Vüsal İsgəndərlini Avropanın qərbinə doğru göndərmişdik.

Düşünürdük ki, “köhnə qitə”nin aparıcı klublarının diqqətini Albaniyadan çəkmək daha asan olar, nəinki Azərbaycandan. “Eqnatiya”da həmyerlimizin oyunu heç də pis alınmırdı. Bir də gördük ki, Vüsal üzünü qərbi Avropanın yox, Azərbaycanın sərhədlərinə doğru çevirib. Artıq İsgəndərli “Boluspor”un futbolçusudu. Hətta yeni komandasının heyətində debüt etməyə də macal tapıb. Vüsalın 82 dəqiqə meydanda olduğu görüşdə “Boluspor” “Adanaspor”la 1:1 hesablı bərabərliyə razılaşıb. 23 xalla 10-cu pillədə yer alan Bolu təmsilçisinin bundan sonra böyük irəliləyişə nail olması, superliqaya vəsiqə qazanmaq şansı möcüzəyə bərabərdi. Lap bu reallaşsa belə, elitada mübarizə aparacaq komandanda azərbaycanlı futbolçuya yer tapılıb-tapılmayacağı mübahisəli məsələdi.

Görünən odu ki, Vüsal özü də taleyi ilə barışıb, bundan sonra hansısa böyük hədəflər uğrunda yox, şəxsi büdcəsini mümkün qədər çox artırmaq və evə yaxın olmaq haqda düşünür. Sözsüz, Albaniyadan Azərbaycana gəlib-getmək Türkiyədən Bakıya səfər etmək qədər asan ola bilməz. Türkiyədə yaşayıb, futbol oynayan futbolçunun bir ayağı elə Bakıda sayılmalıdı. Bütün bunları nəzərə alan Vüsal da üzünü Avropanın qərbinə yox, Türkiyəyə doğru çevirdi, canına çox da əziyyət vermək istəmədi. Hazırda davam edən mövsümün qalan hissəsini bu cür yola verəcək. Ondan sonrası da Allah kərimdi. Həmişəki ssenarini izləyib, Vüsalın Azərbaycan çempionatında oynayan klubların birinin rəhbəri ilə əl sıxışıb, əlində forma tutan şəklini görəcəyik. Vəssalam, bununla da daha bir azərbaycanlı futbolçunun legioner həyatı yaşaması ilə bağlı arzularımız yarımçıq qalacaq. Necə ki, indiyə qədər bu yolun yolçusu olan çox futbolçumuzu görmüşük. İllərdi desək də, yazsaq da, dəyişən nəsə olmur. Bakı küləyi, o küləyin özüylə daşıdığı kabab qoxusu bizimkilərin uzaq sahillərdə uzun müddət yubanmasına imkan vermir.

Vüsalı, yaxud da başqalarını qınamağa adamın çox da dili gəlmir. Düşünürük ki, bizimkilərin psixologiyası, dünyaya və futbola baxışları belədi. Amma biz Ramil Şeydayevlə Emin Mahmudova daha çox ümid bəsləyirdik. Məşhur bir məsəldə deyildiyi kimi, onlar da Azərbaycana gələndən sonra dönüb bizimkilər kimi oldular. Necə deyərlər, otun kökü özünü göstərdi. Emin Mahmudovla bağlı məsələ hamımıza aydındı. Ötən mövsümü yüksək səviyyədə keçirən Mahmudov yayda qiymətini bir qədər artırıb, “Neftçi”ylə yeni müqaviləyə imza atdı. Sanki bununla da bütün arzular, iddialar bitdi. Ötən il inamlı görünən, bütün komandanı arxasınca aparan, liderlik qabiliyyətini göstərən Eminin yerində yeni mövsümdən susqun, gününü yola verən, meydanda zaman keçirən bir obraz yaranıb. Təsadüfi deyil ki, “Neftçi”nin oyunlarının birində fanat qruplardan birinin üzvləri onun liderlik qabiliyyətini şübhə altına salan pankart da qaldırmışdılar. Hiss olunurdu ki, Mahmudovdan rumıniyalı çalışdırıcı Adrian Mutu da narazıdı. Xüsusilə də Eminin cəza səbəbindən oynamadığı “Səbail”lə qarşılaşmadan sonra Mutunun Eminlə münasibətində dərin çatlar yaranmışdı. Emin sosial şəbəkə hesablarında övladlarının şəklini paylaşır, bununla da onun üçün nəyin vacib olduğuna şüuraltı mesajlar verirdi. “Neftçi”nin Respublika stadionunda “Qarabağ”a məğlub olduğu oyunun gedişində Emini əvəzləyən Mutu da bu hərəkətiylə kapitana “cavab atəşi açırdı”. Yəni ki, ay azarkeşlər, buyurun, baxın, kapitan zəif oynayır, komandaya kömək edə bilmir. Yerində saymağın, inkişaf can atmamağın “mükafatı”, yəqin ki, elə bu cür də olur.
Ramil Şeydayevlə bağlı vəziyyət də elə adını çəkdiyim futbolçuların başına gələnlərlə oxşardı. “Zenit”in yetirməsindən zamanında çox şey gözləyirdik. Təəssüf ki, Ramil bu arzuların heç birini doğrultmadı. Taylanda yollanmaqla bizi də, azarkeşləri də məyus etdi. Görünən odu ki, Şeydayevin yaxşı çıxış etməsi, qolları sıralaması üçün onun başının üstündə Qurban Qurbanov kimi çalışdırıcı olmalıdı. Tayların təklif etdiyi milyonlardan sonra gözü qamaşan Ramil birnəfəsə bu təklifi qəbul edib, ucqar Asiya ölkəsinə yollanmışdı. Həmin ərəfədə verdiyi müsahibələrin birində fəxrlə vurğulayırdı ki, yaşayacağı şəhərdə yeni məscid tapıb, bununla da əsas tapşırığın yarısının öhdəsindən gəlib. Deyəsən, Taylanddakı məscid Ramilin ürəyincə olmayıb. Son günlər gündəmin əsas xəbərində qeyd olunur ki, Şeydayev “Buriram Yunayted”i “Kocaelispor”a dəyişir. Türkiyə klubunun prezidenti müqavilənin müddətini də, Ramilin onlara nə vaxt qoşulacağını da dəqiqliyi ilə söyləyir. Şeydayev üzünü Avropaya yox, Bakıya doğru çevirənlərdəndi. Daha dəqiqini desək, Ramilin istiqaməti bu yaxınlarda Bakıdakı “Ağ şəhər”dən aldığı lüks mənzilə tərəfdi.

Əlimizdən nə gəlir ki? Bizə qalan onlara xoş istirahət arzulamaqdı. Qoy keflərini çəksinlər...

AMAL