Vasif Durarbəylinin Azərbaycan Şahmat Federasiyasına, konkret prezident Mahir Məmmədova ünvanlanan ittihamlarını oxuyanda istər-istəməz 2014-cü il yanvarın 14-nü xatırladım.

Həmin gün Şahmat Mərkəzində gözünü Almaniyada əbədi yuman Vüqar Həşimovla vida mərasimi keçirilirdi. Xəbəri eşidən-bilən hər kəs Vüqarla vidalaşmağı özünə borc bilmişdi. Bu şəklə də diqqətlə baxın. Vüqarın tabutunun solunda bu gün Vasifin məktubunda adı çəkilən Mahir Məmmədov, sağında isə Teymur Rəcəbovun sabiq qaynatası Elşad Nəsirov dayanıb. Vida mərasimində çıxış edənlər dünyadan nakam gedən Vüqarın ustalığından, yaşasaydı, Azərbycan şahmatına bir çox parlaq qələbə qazanmaqda yardım edə biləcəyindən danışırdı. Belə bərli-bəzəkli, bəlağətli sözləri deyən adamlar cəmi 4 il əvvəl Vüqarı Ümumdünya Şahmat Olimpiadasına yollanan heyətdən çıxarmış, özləri də bilmədən xəstəliyinin şiddətlənməsinə yardım etmişdilər. Halbuki həmin Vüqar 2009-cu ildə 7 saat sürən həlledici oyunda qələbə qazanmaqla yığmamıza ilk dəfə Avropa çempionluğunu qazandırmış, ölkə telekanallarının birinin efirində canlı bağlantı zamanı “Azərbaycan, səni çox sevirəm” demişdi.

Vüqar Vasifdən də usta və reytinqli şahmatçı idi. Bir ara reytinqi hətta 2761-ə qalxmışdı. AŞF onu yumşaq desək, şərlədi, Prezident Kubokuna qatılmamaqda suçladı, mərhum qrossmeyster prezidentə müraciət edərək məsələnin məğzini açıqlayanda isə həqiqətin üzə çıxmasını əngəllədi. Onda federasiyanın prezidenti Elman Rüstəmov idi, vitse-prezident isə bu gün Durarbəylinin məktubunda adı çəkilən Mahir Məmmədov. Məmmədov onda Həşimovu başqalarının adından danışmaqda suçlayırdı, deyirdi ki, səni federasiyaya dəvət etmirlərlə, gərək qurumun qapısını-pəncərəsini yerindən çıxarasan, taleyinlə maraqlanasan. Onda yenə karyerasının zirvə çağlarını yaşayan Şəhriyar Məmmədyarov, Teymur Rəcəbov da var idi. Azərbaycan gec-tez şahmat tacının Bakıya gələcəyinə inanırdı. İndi isə nə həmin Teymur var, nə də həmin Şəhriyar. Hər biri karyerasının qürub çağını yaşayır, kişi şahmatımız Avropada və dünyada əvvəlki mövqeyini əldən verməkdədi. Və belə durumda AŞF-nin dəst-xətti, şahmatçılarla davranışı dəyişməyib. Vasif Durarbəyli bütün əsas meyarlara cavab verdiyi halda, sentyabrda Macarıstanda keçiriləcək növbəti Olimpiadaya qatılacaq heyətə salınmayıb. AŞF eynən Vüqar Həşimov məsələsində olduğu kimi, Vasifin də boynuna minnət qoyur:

Doğrudan da, acınacaqlı mənzərədi. AŞF Vasifə demək istəyir ki, sus, haqqını tələb etmə, lazım gəlsə, səni təqaüd proqramından da çıxararıq. Şahmatda yeni və parlaq istedadlar yetişdirə bilməyən ölkə göz önündə olan üç-beş ulduzu da pisikdirir, uzaqlaşdırır və belələrinin az qala “vətən xaini” obrazını yaradır. Bu dünyadan nakam gedən Vüqar Həşimovun ardından, deyəsən, növbə Vasif Durarbəylinindi. Amma niyə və nə vaxta qədər? Ümid edirəm ki, Mahir Məmmədovun bu suala cavab verməyə vaxtı olacaq.

HUŞƏNG