“Oyunda “1 nömrə” kimi çıxış etdik. Bu isə heç də asan məsələ deyil. Elə “Bayer-04”lə “Qarabağ”ın matçına baxsaq, yəqin ki, “aspirinlər”in “1 nömrə” kimi çıxış etdiyini təsdiqləyərsiz. Onlar da mərkəzi yarıb keçə bilmədikləri üçün daha çox cinahlardan hücuma keçirdilər. Monqolustanla oyunda da bu baş verdi. Rəqib beşli müdafiə ilə çıxış edirdi. Bu isə müdafiənin bütün hissələrini 3 mərkəz müdafiəçisi, 3 dayaq yarımmüdafiəçisi və 2 hücumçunun qoruması deməkdi. Komandanın 70-80 faizini mərkəzdə cəmlədilər. Belə olan halda isə mərkəzdən yarmaq asan məsələ deyil. Gərək ən azı Messi qədər istedadlı olasan ki, mərkəzdə, həmin sıxlığın içində rəqibi geridə qoya biləsən. Doğrusu, rəqibi geridə qoymağa belə imkan yox idi. Yalnız cinahlardan hücum etmək olurdu. Digər tərəfdən, belə sıx müdafiəni yarmaqdan ötrü təkbətək mübarizələrdə yaxşı olmaq lazım idi. Çatışmazlıqlarımızdan biri də təkbətək mübarizələrdəki zəiflikdi. Bundan başqa, bəzi incə məqamlar da var idi ki, həmin epizodlarda ustalıq səviyyəsinin çatışmadığını düşünürəm. Amma ümumilikdə Monqolustanla oyunda 4-5 qol vəziyyəti yaratdıq. Doğrudu, rəqibin qapıçısının yaxşı oyununu da unutmaq olmaz. Əslində biz cinahlardan hücumlarda, asmalarda uğurlu idik. Sadəcə, qolkiper həqiqətən komandasını xilas edirdi. O ki qaldı qorxaqlıq məsələsinə, burda belə mövzudan söhbət gedə bilməz. Arif Əsədovu hansı qorxaqlıqda günahlandırırlar? Hansı səbəbdən belə düşünürlər? Bunu başa düşə bilmirəm. Arif müəllimin qısa zaman kəsiyində nəsə böyük bir şey etməyə çalışdığını düşünmürəm. Onun əsas məqsədi məhdud zaman kəsiyində futbolçuları fiziki baxımdan hazırlamaq idi. Yəni daxili çempionatdakı yorğunluqdan sonra uşaqların özünə gəlməsini saxlamalı və motivasiya verməliydi. Hansısa böyük bir taktiki gediş üzərində işləmək az vaxt ərzində çox çətin idi. Emil Mustafayevə gəlincə, hesab edirəm ki, meydanda olduğu müəyyən müddət ərzində 2-3 yaxşı hərəkətini görə bildik. Düşünürəm ki, bundan əvvəl millimizə cəlb edilən legionerlərdən zəif təsir bağışlamadı. Yığmamıza xeyir verə biləcək futbolçu kimi göründü. Amma xarakterin bilmirəm. Milli komandada bacarıqdan daha çox xarakter, şəxsiyyət olmaq lazım gələcək. Dəfələrlə görmüşük ki, ustalıq səviyyəsi yaxşı olan futbolçular xarakteri olmadıqlarına görə bizə heç bir effekt verməyib. Yəni ən çətin anlarda belə komandanı pis vəziyyətdə qoyan oyunçular da görmüşük. Bu üzdən də məncə, millidə çıxış etmək xarakter məsələsidi”.