Kriştiano Ronaldo ilə “Yuventus” arasındakı münasibətlər gərginləşib. “Əl-Nəssr”in ulduz futbolçusu sabiq klubundan ona ödənilməyən 19,5 milyon avro maaşı tələb edir.

“Football-plus.az” xəbər verir ki, “Diario Sport”un məlumatına görə, onun bu tələbi İtaliya klubunun rəhbərliyini təəccübləndirib. Ona görə ki, turinlilər 38 yaşlı hücumçunun 2021-ci ilin yayında “Mançester Yunayted”ə gedərkən əvvəlki mövsümün maaşının yarısından imtina etdiyini düşünüblər. Amma portuqaliyalı futbolçu bunu inkar edir. Artıq vəkilləri Ronaldonun klubun ona 2020-ci il üçün 19,5 milyon avro borcu olması ilə bağlı yekun qeydlərini müvafiq komissiyaya təqdim ediblər. Hər iki tərəf yekun təqdimatlarını təqdim etdikdən sonra Arbitraj Komissiyasının aprelə təyin olunan qərarına qədər yalnız bir əlavə dinləmə keçiriləcək.