İyunun 27-də FİFA referisi Kamal Umudlunun Konfrans Liqasının 1-ci təsnifat mərhələsinin cavab oyunu çərçivəsində keçiriləcək “Vlajniya” (Albaniya) – “Valyur” (İslandiya) qarşılaşmasının baş hakimi olacağını yazmışdıq. Lakin işlər yolunda getməyib.

“Football-plus.az” xəbər verir ki, UEFA qarşılaşmanı idarə edəcək hakimlər briqadasını dəyişib. Sözügedən matçı Simone Sozza və köməkçiləri idarə edəcək. Qitə futbol qurumu dəyişikliyin səbəbini izah etməsə də, bununla bağlı məlumat əldə etmişik.

Belə ki, “Valyur”un meydanında keçirilən ilk oyunda (2:2) ciddi qalmaqal yaşanıb. Hadisələrin inkişafı azarkeşlərin niderlandlı hakim Tim Marşall və briqadasına hücum çəkməsiylə nəticələnib. Belədə komandaların ikinci görüşü riskli oyun statusunda olduğundan UEFA bura daha təcrübəli ədalətli təmsilçiləri təyin edib.

Qeyd edək ki, cavab oyunu sabah Şkoderdə yerləşən “Loro Boriçi” stadionunda keçiriləcək.

KƏNAN BAHADIR