De Bruyne italiyalı jurnalisti niyə təhqir etdi?
Belçika yığması AÇ-2024-də çıxışını biabırçı şəkildə başa vurdu.
Qrup mərhələsinin son turunda Ukrayna ilə çətinliklə heç-heçə edən “qırmızı iblislər” 1/8 finalda Fransa önündə varlığını göstərə bilmədi. Belçikalıların “qızıl nəsil” adlandırılan futbolçu nəsli yenə də ciddi uğur qazanmadı. Təbii ki, belədə oyunsonrası mətbuat konfransında yığma üzvlərinə aqressiv suallar ünvanlanacaqdı. CNN və “Əl-Cəzirə”nin italiyalı əməkdaşı Tankredi Palmeri Belçika yığmasının ulduzlarından De Bruyneyə belə sual ünvanladı:
“Sizin “qızıl nəsl”in yenə də finala qədər irəliləyə bilməməsi necə hissdi?”
Kevin həmkarımızın sualına kobud reaksiya verdi:
“Bu “qızıl nəsil” nədi? Demək istəyirsiz ki, Fransa, İngiltərə, İspaniya və Almaniyanınkı “qızıl nəsil” deyil? Yaxşı, sağ olun”. Qapıdan çıxarkən isə bu sözü əlavə etdi: “Axmaqlıq”.
Futbolçunun cavabından inciyən Palmeti sosial şəbəkədə ona belə müraciət etdi:
“Ha-ha, De Bruyne indicə məni axmaq adlandırdı. Salam, Kevin, sənin üçün kiçik qeyd: Fransa, İngiltərə, Almaniya və İspaniyanın “qızıl nəsl”i finala qədər irəliləyib! Ona yalnız nə dərəcədə yaxşı olmasıyla bağlı suallar verilməsini istəyən tipik futbolçu. Korlanmış oğlancıq”.
Belçika yığması bu turnirdə tez-tez tənqid olundu. Ukrayna ilə oyundan sonra komanda təşəkkür etmək üçün öz azarkeşlərinə yaxınlaşarkən fitə basıldı. Səs-küyü görən De Bruyne komandanı paltardəyişmə otağına apardı. Domeniko Tedesko isə həmin olaya belə reaksiya verdi:
“Hamı belə reaksiyaya görə bir qədər təəccübləndi. Pley-offa çıxmaq istəyirdik və bunu bacardıq. Ancaq fanatlar bizi fitə basırsa, bunu qəbul etməliyik”.
Belçika yığmasının “qızıl nəsl”ini nəticələri həqiqətən də parlaq deyil. Komandada Eden Azar, Tibo Kurtua, Romelu Lukaku və Kevin de Bruynenin peyda olduğu 2014-cü ildən bəri “qırmızı iblislər” yalnız DÇ-2018-də bürünc medal qazana bildi, qalan turnirərdə isə maksimum 1/4 finala qədər irəlilədilər. Komanda iki il əvvəl Qətər mundialına yollananda isə elə həmin De Bruyne turnirdəki hədəflərlə bağlı birmənalı qiymətləndirilməyən açıqlama vermişdi:
“Heç bir şansımız yoxdu, biz hədsiz yaşlıyıq. Düşünürəm ki, 2018-də şansımız var idi. Yaxşı komandamız olsa da, get-gedə gəncləşmir. Biz burda autsayderik”.
Kevinin proqnozu doğruldu: Belçika artıq qrup mərhələsində mübarizəni dayandırdı. Bu dəfə isə 1/8 finaldan sonra evə qayıtdılar. Bu, “qızıl nəsil” dönəmində Avropa çempionatlarındakı ən pis nəticədi.
Digər xəbərlər
