"Komandamın hazırlığından razıyam. Hava şəraiti bəzən bizə çətinlik yaradır. Dağlıq ərazidə olduğumuzdan nəfəsalmada problem var. Yüklənməyə baxmayaraq, futbolçular verilən tapşırıqları həvəslə yerinə yetirir. 3-cü oyunda kimlə qarşılaşacağımız dəqiqqləşməyib. Məlumdu ki, yeni komanda yığırıq, işimiz çoxdu. “Ərzurumspor”la oyuna heç bir taktiki gedişi, hücum və müdafiə taktikalarını  meydanda reallaşdıra bilmədik. Bayaq qeyd etdiyim kimi, əsasən fiziki hazırlıq üzərində izləyirik. İlk yoxlama oyununda meydana yeddi yeni oyunçumuz çıxdı. Bir neçə oyunçumuz tam hazır olmadığından, ümumiyyətlə, meydanda olmadılar. Buna baxmayaraq, mənə lazım olan iş əmsalı idi. Onu da müsbət mənada gördüm.

Fərqli mövqelərdə səhvlər danılmazdı. Futbolçular yaxşı mübarizə apardılar. İki standart vəziyyətdən, yəni  künc zərbəsindən qol vuruldu. Amma qapımızda təhlükəli vəziyyət olmadı. Buna baxmayaraq, 5 yüzfaizlik qol vəziyyətlərimiz olsa da, ondan istifadə edə bilmədik. Bu da anlaşılandı, tam hazır deyilik. Hər futbolçuya 45 dəqiqə oynamaq şansı verdik. Ancaq heyətin məhdudluğu, 3-4 futbolçunun düşərgəyə qoşulmaması məcbur etdi ki, bəzilərini 70-ci dəqiqəyə kimi meydanda saxlayaq. Bunu isə düzgün saymıram. İndiki halda bir futbolçu 40-45 dəqiqə oynamalıdı. Digər tərəfdən, legionerlərə də baxanda gördük ki, aldanmamışıq. Özlərini axşı tərəfdən göstərə bildilər. Ancaq keyfiyyət baxımından hələ hazır deyilik. Bunun üçün isə avqusta qədər vaxtımız var”.