Futbol üzrə ölkə çempionatı o qədər populyar olmasa da, məşhur oyunçuları müntəzəm burda görürük.

Məşhur oyunçulardan danışarkən Rusiya, Türkiyə, Gürcüstan və digər postsovet məkanı ölkələrində tanınan oyunçuları nəzərdə tutmuram. Söhbət ulduz Maykl Essyendən, top-liqalarda çıxış etmiş Emil Mpenza, Aleksandr İaşvili, Keysuke Hondadan gedir. Nə qədər qəribə olsa da, bu məşhur “4-lüy”ü bir məqam birləşdirir: onların heç biri Azərbaycanda parlaya bilmədi. Həmçinin komandalarına da gözlənilən faydanı vermədilər. Nəticədə suyu süzülə-süzülə ölkəmizdən çıxıb getdilər. Adı çəkilənlərin, əsasən də Essyenlə Mpenzanın bizə yeganə faydası o oldu ki, Azərbaycan çempionatında çıxış etməklə tarixə düşdülər. Bu hal az da olsa, çempionatımızın reklamı baxımından faydalı oldu. Hazırda top-liqa təcrübəsi olan İshak Belfodil ölkəmizdə çıxış edir. O, Fransa və Almaniyanın elitasında çıxış etməklə yanaşı, Əlcəzair millisinin də şərəfini qoruyub. 31 yaşlı forvard “Sabah”a böyük ümidlərlə, Kaşukla Mikelsin yoxluğunu unutdurmaq üçün transfer olunsa da, hələlik gözləntiləri doğrultmur. Söz yox, Belfodil “Sabah”a hansısa top-liqa təmsilçisindən yox, Qətərin “Əl-Qəfər”indən gəlib. Bununla bərabər o, həm əvvəlki formasından uzaq, həm də zədəli idi. Zatən heç kim məşhur futbolçunun dərhal məharətini göstərəcəyini, möhtəşəm oyun sərgiləyəcəyini, fantastik qollar vuracağını, kreativ ötürmələr verəcəyini gözləmirdi. Amma Belfodil həm yaşına, həm də top-liqa təcrübəsinə görə meydanda başqalarından fərqlənməliydi. Yola saldığımız çempionatın ilk pərdəsində nəzər yetirsək, əlcəzairlinin acınacaqlı statistikasını görürük: Misli premyer-liqasında 7 oyunda 313 dəqiqə, ölkə kubokunda isə cəmi 1 dəqiqə şans qazanıb. Qol hesabını açmayan Belfodil əksinə, 9-cu turda doğma meydanda “Araz-Naxçıvan”la matçın 76-cı dəqiqəsində Yusif İmanovu “məyus etməklə” rəqibi sevindirib.

Göstəricilər ürəkaçan deyil. Əlcəzairlinin zəif çıxışıyla yanaşı, Masazır təmsilçisi əsas oyun qurucusu, vitse-kapitanı Aleksey İsayevi də itirdi. Hazırda “Sabah” donanmasında ciddi böhrandı. Görəsən, klub rəhbərliyi, baş məşqçi və seleksiyaçılar zəifləmiş mövqelərə alternativlər axtarırmı? “Sabah”ın Müşahidə Şurasının üzvü və idman direktoru İqor Ponomaryov “bədbinliyə qapılmağa dəyməz” deyir. Futbolumuzun canlı əfsanəsi yeni futbolçu axtarışındadı. Murad Musayevin məşqçil bacarığını kölgə altına salmaq niyyətim yoxdu. Əksinə, rusiyalını ölkəmizə gəlib-getmiş ən savadlı əcnəbi mütəxəssislərdən biri sayıram. Amma və lakin...

Bu gün “Sabah”ın zəif çıxışı və 8-ci pillədə qərarlaşması futbolsevərləri düşündürür ki, ötən mövsüm vitse-çempion olan, “Qarabağ”a ciddi müqavimət göstərən, avrokuboklarda uğurla debüt edən, sanballı sponsorlara malik komanda necə belə acınacaqlı duruma düşdü? “Bayquşlar” yalnız 9-10-cu yerlərdə qərarlaşan “Qəbələ” ilə “Kəpəz”i qabaqlayır. Məgər bunu uğur adlandırmaq olarmı?

Klub rəhbərliyinə ünvanlanası sual çoxdu. Amma İqor Anatolyeviç kimi nikbin halda hadisələrin axarını müşahidə edəcəm. Ümid edək ki, Belfodil Murad Musayevin və “Sabah”sevərlərin arzularını puç etməyəcək. Ən əsası əlcəzairli vaxtilə çempionatımıza təşrif buyuran Essyen, Mpenza, İaşvili və Hondanın uğursuzluq zəncirində növbəti halqaya çevrilməyəcək. Belfodildən sələflərindən fərqli şəkildə tarixə düşməsini arzulayıram. Yəni əlcəzairli çempionatın 2-ci yarısında kreativ oyun, gözəl qollar ilə həm komandasına kömək edə, həm də çempionatımıza rəng qata bilər.

ABDULLA İSMAYILOĞLU