Konfrans Liqasındakı təmsilçilərimiz bu gün keçirəcəkləri cavab oyunlarıyla pley-off mərhələsinə adlayıb-adlamayacaqlarına aydınlıq gətirəcək.

İki oyunun eyni gündə olmasına gəlincə, "Sabah"ın oyununu İTV, "Zirə"nin matçını isə "CBC Sport" yayınlayacaq. Əlbəttə, qarşılaşmaları tribunadan izləmək daha əlverişli olar. Nəzərə alaq ki, komandalarımıza məhz qələbə kömək edə bilər. Belədə azarkeş dəstəyi maksimum səviyyədə olmalıdı!

Konfrans Liqası
3-cü təsnifat mərhələsi, cavab oyunları
Sabah - Sent Patriks (İrlandiya) 0:1
Zaxari Elbuzedi, 49.
Qırmızı vərəqə: Sofiyan Çakla, 27.
Hakimlər: MARSEL BİRSAN, Radu Qinqulyas, Adrian Vorniku, Andrey Antoni (hamısı İrlandiya).
15 avqust. Bakı. "Bank Respublika Arena". Saat 20.00.
İlk oyun - 0:1.

"Sabah" səfərdəki oyunu ilə hər kəsi çaşdırdı. Cütün favoriti sayılan "bayquşlar" elə oyunla yadda qaldı ki, nə hakimi qınaya bildik, nə də rəqibi. Hətta "Sent Patriks" stadionu Masazır təmsilçisinə dar etdi desək, yanılmarıq. Komandanın hər iki hissədə zəif təsir bağışlaması azmış kimi, əsas oyunçularından İvan Lepinitsanın "qırmızı" alması durumu daha da çətinləşdirdi.

Təəssüf ki, "Sabah"ın həlledici oyun üçün şansını azaldan məqamlar bununla bitmir. "Makkabi"ylə matçlarda çox güc sərf edən komanda premyer-liqaya da uğursuz start verib. "Doğma divarlar" arasında "Şamaxı"yla bacarmayan "tələbələr" srağagün də paytaxt derbisində "Zirə"yə uduzdu. Yenə evdə... Bəli, görünür, "Bank Respublika Arena” bu mövsüm "bayquşlar"a düşərli deyil. Belədə komanda müəyyən məsələləri öz xeyrinə dəyişməlidi. Təbii ki, ilk iş "Sent Patriks"i mübarizədən kənarlaşdırmaqla pley-offa vəsiqə qazanmaqdı. Bu, həm "Sabah"ın özünəinamını bərpa edər, həm də "ev tilsimi"ni qırar. Lepinitsanın yoxluğunu isə yeni transfer İqor Noqeyra sayəsində "sığortalamaq" mümkündü.

Rəqibə gəlincə, qonaqlar çətin sınaqla üz-üzə olduğunu dərk edir. Sözsüz, matça çox ciddi hazırlaşacaqlar.

Yenə də "bayquşlar"ın mərhələ adlamaq şansını yüksək qiymətləndirmək mümkündü. Masazır təmsilçisi “doğma divarlar” amilindən və potensialından tam yararlanıb azarkeşlərini xoşbəxt sonluqla sevindirməlidi.

Zirə - Osiyek (Xorvatiya) 2:2 (pen: 2:1)
Qismət Alıyev, 54-p. Davit Volkov, 90 - Vedran Yuqoviç, 37. Anton Matkoviç, 81.
Hakimlər: YULİAN VAYNBERGER, Maksimilian Kolbitş, Andreas Vitşniqq, Ştefan Ebner (hamısı Avstriya).
15 avqust. Bakı. "Liv Bona Dea Arena". Saat 20.30.
İlk oyun - 1:1.

Bu komandalar arasında keçirilən ilk oyundan əvvəl ciddi fikir ayrılıqları var idi. "Zirə"nin səfərdən heç-heçə və ya qələbəylə qayıdacağını deyənlərlə məğlub olacağını düşünənlər arasında qızğın müzakirə gedirdi. Nəticə komandaların növbəti mərhələ şanslarını bərabər qiymətləndirməyə sövq etsə də, belə deyil. Daha doğrusu, "qartallar" son vaxtlar qazandığı uğurlarla əlini masaya möhkəm çırpır. Düzdü, Rəşad Sadıqovun yetirmələri "Opus Arena"dan məğlub qayıtmağa daha yaxın idi. Utziqin son dəqiqədə qazandığı penaltini qola çevirməsi hadisələrin axarını dəyişdi. Belədə "Osiyek"in oyunu "Zirə"dən üstün keçirməsi kölgədə qaldı. Lakin cavab görüşü Bakıdadı və rəqib bu dəfə evindəki qədər rahat olmayacaq. Azarkeş dəstəyinə arxalanan "qartallar" mərhələni keçə bilmək üçün əlindən gələni edəcək. Onsuz da ilk oyunda qeydə alınan "sülh" və premyer-liqanın 2-ci turunda "Sabah"ın meydanında qazanılan 3 xal komanda üçün böyük motivasiyadı. Geriyə fürsətlərdən yararlanıb məqsədə çatmaq qalır ki, Rəşad Sadıqov və komandası bunu bacaracaq gücdədi.

İndi "Sabah" futbolumuzun sabahı, "Zirə" isə zirvədə olmaq iddiasını qorumaq üçün mübarizə aparmalıdı. Axı komandalar mərhələ adlasa, tarixində ilk dəfə avrokubokların pley-offuna vəsiqə qazanacaq.

KƏNAN BAHADIR