“Məncə, Monqolustanla oyun haqda çox danışmağa ehtiyac yoxdu. 90 dəqiqə ərzində üstünlük bizdə idi. Düzdü, böyükhesablı qələbə gözləyənlər çox idi. Lakin bir məqamı unuduruq. Yığmamız “bir nömrə” kimi çıxış etməyə öyrəşməyib. Həmişə müdafiə olunmağa üstünlük vermişik. Nəticədə hücum cəhdləriylə bağlı sıxıntılar ortaya çıxıb. Qol imkanlarını yaxşı dəyərləndirə bilmirik. Bolqarıstanla matça gəlincə, bizə uyğun rəqib idi. Birinci qarşılaşmada olduğu kimi, bu matçda da 80-ci dəqiqədən sonra sürəti artırıb qol vura bildik. Bu onu göstərir ki, komandada xarakter var. Ən əsası, gənclər özünü daha yaxşı tərəfdən göstərə bilmək üçün can atırdı. Deməli, gələcəkdə belə futbolçulara inanmaq, yavaş-yavaş çətin oyunlara hazırlamaq vacibdi. Əlbəttə, əsas məqsəd yaxşı nəticələr qazanmaqdı. Lakin oyun tərzi də çox önəmlidi. Məsələn, müdafiədə ciddi səhvlərə rast gəlmədik. Ən önəmlisi isə orta xətdi. Təəssüf ki, bu mövqedə problem çoxdu. Düşünürəm ki, oyunçular daha kreativ, yaradıcı olmalıdı. Bu problemin aradan qaldırılması yönündə iş görülməlidi. Gənclərə üstünlük verməliyik. Ümumiyyətlə, hər iki oyunda futbolçuların qələbə istəyini gördüm. Bunun üçün çox çalışdılar. Xarici klublarda çıxış edən futbolçular da pis təsir bağışlamadı. Buna baxmayaraq, komandaya dəvət edilənlər öz vəzifəsini bilməli və milli formanın əhəmiyyətini dərk etməlidi. Bir məqamı da qeyd etmək istəyirəm. Klublarda çalışan baş məşqçilər yığmaya çağrılan futbolçularla daha çox çalışmalıdı. Çünki təlim-məşq toplanışları təxminən bir həftə davam edir. Belə az vaxtda ciddi çatışmazlıqları aradan qaldırmaq üçün iş görmək olmur. Yəni hansısa uğursuzluğa görə məhz millidə çalışan məşqçiləri qınamaq doğru deyil. Yeri gəlmişkən, hər iki matçda azarkeş dəstəyi az idi. Futbol adamları çalışmalıdı ki, tərəfdarları stadiona cəlb etsin”.

“Hər iki oyun iyunda Albaniya ilə keçirəcəyimiz yoldaşlıq matçına hazırlıq xarakteri daşıyırdı. Məhz həmin qarşılaşmanı Millətlər Liqasına hazırlıq kimi dəyərləndirmək olar. Hələ ki vaxt var. Gənc futbolçuları sınaqdan keçirdik. Növbəti matçdan sonra isə İsveçlə oyuna hazır vəziyyətə gələ biləcəklər”.

“Arif Əsədovun taktikalarını gördüm. O, komandanı istədiyi kimi meydana çıxardı. De Byazi ilə Arif müəllimin iş prinsipi və tərzi fərqlidi. Ən yaxşı addım gənclərin milliyə çağrılması, hətta bir neçəsinin debüt etməsi oldu. Həmin futbolçular bundan sonra klubda çıxışa daha ciddi yanaşacaqlar. Artıq ümidlidilər və yığmaya dəvət almaq üçün formada olmaq istəyəcəklər”.