Millətlər Liqası
qrup mərhələsi, 4-cü tur
C liqası, 1-ci qrup
Azərbaycan - Slovakiya 1:3 (1:1)
1. Mehdi Cənnətov
5. Anton Krivotsyuk
(8. Emin Mahmudov, 46)
15. Bədavi Hüseynov (k)
13. Rahil Məmmədov
21. Qismət Alıyev
(22. Abbas Hüseynov, 83)
3. Elvin Cəfərquliyev
18. Ceyhun Nuriyev
(16. Vadim Abdullayev, 88)
20. Aleksey İsayev
(9. Renat Dadaşov, 76)
11. Ramil Şeydayev
(14. Rüstəm Əhmədzadə, 76)
10. Mahir Emreli
17. Toral Bayramov
Ehtiyat oyunçular
23. Rza Cəfərov
12. Aydın Bayramov
2. Şəhriyar Əliyev
4. Zamiq Əliyev
6. Ozancan Kökçü
7. Coşqun Diniyev
19. Xəyal Nəcəfov
Baş məşqçi: Fernando Santuş

1. Marek Rodak
16. David Hantsko
14. Milan Şkrinyar (k)
5. Lübomir Şatka
2. Petar Pekarik
(4. Miçel Tomik, 90)
10. Laslo Beneş
22. Stanislav Lobotka
(13. Patrik Hroşovski, 83)
8. Andrey Duda
(19. Tomaş Riqo, 90)
17. Lukaş Haraslin
(20. David Dyuriş, 83)
15. David Strelets
(11. Lübomir Tupta, 83)
7. Tomas Suslov
Ehtiyat oyunçular
12. Dominik Takats
23. Henrix Ravas
9. Robert Bojenik
3. Samuel Kozlovski
18. Leo Sauer
21. Kristian Herk
6. Norbert Dyomber
Baş məşqçi: Françesko Kaltsona

Qollar: R.Məmmədov, 15-öz qapısına (0:1). T.Bayramov, 38 (1:1). L.Haraslin, 75 (1:2). D.Dyuriş, 86 (1:3).
Vərəqələr: M.Emreli, 45. Q.Alıyev, 61 - sarı. M.Emreli, 70 - qırmızı (ikinci sarı).
Hakimlər: ROHİT SAQQİ, Morten Yensen, Anders Olav Dale, Siqurd Krinqstad (hamısı Norveç).
VAR hakimi: Yoçem Kamfuis (Niderland).
VAR hakiminin köməkçisi: Tom Harald Hagen (Norveç).
Hakim-inspektor: Vadim Direktorenko (Latviya).
UEFA nümayəndəsi: Edlira Yaupay (Albaniya).
14 oktyabr. Bakı. Tofiq Bəhramov adına Respublika stadionu. 4269 tamaşaçı.
Birinci hissəyə 2, ikinci hissəyə 4 dəqiqə əlavə olunub.

9 (2) qapıya ("çərçivə"yə) zərbə 7 (3)
5 künc zərbəsi 6
1 ofsayd 0
17 qayda pozuntusu 10
3 (1) sarı (qırmızı) vərəqə 0 (0)
43 topa sahibolma (faizlə) 57

90 dəqiqəni tarixi kateqoriyalara bölsək, onda biz dünənki oyunda yaşananları iki hissəyə ayırmalıyıq: Mahirin qırmızı vərəqəsinə qədər və ondan sonra. Bəli, qonaqlar ilk dəqiqələrdən təzyiq göstərməyə başladı, hətta 15-ci dəqiqədə bəsit bir avtoqolla hesabda geri düşdük. Ancaq ya qonaqların “az qan” ilə qalib gəlmək istəyi özünü göstərdi, ya da futbolçularımız qaradan artıq rəng olmadığını anlayaraq, hissənin sonuna qədər xoşbəxtliyi rəqib qapısı önündə axtardı. Odu ki, 38-ci dəqiqədə gələn bərabərlik qolu hadisələrin məntiqi axarına uyğun idi. Bədavi pressinq nəticəsində topu ələ keçirdi, Ramil isə cərimə meydançasına elə ötürmə verdi ki, Toral qol vurmasaydı, günah olardı. Buna qədər Rodak Mahirlə elə həmin Toralın zərbələrini ustalıqla dəf etmişdi. Slovaklar hissənin sonuna qədər özünə gələ bilmədi.

Fernando Santuş 2-ci hissədə Krivotsyukun əvəzinə son bir ayın ən populyar futbolçusu Emini meydana buraxmaqla nəinki heç-heçə, hətta qələbə istəyini ortaya qoydu. İnsafən, bu gediş az qala özünü doğruldacaqdı. Hissə başlayan kimi məhz Mahmudov gözəl kombinasiyanı qapıya zərbə ilə bitirdi, ancaq rəqibin oyunçusu topu qapı xəttindən çıxardı. Bundan sonra uzun müddət qapıya zərbələrin şahidi ola bilmədik. Ona görə ki, komandaların müdafiə xətti rəqibin son nöqtəni qoymasına qarşı çıxır, həlledici məqamlarda lazımi müdaxilələri edirdi. 58-ci dəqiqədə Toral qola yaxın olsa da, qeyri-dəqiq oynadı. Onun başla zərbəsi tirin üstündən keçdi. Ardından Strelets hesabı dəyişmək imkanını əldən verdi. Meydanda gah bizimkilər, gah da qonaqlar təşəbbüsü ələ alırdı, hələ ki məğlubiyyətdən xəbər verən nəsə yox idi. Və belə bir həlledici məqamda Mahir Emreli “səhnəyə çıxdı”, qeyd-şərtsiz komandamızın qəbirqazanı rolunu oynadı.

İlk yarıda Lobotkaya qarşı kobud oyundan sonra hakimin şifahi xəbərdarlığına etiraz edən və buna görə “sarı” ilə cəzalanan Mahir bu dəfə elə bir ciddi ehtiyac olmadan Haraslinə yerə sərdi. Nəticə: Emreli meydandan qovuldu, həmin Haraslin isə cəmi 5 dəqiqə sonra qapımıza yol tapdı. Onun zərbəsi zamanı Mehdi hara baxırdı, nə düşünürdü – bunu da bilmədik. Azlıqda qalan yığmamızın qalan vaxt ərzində məğlubiyyətdən qurtulacağını düşünmək sadəlövhlük olardı. Santuş Rüstəmlə Renatı meydana buraxmaqla hücum xəttini canlandırmaq niyyəti güdsə də, bu, mümkün olmadı. Əksinə, rəqib sona az qalmış 3-cü qolu da vurdu.

Tupta topu cərimə meydançasına göndərdi, burda isə yenicə meydana çıxan Dyuriş Bədavi ilə Mehdini qabaqladı. Beləliklə, yığmamız ardıcıl 4-cü oyunda iki top fərqi ilə uduzdu. Mahir məsuliyyətsizcəsinə “qırmızı” almasaydı, bəlkə də biz indi oxucularla xoş nəticənin təəssüratını bölüşərdik. Amma bu dəfə də olmadı. Ah, Mahir, Mahir... Adam heç bilmir nə desin...

Gözdən qaçmadı
* Slovakiyalı azarkeşkər oyunun başlamasına təxminən 1 saat qalmış stadionun ətrafında nəğmələr oxuyurdu.
* “Milli Hooligans” və “Göyqurdlar” tribunada yerini almışdı. “Göyqurdlar” millini yanına səsləyərək, motivasiyaedici şüarlar səsləndirdi.
* Slovakiya hesabı açarkən qonaq azarkeşlər nalayiq jestlər etdi.
* Kevin Medina və Şahruddin Məhəmmədəliyev, eləcə də Mesut Özil oyunu izləyənlər arasındaydı.
* “Göyqurdlar” oyundan sonra futbolçuları yanlarına çağırdı.

KƏNAN BAHADIR