"Misli" premyer-liqanın sponsoru olmaqla yanaşı, artıq 2-ci mövsümdü ən etibarlı tərəfdaşımızdı. Bu mövsümün əvvəlində qarşılıqlı şəkildə bir neçə təklif-layihə hazırlanmışdı. Onların biri də bu tədbirlə bağlı idi. Əslində bu təşəbbüs daha erkən reallaşmalıydı. Amma sonda bu oyuna qərar verildi. Oyunun seçimi də PFL-in istəyi idi. Etiraf edək ki, bu, xüsusən matçdan öncə riskli addım görünürdü. Çünki az qala hər kəsin rəqibi aşkar şəkildə favorit gördüyü oyunda bu addımı atmaq bir qədər də cəsarət tələb edirdi. Doğrudu, bu barədə onlarla danışmamışıq, amma əminəm ki, başında kim olur-olsun, heç bir şirkət rəsmisi təşkilatçısı, tərəfdaşı olduğu tədbirin üzgün notda bitməsini arzulamaz. Biz də bunu gözəl anlayırdıq. Amma təcrübəmiz və təbii ki, "Qarabağ"a, həmişə olduğu kimi, Qurban Qurbanovun futbol savadına güvənimiz bizi yanıltmadı. Qonaqlar arasında “Azərlotereya” ASC, AFFA, PFL, premier-liqa, eləcə də 1-ci və 2-ci liqa klublarının rəsmiləri, tanınmış veteran futbolçular, media nümayəndələri, “İmarət” və “Qarabağ Ordu” fanklublarının üzvləri yer aldı. Fürsətdən istifadə edərək qəzetinizin rəhbəri Mahir Rüstəmliyə dəvətimizi qəbul edib iştirak etdiyinə görə təşəkkür edirəm. Zalda arzuladığımız, əsl tribuna ab-havası yaranmışdı. Qol sevinci, epizodlara üzüntülər, hakim qərarlarına reaksiyalar, 44-cü dəqiqədə "Şəhidlər ölməz, vətən bölünməz" şüarı, fasilədə qonaqların maraqlı təhlilləri və sonda qələbə təbrikləri... Hər şey var idi. Sosial şəbəkələrdə paylaşımlardan, yazılardan hamının razı qaldığı görünürdü. PFL kollektivi olaraq, həddən artıq enerji sərf etdik. Sevinirik ki, əziyyətimiz boşuna getmədi. Düzü, indidən sırf belə təşəbbüslə bağlı vəd vermək istəmirik. Amma layihələrimiz davam edəcək".