Artıq “Neftçi”də hərəkətli günlər yaşanır.

Yeni baş icraçı direktorun və baş məşqçinin gəlişi ilə klub canlanıb. Roman Qriqorçuk gələndən sonra iki keçid rəsmiləşibsə, komandanı tərk edənlər də var. Bunlardan biri də illərdi “ağ-qaralar”ın şərəfini qoruyan Aqil Məmmədovdu. Paytaxt klubu iyunun 28-də 35 yaşlı qapıçı ilə yollarını ayırdığını açıqladı.

Təcrübəli oyunçu 2015-ci ildən bəri (arada AZAL ilə “Qəbələ”nin də formasını geyib) “Neftçi”nin heyətində 112 oyun keçirib. Aqillə ayrılığın səbəbi, gələcək karyerası, həmçinin sabiq komandasının hazırki durumu barədə danışdı.

- 7 il formasını geydiyin “Neftçi”dən ayrılmağına nə səbəb oldu?
- Dizimdəki ağrılara görə karyeramı davam etdirə bilmirəm. "Neftçi"dən ayrılmağımın səbəbi də budu. Bu üzdən karyeramı bitirdim.

- Futboldan tam uzaqlaşacaqsan, yoxsa...
- Hələ onu dəqiq bilmirəm. Bir müddət sonra qərar verəcəm.

- "Neftçi"də keçirdiyin illər yadında necə qaldı?
- "Neftçi" mənim üçün doğma komandadı. Biz orda bir ailə kimi olduq. Klubdakı hər kəsə təşəkkür edirəm. Mənim ordan heç bir incikliyim yoxdu. Hər şey yaxşı idi, tam qaydasında davam edirdi. Sadəcə, səhhətimdəki problemə görə, öz istəyimlə ayrılmalı oldum.

- Son mövsüm "ağ-qaralar" fiasko yaşadı. Buna görə özündə günah görürsənmi?
- Yox, komandanın indiki vəziyyətində özümü günahkar görmürəm. Biz oynadığımız vaxtlarda "ağ-qaralar" uğurlar qazanıb. Mən "Neftçi" ilə çempion olmuşam. Yəni uğursuzluqda özümü günahkar görmürəm.

- Baş məşqçi dəyişikliyinin növbəti mövsümdə kluba uğur qazandıracağını düşünürsən?
- Bundan sonra "Neftçi"yə uğurlar arzulayıram. Ümid edirəm ki, komada uğur qazanar. Bir futbolçu kimi buna sevinərəm.

- Sən komandanın “mətbəxinə” yaxşı bələdsən. Növbəti mövsüm "Qarabağ"la layiqincə mübarizə aparacaq "Neftçi" görə bilərik, yoxsa tezdi?
- Çətin olacaq. Dəqiq nəsə demək olmur, çempionatda görəcəyik. Çünki "Qarabağ"in illərdi formalaşan heyəti, peşəkar baş məşqçisi var. Qurban müəllim Azərbaycan futbolunu da, dünya futbolunu da yaxından tanıyan insandı. Qriqorçuk isə yeni gəlib. Heyəti formalaşdırması, taktikasını yeritməsi vaxt aparacaq. Amma o da Azərbaycan futboluna yad bir adam deyil. Dəqiq bilmək olmaz. Zaman hər şeyi göstərəcək.

- Yeni baş məşqçilərin, yəni Qriqorçukla yanaşı, Kurban Berdıyevin də gəlişi növbəti mövsüm çempionata necə təsir edəcək?
- Mənə elə gəlir ki, bu il çempionat ötənilkindən daha maraqlı və gərgin keçəcək. Çünki "Sabah"dan, "Turan Tovuz" dan tutmuş "Araz-Naxçıvan"a qədər hər biri iddiasını ortaya qoyacaq. Əvvəllər 2-3 komanda gözə çarpırdısa, irəlidə bu say ikiqat artacaq. Həm çempionluq, həm də kubok uğrunda mubarizədə gərginlik olacaq.

- "Neftçi" son mövsümdə yetərincə çox tənqid olundu. İddialı bir klub formalaşdırıb, tənqid dalğasını aradan qaldırmaq mümkün deyilmi?
- Bu gərginlik "Neftçi"nin adına görədi. Hamı onun adını düşünür. Sadəcə, transferlərdən çox şey aslıdı. Bəli, "Neftçi"nin adı var, tarixi komandadı. Amma adına görə yox, transferlər önəmli rol oynayacaq. Yəni nəticələri, uğurları çempionatdakı oyununa görə bilinəcək. Düzgün transferlər olsa, əlbəttə, "ağ-qaralar" uğur da qazanacaq.

RÖYANƏ OĞUZ