"Səbail" və MOİK üz-üzə gəldi, baş məşqçilər razı qaldı - AÇIQLAMALAR
Bu gün "Səbail"lə MOİK yoxlama oyunu çərçivəsində üz-üzə gəlib.
"Football-plus.az" xəbər verir ki, "ASCO Arena"da keçirilən oyun "dənizçilər"in qələbəsiylə yekunlaşıb - 4:3. Qolları Bayıl təmsilçisindən Rüfət Abdullazadə, Pedro Nuno, Madi Queta və Yusif Nəbiyev vurub. Ordu klubundan isə Elmir Rəhimzadə, Ramil Orucov və Sabir Allahquliyev fərqlənib.
Matçla bağlı fikirlərini, milli fasiləylə bağlı planları və cari mövsümün növbəti oyunlarından gözləntilərini öyrənmək məqsədilə hər iki komandanın baş məşqçisiylə əlaqə saxladıq.
Şahin Diniyev:
"Martın 20-də bir araya gəlmişik. Gündə bir dəfə məşq edirik. Sabah dincələndən sonra Misli premyer-liqasının 28-ci turunda "Turan Tovuz"a qarşı keçirəcəyimiz oyuna hazırlaşacağıq. Yoldaşlıq oyununa gəlincə, matç üstünlüyümüz şəraitində keçdi. Komandamın oyunundan razı qaldım. Təbii ki, bunda liqalar arasındakı fərqin də payı var. Əvəzedici heyətin üzvlərinə də şans verdik. Komandamın durumu yaxşıdı. 4-cü dövrədə daha yaxşı çıxış edib uğurlu nəticələr qazanmağa köklənəcəyik".
Qəzənfər Abbasov:
"3-cü dövrəyə çox ciddi hazırlaşırıq. Məqsədimiz çempion olmaqdı. Bizi çətin 9 oyun gözləyir. Hədəfə çatmaq üçün bütün gücümüzlə mübarizə aparıb hər oyunda qələbə qazanmalıyıq. Çünki ilk "üçlük"də xal fərqi, demək olar ki, yoxdu. Yoxlama oyunu istədiyim kimi alındı. Çox yaxşı başlasaq da, əvəzetmələrdən sonra çətinlik çəkdik. Buna baxmayaraq, futbolçularımdan razıyam. "Səbail" kimi təzyiq göstərən kollektivə qarşı yaxşı mübarizə apardılar. Mənə elə bunun alınıb-alınmayacağı vacib idi. Sağ olsun "Səbail", təklifimizi qəbul edib bizə qarşı meydana çıxdı. Başqa yoxlama oyunu nəzərdə tutulmayıb. Bundan sonra martın 29-da keçiriləcək "Zaqatala"yla oyuna hazırlaşacağıq. Hər şey yaxşıdı. 1-ci liqanın qalibi olacağımıza inanırıq".
KƏNAN BAHADIR
Digər xəbərlər
