"Musanın atası "Qarabağ"ın əfsanəvi simasıdı, lakin özü "Yurqorden"də ilişib qalıb" - yenə tənqid olundu
İsveç mətbuatı yenidən millimizin futbolçusu Musa Qurbanlının performansına toxunub.
"Football-plus.az"ın məlumatına görə, jurnalistlər ötən ilin iyulunda "Qarabağ"dan "Yurqorden"ə transfer edilən futbolçunu ümidləri doğrultmadığına görə qınayır. Bunu deməyə ölkənin tanınmış idman yazarlarının açıqlamaları əsas verir.
Əvvəl Kasper Nordqvisti dinləyək:
"Musa Qurbanlı özünü tənqid etsə də, yerindən tərpənmir. Ondan bunun səbəbini soruşdum. Dedi ki, ümidləri doğrultmadığımı bilirəm. Amma təslim olmaq niyyətində deyiləm. Görünür, azərbaycanlı hücumçu ona inanmaqdan əl çəkmək istəməyən azarkeşləri sevindirmək istəyir".
Başqa həmkarımız Lukas Verdelinin hücumçu haqda fikirləri belədi:
"O, "Qarabağ"da çoxlu qol vururdu, sabiq komandasının bombardiri idi. Musanın atası "Qarabağ"ın əfsanəvi simasıdı. Lakin özü "Yurqorden"də ilişib qalıb. Bildiyimə görə, yeni klubunun 2024-cü il üçün planlarının bir hissəsi deyil. "Göteborq"un israrla futbolçunu almaq istəyi vəziyyəti daha da qəlizləşdirir".
İsveçin "fotbolldirekt.se" nəşri isə futbolçunun satılmayacağını, sadəcə, bir mövsümlük "Göteborq"a icarəyə veriləcəyini yazır.
Qeyd edək ki, "Yurqorden" Musayla 3 illik müqavilə imzalayıb. 21 yaşlı hücumçu yeni komandasının heyətində 19 rəsmi oyuna çıxıb. Hesabında 3 qol, 1 məhsuldar ötürmə var.
KƏNAN BAHADIR
Digər xəbərlər
