İyulun 13-14-də ABŞ-də təşkil edilən 48-ci Amerika Kubokunun (AK) son iki matçı keçirildi. Əvvəlcə 3-cü yer uğrunda oyunda Kanadaya penalti seriyasında qalib gələn Uruqvay yığması bürünc mükafatçı oldu. Finalda isə Argentina Kolumbiyadan üstün olmaqla titulu qorudu.

final
Argentina - Kolumbiya 1:0 (0:0, 0:0, 1:0), əlavə vaxtda
Argentina: E.Martines, Montyel (Molina, 72), K.Romero, Lisandro Martines, Talyafiko, De Paul, Makallister (Paredes, 97), E.Fernandes (Lo Çelso, 97), Di Mariya (Otamendi, 117), Messi (N.Qonsales, 66), Alvares (Lautaro Martines, 97).
Kolumbiya: K.Varqas, S.Aryas, D.Sançes, Kuesta, Moxika, Rios (Kastanyo, 89), Lerma (Uribe, 106), C.Aryas (Karraskal, 106), X.Rodriges (Kintero, 91), L.Dias (Borxa, 106), C.Kordoba (Borre, 89).
Qol: Lautaro Martines, 112.
Vərəqələr: C.Kordoba, 27. Makallister, 62. Borxa, 115. Lo Çelso, 118 - sarı.
Hakim: Rafael Klaus (Braziliya).
14 iyul. Mayami. 63000 tamaşaçı.

Argentina yığması son 8 AK-də 6-cı dəfə finala çıxmışdısa, Kolumbiya turnirin həlledici oyununda sonuncu dəfə 2001-ci ildə görünmüşdü. Onu da qeyd edək ki, 23 il əvvəlki yarış məhz kolumbiyalıların qəəbəsi ilə nəticələnmişdi. Bukmeker kontorları Argentinanı təbii olaraq finalın favoriti hesab etmişdilər. Amma son çempionun işinin heç də asan olmayacağı dəqiq idi. Ona görə ki, Kolumbiya həm qrup, həm də pley-off mərhələsində çox yaxşı təsir bağışlamışdı. Nestor Lorensonun komandası azarkeşlərini uzun müddət davam edən çempionluq həsrətinə son qoya biləcəyinə çox ümidləndirmişdi.
Mayamidəki finalın vaxtında başlamadığını ilk növbədə bildirməliyik. Oyundan əvvəl “Hard Rok Stedium”un ətrafında azarkeş anarxiyası hökm sürürdü. Bileti olmayanların basırıq yaratması və arenaya daxil olmağa çalışması olduqca təhlükəli vəziyyətə yol açmışdı. Polislər asayişi pozanları saxlamağa və stadiona giriş qapılarını bağlamağa çalışırdılar. Maraqlıdı ki, bəzi qapıların bağlandıqdan bir neçə dəqiqə sonra açılması fanatların turniketlər olan ərziləri aşıb içəri daxil olması ilə müşayiət olundu. Onların metal hasarın üstündən və ventilyasiya sistemi olan məkandan arenaya soxulması ciddi problemlərə yol açdı. Yerli mənbələr azı 7 azarkeşin müxtəlif dərəcəli xəsarətlər aldığını və 12 nəfərin saxlanıldığını xəbər verir. Əlbəttə, belə şəraitdə oyuna start vermək mümkün deyildi. Nəticədə final 1 saat 23 dəqiqə gecikmə ilə başladı.

İlk hissədə kolumbiyalılar daha maraqlı komanda görüntüsü verdilər. Topa rəqibindən çox sahib olan Lorensonun komandası qapıya zərbələr planında da üstün tərəf idi. Lakin Emiliano Martinesin qoruduğu qapı qarşısında real təhlükələrə az təsadüf olundu. Amma epizodların birində Kordobanın dirəyi nişan aldığını qeyd etməliyik. Öz növbəsində ilk hissədə argentinalıların da hesabı açmaq şansı oldu. Lakin Messinin zərbə endirməsindən əvvəl topa müdaxilə edən Alvares gözəl imkanı korladı. Maraqlıdı ki, fasilə məşhur müğənni Şakiranın çıxışına görə 15 yox, 25 dəqiqə çəkdi. Bu isə planlaşdırılan tədbir idi. AK-nin final matçında ilk dəfə mini-konsert təşkil olunduğunu da bildirək.

Argentina ikinci hissəyə fəal başladı. Amma təşəbbüsü ələ alan Lionel Skaloninin komandası rəqibin güclü müdafiəsini yarmaqda çətinlik çəkirdi. Bu, azmış kimi 66-cı dəqiqədə Messi zədələnərək meydanı tərk etdi. Onun ehtiyat oyunçular skamyasında göz yaşlarını saxlaya bilməməsi də diqqətdən yayınmadı. İkinci hissədə də hesab açılmadı və turnirdə ilk dəfə yalnız final üçün nəzərdə tutulan əlavə vaxt qaydası tətbiq olundu. Həlledici 30 dəqiqədə meydanda əsasən bərabərsəviyyəli mübarizə yaşandı. Futbolçuların yorulduqları aydın görünürdü. Hər necə olsa argentinalılar 112-ci dəqiqədə hesabı açdılar. Alvaresin yerinə meydana çıxan Lautaro Martinesin vurduğu qol “albiselesta”nın çətin qələbəsini təmin etdi. 2021-ci ildə çempion olan Skaloninin komandası titulu qorudu, Kolumbiya isə azarkeşlərinə yalnız finalın həyəcanını yaşatmağı bacardı.

3-cü yer uğrunda oyun
Kanada - Uruqvay 2:2, p. – 3:4
Kone, 22. Devid, 80 – Bentankur, 8. L.Suares, 90+2.
Kanada: Sent Kler, Conston (Devis, 62), Bombito, De Fujerol (Kornelius, 67), Lareya, C.Osorio (Beyr, 77), Kone, Ahmed (Millar, 77), Şuenye, Şaffelberq, Oluvaseyi (Devid, 67).
Uruqvay: Roçet, X.M.Ximenes, Kaseres, Vinya (Olasa, 67), Uqarte (De Arraskaeta, 46), Nandes, Valverde, Bentankur, Pelyistri (B.Rodriges, 62), M.Arauxo (K.Olivera, 62), D.Nunyes (L.Suares, 46).

Kanada yığması yarımfinalda Argentinaya 0:2, Uruqvay isə Kolumbiyaya minimal hesabla uduzmuşdu. 2011-ci ildən sonra ilk dəfə yarımfinala çıxan Uruqvay yığması 3-cü yer uğrunda oyuna iki ciddi itki ilə çıxacaqdı: Ronald Arauxo zədəli, Varela ilə De la Krus isə cəzalı olduqları üçün “selesta”ya kömək edə bilməyəcəkdilər. Bürünc medal uğrunda mübarizədə Cənubi Amerika təmsilçisinin uğur qazanmaq şansı yüksək dəyərləndirilirdi. Amma Şarlott şəhərində keçirilən matç kanadalıların təsadüfən yarımfinala qədər irəliləmədiklərini göstərdi.

“Bank of Amerika Stedium”da baş tutan matç yetərincə baxımlı keçdi. Gözlənildiyi kimi, uruqvaylılar ilk dəqiqələrdə fəal təsir bağışladılar. Marselo Byelsanın çalışdırdığı komandanın ilk həmlələrindən birində Bentankur Kaseresin ötürməsi ilə hesabı açdı. Şimali amerikalılar qapısından erkən top buraxsalar da, əsla ruhdan düşmədilər. Əksinə, Cessi Marşın çalışdırdığı komanda cəsarətli oyunu ilə artıq 22-ci dəqiqədə cavab qolunu vurdu. 1:1 hesabı uzun müddət dəyişmədi. Halbuki 80-ci dəqiqəyə qədər hər iki tərəfin bir neçə dəfə önə keçmək şansı oldu. Həmin anda kanadalıların aqressiv hücumlarından biri meydana az əvvəl çıxan hücumçu Devidin qolu ilə nəticələndi. Bundan sonra uruqvaylıların böyük qüvvə ilə irəli atılacaqları gözlənilirdi. Onların xilaskarı ikinci hissədə Darvin Nunyesin əvəzinə meydana çıxan Luis Suares oldu. 37 yaşlı hücumçunun son dəqiqələrdə hesabı bərabərləşdirməsi ilə penalti seriyası qaçılmaz oldu. Qeyd edək ki, AK-nın reqlamentinə əsasən, pley-off mərhələsində yalnız final matçının əsas hissəsi heç-heçə başa çatdığı zaman əlavə vaxt təyin olunur.

1/4 finalda Braziliyanı qolsuz başa çatan matçdan sonra labüd olan penalti seriyasında üstələyən (4:2) Byelsanın komandasının bu dəfəki cəhdi də uğurlu alındı. Seriyada Konenin zərbəsini qapıçı Roçet dəf etdi, Devis isə tiri titrətdi. Uruqvalıların ilk 4 zərbəsi dəqiq alındığı üçün bürünc medallar onlara qismət oldu. Beləliklə, “selesta”nın AK-da 13 illik medal həsrəti sona çatdı.
Bombardirlər: Lautaro Martines (Argentina) - 5, Rondon (Venesuela) - 3.

Faktlar
* 16-cı dəfə çempion olan Argentina yığması Uruqvayı (15) arxada qoyaraq yeni rekord müəyyənləşdirdi. Braziliya AK-da 9, Paraqvay, Çili və Peru hərəyə 2, Kolumbiya və Boliviya isə bir dəfə qızıl mükafatçı olub.
* Messi XXI əsrdə AK-nın finalında meydana çıxan ən yaşlı oyunçu oldu. O, həlledici matçda 37 yaş 20 günlüyündə iştirak etdi.
* Karyerasında 45-ci titulu qazanan Messi özünün sahibi olduğu dünya rekordunu yenilədi. Bu planda sonrakı yerləri braziliyalı Daniel Alveş (43) ilə misirli Hossam Aşur (39) tuturlar.
* Uruqvay yığması AK-da 2011-ci ildən sonra ilk dəfə mükafatçılar sırasına düşdü. Komanda 13 il əvvəl turnirin qalibi olmuşdu.
* Suares milli formada keçirdiyi 142-ci oyunda 69-cu qolunu vurdu. Luis 2007-ci ildən çıxış etdiyi yığmada sonuncu qolunun sevincini 2022-ci ilin martında Çili ilə oyunda yaşamışdı.

Yeri gəlmişkən...
Argentina yığması Finalissimada oynamaq hüququ qazandı. AK-nın qalibi gələn ilə təyin olunan yeganə oyunda Avropanın yeni çempionu İspaniya ilə qarşılaşacaq. Qeyd edək ki, Finalissimanın hazırkı çempionu Argentinadı. Cənubi Amerika təmsilçisi 2022-ci ildə İtaliyaya 3:0 hesabı ilə qalib gəlib.

Oyundan sonra
Lionel Skaloni, Argentina yığmasının baş məşqçisi: