“İnter”in sahibi dəyişdi!
A seriyasında mövsümü çempion kimi tamamlayan “İnter”lə bağlı dünən mühüm bir olay yaşandı.
“Football-plus.az” xəbər verir ki, Milan nəhənginin sahibi borclar üzündən dəyişdi! Klub amerikalıların tabeçiliyinə keçdi.
Məsələ burasındadı ki, “neradzurra”nın artıq sabiq sahibi, çinli iş adamı Stiven Çjana məxsus “Suninq Qrup” şirkəti bir müddət öncə klubun səhmlərini girov qovmaqla Amerikanın “Oaktree Capital” şirkətindən 275 milyon avro borc götürmüşdü. Amma Çjanın şirkəti həmin borcu geri qaytarmaqla bağlı ciddi çətinliklərlə üzləşdi. Nəticədə borc faizlərlə birlikdə 386 milyon avroya çatdı! Çinli iş adamının bu pulu ödəmək üçün mayın 23-nə qədər vaxtı var idi. Amma o, bu məbləği ödəyə bilmədi. Bu üzdən 22 may tarixi tamam olan kimi Çjanın girov qoyduğu “İnter” “Oaktree” şirkətinin balansına keçdi. Artıq şirkətdən bununla bağlı rəsmi açıqlamada verilib. Amma bu prosesin sənədləşdirilməsi və qanuniləşdirilməsi təxminən 15-20 gün davam edəcək. Yalnız bundan sonra “Oaktree” rəsmən “İnter”in sahibi sayılacaq. Şirkətin rəsmi açıqlamasında bu sözlərə yer verilib:
“Üzərimizdəki məsuliyyəti və bizə necə tarixi bir klubun miras qaldığını anlayırıq. “İnter”in gələcəyini inşa etməyə çalışacağıq. İnanırıq ki, ambisiyalarımız bu klubun həm İtaliyada, həm də bütün dünyada olan coşqulu fanatlarının ambisiyaları ilə üst-üstə düşəcək. İlkin hədəfimiz “İnter” üçün sabit maliyyə durumu yaratmaqdı. Bu klubun rəhbərliyində yer alan şəxslərə böyük hörmətimiz var və onlarla sıx əməkdaşlıq edəcəyimizə inanırıq. İkinci ulduzun qazanılması klub tarixində mühüm rol oynayır və biz də bu uğurlu siyasəti davam etdirməyə çalışacağıq”.
“İnter”in rəhbərliyində yeni vəzifə bölgüsünün məhz “Oaktree” şirkəti tərəfindən aparılacağı gözlənilir. Xatırladaq ki, Çjan 2018-də 26 yaşında ikən “İnter”in səhmlərini ələ keçirmişdi. Milan nəhəngi onun dönəmində iki çempionluq, iki ölkə kuboku və üç ölkə superkuboku olmaqla 7 titul qazandı. “İnter” Çjan ilə həm Çempionlar Liqasının, həm də Avropa Liqasının finalında oynadı.
Digər xəbərlər
