaya özünəinamın gəlməsiydii. Çünki liqada vəziyyətimiz pisdi, bizə qələbə lazım idi. Ümid edirəm ki, bu nəticə motivasiya baxımından çempionat oyunlarımıza müsbət təsir edər”.