"Asif müəllimin vəfatı futbol ictimayyəti üçüb acı, üzücü xəbərdi. Azərbaycan futbolu üçün böyük itkilərdən biri baş verdi. Asif Namazov həm futbolçu karyerası ilə, həm klub idarəçisi, həm hakim-inspektor, həm də savadı, bacarığıyla ölkə futbolu üçün çox xidməti olub. O, zərərsiz insan idi. Bacardıqca hamıya kömək göstərməyə çalışan biri olub. Asif Namazovla yaxın ünsiyyətimiz olub. Bir neçə oyuna birgə təyinat almışıq. Hakimlərimizə həmişə kömək edib. Maksimum çalışırdı ki, referilərimiz savadlansın, təcrübələnsin. Mən onunla tez-tez görüşməsəm də, vaxtaşırı telefonla danışırdıq. Həmçinin üz-üzə gələndə daim mehribanlıq içində olmuşuq. Onun ən böyük amalı bütünlükdə Azərbaycan futbolunun inkişafı idi. Asif müəllim yadımda daim yaxşı, pozitiv insan və futbolumuzun keşiyində dayanan biri kimi qalacaq. Onun vəfatına çox heyifsilənirəm. Allah rəhmət etsin, yaxınlarına səbr versin".