"Təəssüf ki, final istədiyim kimi alınmadı".

"Football-plus.az" xəbər verir ki, bunu Paris-2024 Yay Olimpiya Oyunlarında gümüş medal qazanan Azərbaycan taekvondoçusu Qaşım Maqomedov (58 kq) deyib.

O, finalda zədələnməsinin qızıl medal qazanmasına mane olduğunu bildirib:

- Nə deyə bilərəm? Bütün döyüşlər əla keçdi. Ən yaxşı idman formamda idim. Amma qızıl medal qazanmağa zədə mane oldu. Çox çalışdım. Gümüş medalı ailəmə, xüsusilə həyat yoldaşıma həsr edirəm. Biz ikinci övlad gözləyirik. Məni dəstəkləyən Azərbaycan xalqına təşəkkür edirəm".

- Qaşım, ilk təəssüratların necədi?
- Arenada mənə əla dəstək var idi. Azərbaycan bayrağını görəndə daha da ruhlanırdım. Gənclər və idman naziri Fərid Qayıbov, federasiya rəhbərliyi burada idi. Onlara "çox sağ ol" deyirəm. Azərbaycan Prezidenti İlham Əliyevə ölkədə idmanın inkişafına görə təşəkkür edirəm. Çoxlu olimpiya idman kompleksləri, bazaları yaradılıb, yüksək səviyyədə hazırlıq üçün hər cür imkan var. İldən-ilə ölkədə idman daha da güclənir. Artıq 10 ildi ki, Azərbaycandayam və bu inkişafı görürəm.

- Finalda uduzdun. Zədə olmasa idi, nəticə daha yüksək ola bilərdi. Sevinc hissi çoxdu, yoxsa təəssüf?
- Finaldakı rəqibimlə əvvəl Prezident kubokunda qarşılaşmışdım və qələbə qazanmışdım. Burada özümü əla hiss edirdim. Finala kimi döyüşlərimi hamı gördü. Mən inanılmaz hazır idim. Düşünürdüm ki, finalda şou göstərib Azərbaycana qızıl medalla qayıdacam. Amma belə alındı. Demək qismətdə gümüş imiş.

- Zədən nə qədər ciddidi?
- Baş həkim zədəni yoxladı. Ola bilər ki, ayağımda sınıq var. Buradan birbaşa klinikaya gedib müayinə olunacağam.

- Cüdoçular Los-Anceles-2028-ə titullarını qorumaq üçün gedəcəklərini deyiblər. Sən bu barədə nə düşünürsən?
- Əlbəttə, qızıl medal hədəfim var. Uşaqlıqdan Olimpiadaya yollanmaq arzum idi. Kiçik yaşlarımda idmanla məşğul olarkən bu yarışı izlərkən qeyri-adi hisslər keçirirdim. Bu arzumu həyata keçirmək mənə qismət oldu. Gümüşlə fəxr edirəm. Gəncəm, hələ qarşıda böyük uğurlar qazanmaq şansım var. Los-Ancelesdə bu mümkündü.

- Sonda sankı rəqib idmançı sənə arxadan zərbə vurdu...[b][/b]
- Bu idmandı, belə hallara rast gəlmək mümkündü. Koreyalı idmançı da qələbə qazanmaq istəyirdi. O, bütün variantlardan istifadə edirdi. Əlbəttə, mənə zədə yetirmək istəmirdi. Belə alındı. Sadəcə idman mübarizəsi zamanı arxadan zərbə vurdu. Ciddi bir şey deyil. Buna görə inciklik də yoxdu. Sonda mənə yaxınlaşıb zədəyə görə üzrxahlıq etdi.