Sabah (Bakı) – Zirə (Bakı) 0:2 (0:0)
1. Yusif İmanov – 5,0
10. Namik Ələskərov – 5,0
(9. Anatoli Nuriyev, 81) – qiymətsiz
4. Elvin Camalov (k) – 5,5
(77. Şakir Seyidov, 81) – qiymətsiz
2. Amin Seydiyev – 5,0
88. Xəyal Əliyev – 5,0
(20. Coy-Lens Mikels, 56) – 5,0
7. Boyan Letiç – 4,5
44. Sofian Çakla – 4,5
18. Pavol Safranko – 5,0
(33. Camal Cəfərov, 81) – qiymətsiz
70. Cesse Sekidika – 4,5
(17. Tellur Mütəllimov, 73) – 4,5
3. Con İrasabal – 4,5
13. İvan Lepinitsa – 5,0
Ehtiyat oyunçular
55. Nicat Mehbalıyev
94. Rəvan Mirzəmmədov
5. Rəhman Daşdəmirov
21. İldar Alekperov
22. Abdulla Rzayev
Baş məşqçi: Krunoslav Renduliç
Komandanın ən yaxşısı: Elvin Camalov

13. Aydın Bayramov – 5,0
7. Məqsəd İsayev – 5,0
21. Hacıağa Hacılı – 5,0
16. Fuad Bayramov – 5,0
11. Rüstəm Əhmədzadə - 5,0
5. Stefan Aka – 5,0
23. Rafael Utziq – 5,5
(32. Qismət Alıyev, 61) – 4,5
3. Ange Mutsinzi – 4,5
(4. Ruan Renato, 46) – 4,5
15. Pyer Zebli – 5,0
(8. İsmayıl İbrahimli, 68) – 4,5
6. Eldar Quliyev – 5,5
(29. Ceyhun Nuriyev, 68) – 5,0
19. Salifu Suma – 6,0
(90. Davit Volkov, 77) – 4,5
Ehtiyat oyunçular:
41. Anar Nəzirov
99. Səlim Həşimov
14. Elçin Əlicanov
70. İssa Cibrila
18. Martins Junior
Baş məşqçi: Rəşad Sadıqov
Komandanın ən yaxşısı: Salifu Suma

Qollar: R.Utziq, 50-p. (0:1). S.Suma, 52 (0:2, E.Quliyev).
Vərəqələr: İ.Lepinitsa, 13 (qeyri-idman hərəkəti). R.Utziq, 40 (qeyri-idman hərəkəti). R.Əhmədzadə, 53 (qeyri-idman hərəkəti). S.Aka, 79 (oyunun bərpasının ləngidilməsi) – sarı.
Hakimlər: ƏLİYAR AĞAYEV, Zeynal Zeynalov, Akif Əmirəli, Əli Əliyev (hamısı Bakı).
VAR hakimi: İnqilab Məmmədov (Bakı).
VAR hakiminin köməkçisi: Eyyub İbrahimov (Bakı).
Hakim-inspektor: Rəhim Həsənov (Bakı).
AFFA nümayəndəsi: Elçin Məmmədov (Bakı).
11 avqust. Bakı. “Bank Respublika Arena”. 1350 tamaşaçı (9000 yerlik).
Birinci hissəyə 1, ikinci hissəyə 4 dəqiqə əlavə olunub.
Oyunun qiyməti: 6,0.

Konfrans Liqasında mübarizə aparan, eyni zamanda yeni mövsümün ən iddialılarından sayılan bu iki komandanın dueli maraqla gözlənilirdi. “Qartallar”ın baş məşqçisi Rəşad Sadıqov da “Osiyek”lə səfər oyunundan sonrakı mətbuat konfransında “Sabah”la oyunu derbi kimi qiymətləndirmişdi. Buna baxmayaraq, hər iki komandanın avrokubokları göz önünə gətirib, futbolçuları yormayacağını düşünürdüm. Amma yanıldım.

Elə ilk dəqiqələrdən etibarən tərəflər mübarizəli oyuna üstünlük verdi. Meydanın hər nöqtəsində top uğrunda gərgin rəqabət hökm sürürdü. Əsasən də “bayquşlar”ın kollektiv şəkildə hücuma çıxmaına qonaqlar da adekvat əks-hücumlarla cavab verirdi. Həmçinin “qartallar”ın müdafiə xəttinin “Sabah”ın hücum xəttinə nisbətən daha güclü olması da diqqətdən yayınmadı. Qapıya doğru ilk təhlükəli zərbə 13-cü dəqiqəyə təsadüf etdi. Sumanın standart vəziyyətdən “çərçivə”yə göndərdiyi top “canlı sədd”i keçsə də, qeyri-dəqiq oldu. Bir qədər sonra oyundakı ən real qol vəziyyətini Masazır təmsilçisi yaratdı. Lakin Xəyalın rəqib oyunçulardan sıyrılaraq qapı önünə yerlə göndərdiyi ötürməni heç kim tamamlaya bilmədi. 27-ci dəqiqədə meydan sahibləri daha bir qol fürsətini dəyərləndirmədi. Ələskərovun cərimə meydançası önünə göndərdiyi ötürmə zamanı yaranan qarışıqlıqdan yararlanan Xəyalın zərbəsi bu dəfə toru yandan silkələdi. Solaxay Suma 36-cı dəqiqədə bu dəfə çox da işlək olmayan sağ ayağıyla uzaq məsafədən qapını nişan aldı. Zərbə təhlükəli alınsa da, Yusif “çərçivə”ni qorumağı bacardı. İlk yarıda topa nəzarət baxımından üstün olan “Zirə”nin hücuma çıxmaqda çətinlik çəkdiyi aşkar görünürdü.

Sadıqov 2-ci ikinci yarıda müəyyən dəyişiklik və rotasiyalar etməklə heyəti toparladı. Hissə başlar-başlamaz zirəlilər hesabı açmağı bacardı. Əliyarın top Seydiyevin əlinə dəydiyinə görə VAR-a baxandan sonra haqlı penalti qərar verməsi Sadıqovun komandasının işinə yaradı. “Osiyek”lə oyunda olduğu kimi, Utziq bu dəfə də fürsəti boşa vermədi – 0:1. Qolun təsirindən çıxa bilməyən Renduliçin yetirmələri cəmi 2 dəqiqə sonra növbəti topu qapıdan çıxarmalı oldu. Sekidikanın mərkəzdə topu itirməsindən sonra başlayan hücumu Salifu qolla tamamladı – 0:2. Doğrusu, bu epizodda “Sabah”ın orta sahəsinin bərbad və müdafiəsinin də yetərsiz olduğu göründü. Çünki cəmi 3 ardıcıl ötürmədən sonra qonaqlar bəsit şəkildə fərqi artırmağa müvəffəq oldu. Ardıcıl qollardan sonra Masazır təmsilçisi oyuna köklənməkdə çətinlik çəkdi. “Qartallar” isə maksimum dərəcədə ehtiyatlı davranır, rəqibin vermiş olduğu boşluqlar zamanı dərhal əks-hücuma atılırdı. 63-cü dəqiqədə meydan sahibləri fərqi azalatmağa çox yaxın oldu. Amma Safrankonun başla zərbəsi dirəyə tuş gəldi. Qəsəbə təmsilçisi 79-cu dəqiqədə daha bir real qol fürsətindən yararlana bilmədi. Ceyhunun baxımlı ara ötürməsi nəticəsində qapıçıyla təkbətək qalan Rüstəm bu deueldən məğlub ayrıldı. Bir qədər sonra oyuna sonradan qoşulan, həmçinin uzaq məsafələrdən vurduğu qollarla məşhur olan Tellurun zərbəsi yetərincə təhlükəli alındı. İlk növbədə zərbəni dəf edən Aydın ardıcıl ikinci cəhddə Safrankonun da “çərçivə”yə göndərdiyi topun qarşısını almağı bacardı.

Beləliklə, ardıcıl 2-ci qələbəsini qazanan “Zirə” zirvəyə şərikdi. “Sabah” isə hələ qələbəyə həsrətdi.

Gözdən qaçmadı
* Həm “Soldati di Sabah”, həm də “Qartal” fanklubu tribunada idi.
* “Sabah”ın elit fanklubu olan “Fratelli del Sabah”ın pankartı asılsa da, cəmi 6-7 nəfərdən ibarət idilər və komandaya dəstək vermirdilər.
* Oyunu izləməyə gələn azarkeşlər tribunaya su keçirə bilmədiklərinə görə narazıydılar.

KAMAL SƏFƏR