Konfrans Liqası
2-ci təsnifat mərhələsi, cavab oyunu
Fehervar (Macarıstan) – Sumqayıt 0:0

22. Balaj Tot
7. Sabolç Şen
31. Nikola Serafimov
21. Andras Husti
(3. Kasper Larsen, 68)
8. Boqdan Melnik
14. Aron Çonqvay (k)
11. Nikolas Stefanelli
(99. Milan Petö, 46)
27. Bentse Bedi
20. Tobias Kristensen
(30. Corc Ominger, 82)
77. Matyaş Katona
(15. Matyas Kovaç, 58)
19. Patrik Kovaç
(9. Neys Qradişar, 46)
Ehtiyat oyunçular
57. Martin Dala
75. Daniel Veszelinov
16. Mario Simut
18. Bense Kovaç
74. Bense Baboş
Baş məşqçi: Tamaş Petö

1. Mehdi Cənnətov
3. Slavişa Radoviç
14. Elvin Bədəlov
6. Vüqar Mustafayev (k)
(60. Tresor Mossi, 90+2)
7. Rövlan Muradov
19. Roy Kehat
8. Səbuhi Abdullazadə
11. Fernando Medeyros
23. Cordan Rezabala
(41. Uğur Cahangirov, 90+2)
10. Rəhim Sadıxov
9. Nikola Vuynoviç
Ehtiyat oyunçular
32. Murad Ağamaliyev
36. Xəyal Fərzullayev
21. Nihad Əhmədzadə
24. Sənan Muradlı
30. Kamran Quliyev
Baş məşqçi: Samir Abasov

Vərəqələr: B.Bedi, 54. S.Radoviç, 45. B.Melnik, 62. N.Vuynoviç, 88 - sarı.

Hakimlər: KRİSTOFFER KARLSSON, Mikael Hallin, Markus Lindqren Klitte, Oskar Yonson (hamısı İsveç).
Hakim-inspektor: Levan Paniaşvili (Gürcüstan).
UEFA nümayəndəsi: Lampirni Dimitru (Yunanıstan).

31 iyul. Sekeşfehervar. “MOL Arena”. 4204 tamaşaçı.
Birinci hissəyə 2, ikinci hissəyə 6 dəqiqə əlavə olunub.
İlk oyun – 2:1.

16 (4) qapıya (“çərçivə”yə) zərbə 8 (2)
10 künc zərbəsi 5
0 ofsayd 5
11 qayda pozuntusu 11
2 (0) sarı (qırmızı) vərəqə 2 (0)
45 topa sahibolma (faizlə) 55

İyulun 25-də daha çox Murad Xaçayevin aldığı qırmızı vərəqə üzündən evdə “Fehervar”a uduzan “Sumqayıt”ın vəziyyəti dəyişmək üçün 6 gün vaxtı var idi. Samir Abasov bu müddətdən yararlanmalı, komandasını növbəti mərhələyə daşımaq üçün planlar cızmalıydı. Zaman, daha doğrusu, oyunun axarı göstərdi ki, onun heç bir planı-filanı yoxdu. Samir bəy çox sadə yol seçmişdi. Evdə oynayan heyətə əl vurmamış, sadəcə, cəzalı Muradı Vüqar Mustafayevlə əvəzləmişdi. Eyni zamanda, “Sumqayıt”ın oyunboyu “yatıb”, yalnız son 10 dəqiqədə fəallaşması da o anlama gəlirdi ki, baş məşqçi oyunun axarından razıdı, sonda bir qol vurmaqla ən azı əlavə vaxta nail olmaq istəyir. Bəli, oyunun axarından razı olmasaydı, ilk dəyişiklikləri daha tez edərdi, daha uzatma dəqiqələrinə qədər gözləməzdi. Bu başqa məsələ ki, ilk yarıda rəqib qapısına yalnız bir zərbə vuran komandanın baş məşqçisi oyundan necə razı ola bilər?!

Oyun qarşılıqlı hücumlar şəraitində başlasa da, meydan sahibləri xüsusən də sol cinahda təhlükəli görünürdü. Mehdi Cənnətov vaxtaşırı oyuna qoşulmalı olurdu. “Sumqayıt”dan isə yalnız Rövlan Muradovun 13-cü dəqiqədəki qeyri-dəqiq zərbəsini xatırlamaq olar.

Tamaş Petö oyunun axarından narazılığını 2-ci hissəyə iki dəyişikliklə başlamaqla göstərdi. Sumqayıtda start heyətində olanlardan Petö ilə Qradişar bu dəfə sonradan meydana çıxdı. 49-cu dəqiqədə, nəhayət, qonaqların ifasında maraqlı hücum və qol vəziyyəti gördük. Rezabala – Muradov – Vuynoviç kombinasiyasnını ardından Səbuhi yaxın məsafədən başla zərbə vursa da, qapıçı Tot yerində idi. Macarlar da dərhal təhlükəli vəziyyət yaratdı, daha dəqiqi, Kristensenin cərimə zərbəsindən sonra tir Cənnətovun köməyinə çatdı. Amma 2-ci hissədə də oyunun mənzərəsi kəskin şəkildə dəyişmədi. Komandaların hər biri hücuma atılmağa çalışır, topu itirəndə isə dərhal böyük qüvvə ilə müdafiə olunurdu. “Fehervar”ın belə oyununu hardasa anlamaq olardı. Ancaq “Sumqayıt”ın futbolçuları topu uzun-uzadı, meydan boyunca bir-birinə ötürür, məsuliyyəti üzərinə götürən tapılmırdı. Sadıxov, Kehat, Abdullazadə kimi yaradıcı oyunçular istəniləni verə bilmirdi. Abasov isə sanki nəyisə gözləyirdi. Amma nəyi?

76-cı dəqiqədə Cənnətov Kristensenin daha bir təhlükəli zərbəsini dəf etdi. Ardından meydanda çox maraqlı hadisə baş verdi. 82-ci dəqiqədə oyuna qoşulan Ominger dərhal zədələndi. Rəqib dəyişiklik limitini doldurduğundan ən azı 11 dəqiqə azlıqda oynayacaqdı. Abasov fürsətdən yararlana, dərhal hansısa dəyişiklik etməklə hücuma kəskinlik qata bilərdi. Amma etmədi və oyundan sonra da futbolçu çatışmazlığından gileyləndi, bəhanələrin arxasına sığındı. “Sumqayıt”ın transfer siyasətinin bərbadlığına görə nə mən məsuliyyət daşıyıram, nə də “Futbol+”in hörmətli oxucuları. “Sumqayıt”ın o qədər də güclü olmayan, maliyyə problemləri üzündən aparıcı oyunçularını itirən “Fehervar” önündə belə miskin görünməsinə görə məsuliyyəti klub prezidenti Riad Rəfiyev və Samir Abasov məsuliyyət daşıyır. Nə yazıq ki, baş məşqçi daha özünəməxsus açıqlamalar verə, günahkarları göstərə də bilmir. Nə deyə bilərik, özü yıxılan ağlamaz! Sumqayıtın adının mənşəyi ilə bağlı olan rəvayəti bir qədər dəyişib, belə demək istəyirəm: Sum, qayıt, Avropa sənlik deyil!

HUŞƏNG