Andradenin ailəsi də oyunu izləməyə gələcək - oyuna 7 saat qaldı!
Bu gün Azərbaycanın futbol ictimaiyyəti üçün özəl gündü. Bilirik ki, “Qarabağ” Avropa Liqasının pley-off mərhələsində Portuqaliyada “Braqa” ilə qarşılaşacaq. Komandamızı səfərdə “İmarət Avropa” azarkeş qrupunun dəstəkləyəcəyini də xəbər vermişdik.
Bu arada “Qarabağ”ın iki futbolçusu Portuqaliya mətbuatına danışıb. Sizi öncə uol.com saytına açıqlama verən Julio Romaonun fikirləriylə tanış edirik:
“Bu nəhənglərin sırasında olmağımız onu göstərir ki, işimiz yaxşı gedir. “Qarabağ” son illər Azərbaycanda əla çıxış edir və bu, bizə daha böyük xəyallar qurmağa imkan verir. Hamını təəccübləndirmək üçün böyük şansımız var, amma təvazökar qalmalı və “Braqa”ya qarşı güclü olmalıyıq”.
İndi isə abola.pt portalına müsahibə verən Leandro Andradeni dinləyək:
“Braqa”ya rəqib olandan sonra haqqında ən çox danışdığım futbolçulardan biri Joao Moutinyudu. Onunla qarşılaşmaq üçün həyəcanlanıram. Hər ikimiz Alqarvedənik. Moutinyunun atası mənim atamın məşqçisi olub. Joaoya xüsusi məhəbbətim var, onun pərəstişkarıyam. Onun oyununu izləyərək böyümüşəm. Bu, heç vaxt unuda bilməyəcəyim təcrübədi. Yenidən evdə oynayacağım üçün çox həyəcanlıyam. Portuqaliyada oynamış həmkarlarım “Braqa” və ya “Benfika” ilə üzləşməyimizi istəyirdi. Çünki bunlar əla komandalardı. Həmin oyunçular da ölkəmizi sevir. Ailəmlə danışmışam, onlar səfər oyunumuzda stadionda olacaq. Möhtəşəm gecə keçirmək, futbolun sehrindən həzz almaq, ailəm və dostlarım qarşısında canlı oynamaq üçün lazım olan hər şey var. Belə hal tez-tez yaşanmır. Mərhələni adlayacağımıza inanırıq. Kim olmağımızdan və hansı turnirdə iştirak etməyimizdən asılı olmayaraq, özümüzə və dəyərimizə güvənirik. Hər şeyini ortaya qoyacaq və hər iki matçda qələbə üçün mübarizə aparacaq “Qarabağ”a söz verə bilərik. Rəqibi təhlil edir, haqqında məlumat öyrənirik. Onların üstün cəhətlərindən xəbərdarıq”.
Andrade qış fasiləsində “Qalatasaray”, “Şanxay Şenxua” və Rusiya klublarından təkliflər aldığını da deyib:
“Bəli, belə variantlar var idi. “Qarabağ”ın məni saxlamaq üçün mübarizə aparması özümü burada vacib hiss etməyimə səbəb oldu. Danışıqlar uğurlu nəticələnmədi və burda qaldım. "Transfer nağılı” başa çatandan sonra müqavilə müddətimi 2027-ci ilə qədər yenilədim”.
“Braqa”nın futbolçusu Rikardo Ortanın oyunla bağlı düşüncələri də diqqət çəkir:
“Qarabağ” fərqli komandadı. Hər oyunun öz tarixçəsi var. İndi üzərimizə düşən “Sportinq”lə matçdakı səhvlərdən nəticə çıxarmaq və “Qarabağ”la görüşə köklənməkdi. Rəqibi təhlil edirik. Cavab qarşılaşmasına sərfəli nəticə ilə yollanmaq istəyirik. Əmin olun ki, ab-hava qeyri-adi olacaq”.
Maraq üçün qeyd edək ki, məşhur “Transfermarkt” portalında Ortanın qiyməti 20 milyon avro göstərilir, bu, “Qarabağ”ın ümumi dəyərindən (14 milyon 730 min avro) çoxdu. Bundan başqa, “A Bola” nəşri “Braqa”nın psixoloji bərpasının vacibliyindən yazıb:
“Braqa” ölkə çempionatının son turunda “Sportinq”ə məğlubiyyətdən (0:5) sonra "Qarabağ"la Avropa Liqasının pley-off mərhələsinin ilk oyunu üçün bu fəlakəti arxada qoymalıdı. Görünür, baş məşqçi və komanda diqqətləri Avropa Liqasına yönəltməkdə maraqlıdı. “Qarabağ”la oyuna qədər “Braqa”nın bütün futbolçularının psixoloji durumu düzəlməlidi”.
KƏNAN BAHADIR
