“FİFA series – Edition 2024” layihəsində mübarizə aparacaq millimiz martın 18-dən 25-dək təlim-məşq toplanışı keçəcək.

Əvvəl toplanışa dəvət alan futbolçuların siyahısına nəzər salaq: Şahruddin Məhəmmədəliyev (“Adana Dəmirspor”, Türkiyə), Səlahət Ağayev (Səbail), Aleksey İsayev, Bəhlul Mustafazadə, Elvin Cəfərquliyev, Toral Bayramov, Bədavi Hüseynov (hamısı “Qarabağ”), Amin Seydiyev, Elvin Camalov (hər ikisi “Sabah”), Coşqun Diniyev (“Ümraniyəspor”, Türkiyə), Eddi İsrafilov, Rza Cəfərov, Filip Ozobiç, Emin Mahmudov (hamısı “Neftçi”), Musa Qurbanlı (“Yurqorden” İsveç), Ozancan Kökçü (“Eyndhoven”, Niderland), Ceyhun Nuriyev, Qismət Alıyev (hər ikisi “Zirə”), Rahil Məmmədov (LKS, Polşa), Ramil Şeydayev (“Kocaelispor”, Türkiyə), Renat Dadaşov (“Hatayspor”, Türkiyə), Bəxtiyar Həsənalızadə (“Tuzlaspor”, Türkiyə), Vüsal İsgəndərli (“Boluspor”, Türkiyə), Emil Mustafayev (“Polesye”, Ukrayna).

Ehtiyat oyunçular: Murad Xaçayev, Rövlan Muradov (hər ikisi “Sumqayıt”), Orxan Əliyev (Araz-Naxçıvan), Rüfət Abdullazadə (Səbail).

Adı çəkilən futbolçuların əksəriyyəti məxsus olduğu komandanın heyətində, demək olar ki, hər oyunda şans qazanır. Musanı fərqləndirən məqam isə İsveç çempionatında yeni mövsümün başlamamasıdı. Bununla yanaşı, hücumçu kubok oyunlarında və "Yurqorden"in U-21 komandasının heyətində meydana çıxaraq formasını itirməməyə çalışır. Emil Mustafayevin bu yöndə çatışmazlığı 21 oyunda cəmi 10 dəfə güvənilməsidi. Qısası, futbolçuların fiziki durumuyla bağlı ciddi çatışmazlıqdan söhbət getmir.

5 futbolçu ilk dəfə əsas millinin formasını geyə bilər. Bunlar Emil Mustafayev, Rüfət Abdullazadə, Orxan Əliyev, Rza Cəfərov və Ceyhun Nuriyevdi. Bəs komanda qarşıdan gələn oyunlarda nəticə və baxımlı oyun adına nə vəd edir?

Hücumçulardan Ramil, Renat və Musanın durumu o qədər də qənaətbəxş deyil. Şeydayevin "Kocaelispor"da, Qurbanlının "Yurqorden"də işləri düz getmir. Odu ki, vaxtaşırı Türkiyə və İsveç mətbuatının tənqidləriylə üzləşirlər. Renat isə "Hatayspor"da nisbətən uğurlu mövsüm keçirir. Düzdü, qol sayına görə ciddi məhsuldarlıq qeydə alınmır. Lakin hələ ki döyüşkən oyun tərzi azarkeşləri qane edir.

Müdafiəçilərə nəzər salsaq, hər şey qaydasındadı. Burda "Qarabağ" futbolçuları çoxluq təşkil edir. Qismət, Amin və Rahilin də oyununda ciddi problem müşahidə etməmişik.

Yarımmüdafiədən də arxayın ola bilərik. Hər halda, dəvətlilər vərəqəyə görə cəzalı və ya zədəli olmadıqları bütün oyunlarda meydana çıxıb, sonadək mübarizə aparıb. Burda xüsusilə legionerlər diqqəti cəlb edir. Amma Bəxtiyar istisnadı. O hələ ki istədiyi oyun formasını yaxalaya bilməyib.
"Çərçivə", çox güman, Şahruddinə əmanət ediləcək. Təcrübəli qolkiper uğursuz mövsüm keçirir. Düzü, tez-tez "Adana Dəmirspor" azarkeşlərini qəzəbləndirir. Millimizdə necə çıxış edəcəyini təxmin etmək isə çətindi.

Maraqlıdı ki, Qara Qarayev, Höccət Haqverdi (hər ikisi "Neftçi"), Yusif Nəbiyev (Səbail), Rəşad Əzizli (Qəbələ) və Rüstəm Əhmədzadə (Zirə) bu dəfə milliyə çağrılmayıb. Anton Krivotsyuk və Mahir Emrelinin heyətinə daxil edilməməsinin səbəbinə gəlincə, onlar zədəlidi.


Ümumiyyətlə, bizi maraqlı oyunlar gözləyir. Heyətdə çoxlu legioner var, elə çempionatımızın da səviyyəsi artıb ki, azalmayıb. “Qarabağ”ı çıxsaq, konkret favorit anlayışı itmək üzrədi. Yeri gəlmişkən, “Qarabağ”ın Avropa Liqasında parlaq çıxışından sonra müşahidə olunan emosional yüksəlişi yığma səviyyəsinə köçürməyin vaxtıdı. Özü də Novruz bayramı günlərində!

Bir daha xatırladaq ki, yığmamız martın 22-də Tofiq Bəhramov adına Respublika stadionunda Monqolustan, martın 25-də isə Bolqarıstan yığması ilə qarşılaşacaq.

KƏNAN BAHADIR