“İlk oyunda böyük hesabla məğlub olmuşduq. Amma mütləq nəticə qazanmaq istəyirdik. Köklənmişdik ki, bu dəfə qalib gələk, ən azı heç-heçə edək. Vətənə nəticə ilə dönmək istəyirdik. Kimsə bunu nəticə saymaya bilər. Amma daha əvvəl "Cəbrayıl" Şamaxıda keçirilən turnirdə - öz meydanımızda Belarus komandasına məğlub olmuşdu. Həmçinin Sumqayıt "Ümid"i də uduzmuşdu. Biz isə İsveç klubu ilə bərabərə qaldıq. Qələbə üçün çox yaxşı şansımız vardı. İlk 10 dəqiqədə rəqib qol vursa da, sona yaxın əks-hücum edərək hesabı bərabərləşdirə bildik. Fasilədən sonra ilk dəqiqələrdə tam üstünlük bizdə idi. Artıq 2:1 önə çıxmağı bacardıq. Fərqi daha da artırmağı düşündüyümüz anda qapımızda cavab topunu gördük. Daha sonra hər iki komandanın qol şansları, dirəyə dəyən zərbələri oldu. Oyun bərabər səviyyədə keçdi, heç-heçə ədalətli nəticə oldu. İsveç komandası ilə həm yaxşı oyun, həm də yaxşı münasibət formalaşdı. Turnirdə daha uğurlu çıxış edə bilərdik. İlk matçda Gürcüstan komandasına bizdən üstün heyətə malik olduğuna, həm də kollektivimizin uyğunlaşma probleminə görə elə hesabla uduzduq. Ancaq İsveç komandası bizim kimi həvəskarlardan ibarət kollektivə malik idi. Bu gün artıq Azərbaycana qayıdırıq. İyulun 4-ü gürcülərlə isveçlər qarşılaşacaq ki, bunu da ölkədən izləməli olacağıq”.