Hazırda elitada vəziyyəti ürəkaçan olmayan, burda yerini qoruya bilib-bilməyəcəyi ilə bağlı şübhələr yaranan iki komanda var. Söhbət "Qəbələ" ilə "Kəpəz"dən gedir. Qış fasiləsinə az qalıb. "Qırmızı-qaralar" da çempionatın 1-ci yarısı başa çatandan sonra Türkuyəyə - toplanışa yollanacaq.

Onsuz da klub maliyyə sıxıntısı yaşayır və ya ən azı durum ictimaiyyətə belə təqdim olunur. Bəs onda əlavə xərc çəkib yanvarın 4-16-sı aralığında Antalyada olmağın mənası nədi? Bakıda təlim-məşq toplanışı keçmək olmazdı? Bu və başqa sualları aydınlaşdırmaq üçün "Qəbələ"nin baş meneceri Nail Kərimovla söhbət etdik. 

- Klubun maliyyə problemi yaşamasına rəğmən, qış fasiləsini Türkiyədə keçirəcəksiz. Öldə daxilində toplanış keçməklə pula qənaət olmazdımı? 
- Təbii ki, ölkə xaricində toplanışın xərci yüksəkdi. Son dövrdədə tariflər artmaqdadı. Amma nə etmək olar, komandanı komplektləşdirmək üçün buna məcburuq. Ona görə də büdcəmizdən əvvəlcədən toplanış xərclərini qarşılamaq üçün ayırmalar etmişik. Ölkədə qalıb toplanış keçə bilərik, amma keyfiyyət istədiyimiz kimi olmayacaq. Həm Qəbələdə, həm də Bakıda hava şəraiti qənaətbəxş deyil. Soyuqlar komandanın məşqlərinə təsirsiz ötüşmür. Bundan başqa, burda qalsaq, yoldaşlıq oyunları üçün uyğun rəqiblərin tapılması çətin olur. Keyfiyyətli təlim-məşq keçməyi, yoldaşlıq matçları üçün rəqiblərin səviyyəsini və başqa məsələləri nəzərə alanda Türkiyədə toplanış keçməyimiz zəruridi. 

- Çempionatın ilk yarısının başa çatmasına az qalıb. Hansısa futbolçunu satıb ondan pul qazanmağı düşünürsüzmü? 
- Qışda müqavilə müddəti bitəcək futbolçularımız yoxdu. Bundan başqa, heç bir klublardan da oyunçularımıza “elçi düşən” yoxdu. 

- Hansısa futbolçuniz rəhbərliyə yaxınlaşaraq getmək istədiyini bildiribmi? 
- Getməklə bağlı heç bir futbolçu bizə müraciət etməyib. Heç belə hal da gözlənilmir. 

- "Qəbəbə" cari mövsümdə iki autsayderdən biridi. Belə bir məsəl var: "Şər deməsən, xeyir gəlməz". Yəni ən pis variant üçün də planlar qurursuzmu? Komanda aşağı liqaya yuvarlansa, dağılacaqmı? 
- Bu barədə nə düşünür, nə də planlar qururuq. Hazırda əsas məqsədimiz nəyin bahasına olur-olsun, yaxşı çıxış etmək və maksimum irəliləməkdi.

ABDULLA İSMAYILOĞLU