"Qarabağ" Misli premyer-liqasının 7-ci turunda evdə "Neftçi"ni 4:0 hesabı ilə məğlub edib.

"Football-plus.az" xəbər verir ki, "Qarabağ"ın baş məşqçisi Qurban Qurbanov oyundan sonra keçirilən mətbuat konfransında fikirlərini bildirib:

O, jurnalistlərin suallarını cavablandırıb:

- Qarşıda "Tottenhem"lə matç var. Bu oyunda o görüş üçün nəyisə sınaqdan keçirdiz?
- Fikrimiz var idi. Bəzi elementlərlə bağlı idi. Amma çox az alındı. Bu da oyunun gedişatına görə idi. Oyunun sonlarına yaxın daha çox alınmağa başladı.

- Ötən mövsüm "Qarabağ" daha həvəsli görünürdü, bu mövsüm eyni tempdə gedirsiz. Bu motivasiya ilə "Tottenhem"ə qarşı yaxşı çıxış etmək mümkün olacaq?
- Oyundan əvvəl motivasiya veriləcək. Amma bu və oradakı oyunun tempi eyni olmayacaq. Rəqib məcbur edir ki, daha sürətli oynayaq. Bu və o oyunları yan-yana qoymaq olmaz. Əfsuslar olsun ki, tez-tez ritm dəyişir. Ən vacib elementlərdən biri, rəqibin tempinə hazır olaq.

- Ağdamda yeni "İmarət" stadionunun təməli atıldı. Bununla bağlı fikriniz necədir? 
- Maraqlandım. Şəkillərə də baxdım. Layihədən əvvəlcədən də xəbərim var idi. Deyəsən, əvvəlcə daha böyük tutumlu nəzərdə tutulmuşdu. Sırf futbol stadionudu. Azarkeşlər meydançaya tam yaxındı. Tutum az görünə bilər, amma rayon bölgəsi üçün öz çempionatımızda problem olmayacaq. Avroliqa oyunları üçün böyük olsaydı, yaxşı idi. Amma bununla başlamaq da pis deyil. Sevindim buna. Özü də, 2028-ci ilin axırlarına tamamlamaq istəyirlər. Aktiv iş rejimi olacaq.

- Bu gün beşinci qola vaxt çatmadı?
- "Neftçi"yə uğurlar arzulayıram. "Neftçi" rəqibimiz olsa da, özüm bu komandanın azarkeşi olmuşam. Orada oynamışam, baş məşqçi olmuşam. Bu nəticələr heç birimiz üçün xoş deyil. Səbirli olmaq lazımdı. Futboldu, hamımızın işində belə nəticələr ola bilər. Qaranti deyil ki, "Qarabağ" çempion olacaq. Heç bir komanda üçün belə uğursuzluq istəmərəm. Hər biri öz komandalarımızdı. Avrokuboklarda hamımız bir oluruq. Məncə, səbirlə, gözləmək lazımdı. Belə hallar olanda deyirəm ki, demək xeyir var. "Neftçi" böyük tarixə malik klubdu. Əvvəl-axır, sonda yenə öz əvvəlki nəticələrini geri qaytaracaq.

- Qara Qarayev "Neftçi"dən ayrıldıqdan sonra azarkeşlər istəyir ki, karyerasını "Qarabağ"da bitirsin. Onun geri qayıtması realdı?
- Bu gün komandada belə fikir yoxdu. Amma Qaranın indi çempionatda iştirak etməməsi məni üzür. Təcrübəli futbolçudu, ağıllı insandı. Ən doğrusunu düşünəcək. Bizim komanda olaraq, planımızda belə şey yoxdu.

- Onunla təmasınız olub? Əvvəl millidən indi isə "Neftçi"dən uzaqlaşdırıldı. Bu məsələlər haqda onunla danışmısız?
- "Qarabağ"da olanda da millidə oynamırdı. Söhbətimiz olurdu. Belə hallarla bağlı çox dərinliklərə getmirəm. Futbolçunun yaşı elədi ki, təcrübəlidi, işin içindədi, daha düzgün görür. Bütün futbolçulara tövsiyyəm o olub ki, darıxmayın, səbir edin. Baş məşqçi rəhbərdi. İntizamını qoruyub-saxlasın, məşqlərdə ən yaxşılardan olmağa çalışsın. Get-gedə çox futbolçuda belə hallar olub. Qara güclü xarakterə malik biridi. Oynamadığı halda da, məşqlərdə ən yaxşılardan olub. Konkret nəsə deməyim, olmayıb. Bir onu bilirəm ki, Qara özünü həmişə günahlandırıb. Burada oynamayanda da, heç vaxt məşqçinin üzərinə atmayıb. Peşəkarlıq onda var. Kiminsə dalınca danışdığını görməmişəm. İnanmıram ki, desin oynatmadılar.

- "Tottenhem"i izləmək üçün Londona getmişdiz?
- Xeyr, getməmişdik. Heç kimi göndərməmişdik.