Klubların qış planı: beşi gedir, “Qarabağ”la “Zirə” qalır, “Neftçi” hələ düşünür
Misli premyer-liqasında 2-ci dövrənin bitməsinə üç tur qaldı. Bu o deməkdi ki, qış fasiləsi yaxınlaşır.
Belədə iştirakçı klubların fasilədən necə yararlanacağı maraq doğurur. İndiyə qədər aparıcı komandalar ölkə xaricinə yollanırdısa, ölkədə qalanlar da olurdu. Görəsən, bu dəfə vəziyyət necə olacaq? Klubların təlim-məşq toplanışı ilə bağlı planları necədi? Bir sözlə, kimlər gedir, kimlər qalır? Bu sualı mətbuat katiblərinə ünvanladıq. Amma cavablara keçməmiş onu da xüsusi vurğulayaq ki, fasilə bir aydan da az sürəcək. İlk yarıda sonuncu – 18-ci turun oyunları dekabrın 22-də keçiriləcək, yanvarın 21-də isə artıq mövsümün ikinci hissəsi start götürəcək.
Zaur Xudiyev (Sumqayıt):
"Sumqayıt” qış təlim-məşq toplanışını Antalyada keçirməyi planlaşdırır. Yanvarın 6-da səfərə çıxacağıq, 17-nə geridönüş planlaşdırılıb. Orda üç oyun keçirmək istəyirik. Oyunlar təxminən yanvarın 8-i, 12-si və 16-na nəzərdə tutulsa da, rəqiblərin adı hələ bəlli deyil".
Asəf Zeynallı (Qəbələ):
“Qəbələ” yanvarın 4-16-sı aralığında Antalyada olacaq. Rəqiblər hələ bəlli deyil".
Rəşad Məmmədov (Səbail):
“Səbail” Türkiyənin Antalya şəhərində, "Mirakl"oteldə qalacaq. Oyun günləri ilə bağlı konkret proqram hələ bəlli deyil".
Elnur Həmidov (Sabah):
“Sabah” qış təlim-məşq toplanışı üçün Türkiyənin Antalya şəhərinə yollanmağı planlaşdırır. Lakin fasilə dönəmində keçəcəyimiz toplanışla bağlı bəzi detallar hələ ki dəqiqləşməyib. Yaxın günlərdə komandamızın qış hazırlığı ilə bağlı ictimaiyyətə ətraflı məlumat veriləcək".
Süleyman Tağıyev (Turan):
"Yanvarın 3-16-sı aralığına nəzərdə tutulan təlim-məşq toplanışı Antalyada olacaq. İki və ya üç yoxlama oyunu nəzərdə tutulub. Rəqiblər hələ bilimir”.
Mahal Məmmədov (Araz-Naxçıvan):
"Toplanışımız böyük ehtimalla Bakıda - Olimpiya stadionunda olacaq. Tarixlər dəqiqləşəndən sonra məlumat veriləcək”.
Azad Mustafayev (Kəpəz):
"Biz çempionata hazırlıq dövrünü də ölkədə keçirmişdik. İmkanlar normaldı. Ona görə də “Kəpəz”in qış toplanışı ölkə daxilində olacaq".
Elmar Abdullazadə (Zirə):
“Zirə” qış təlim-məşq toplanışını Bakıda keçirəcək. Oyunların harda keçiriləcəyi ilə bağlı rəsmi məlumat yoxdu. Yaxın günlərdə məlumat verəcəyik".
Anar Hacıyev (Qarabağ):
"Qış təlim-məşq toplanışını ölkə daxilində, “Qarabağ”ın Suraxanıda yerləşən bazasında keçirəcəyik".
Emin Əfəndi (Neftçi):
"Neftçi” bu yöndə hələ yekun qərar verməyib. Qarşıdakı günlərdə məlumat olarsa, ictimaiyyətə açıqlanacaq".
GÜNAY SÜLEYMANOVA
Digər xəbərlər
