“Palmeyras” ilə klubun stadionunda inşaat işləri aparan şirkət arasında ciddi narazılıq yaranıb. San Paulu klubu “WTorre” inşaat şirkətinin tərkib hissəsi olan “Real Arenas”dan təxminən 160 milyon real (təxminən 30 milyon avro) tələb edir.

"Football-plus.az" xəbər verir ki, “WTorre” 2014-cü ildə istifadəyə verilən “Alyans Park”ı inşa edib, “Real Arenas” isə stadiondakı xidmət sahələrinə cavabdehdi. Müqavilənin şərtlərinə əsasən, stadionun ərazisi 30 il ərzində inşaat şirkətinə məxsus olacaq, klub isə oyunlara bilet satışı, həmçinin digər tədbirlərdən – konsertlərin təşkili, mağazalar, qəlyanaltı və parklanma xidmətlərinin fəaliyyətindən əldə edilən gəlirlərin hamısına sahiblik hüququna malikdi. “Palmeyras” rəhbərliyi şirkətin 2015-ci ildən başlayaraq bu sahələr üzrə ödənişləri lazımi qaydada ödəmədiyini iddia edir, “WTorre” isə tələb olunan məbləğin yanlış hesablandığını bildirir. San Paulu klubunu məhkəməyə üz tutmağa vadar edən digər səbəb stadiondakı xidmətin keyfiyyətsiz olmasıdı. Belə ki, qazonun keyfiyyəti klubda ciddi narazılıq doğurub. Qeyd edək ki, “WTorre” son həftələr “Alyans Park”ın ot örtüyünü dəyişməklə məşğuldu. Bu işlərin fevralın 20-də sona çatması nəzərdə tutulmuşdu. “Palmeyras” rəhbərliyi işlər başa çatandan sonra qazonun keyfiyyətini yoxlamaqda qərarlıdı. Bu məsələ ilə bağlı San Paulu ştatının Futbol Federasiyasının komissiyası da mövqeyini bildirməlidi.

Məlum səbəbdən komanda ştat çempionatının üç ev oyununu təxminən 31 min yerlik “Arena Barueri”də keçirməli olacaq. Artıq “İtuano” və “Korintians” ilə matçlar bu arenada baş tutub. “Mirassol”a qarşı oyun isə fevralın 24-nə təyin olunub. Maraq üçün “Alyans Park”ın 43 mindən artıq tamaşaçı tutumuna malik olduğunu da bildirək.