İstəsən də, istəməsən də, bu mövzuya qayıtmalı olursan.

Canni de Byazinin gedişindən sonra Azərbaycan yığmasının baş məşqçisi postu boş qalıb. Məlum məsələdi ki, yeni baş məşqçinin kimliyi AFFA-nın gələcək siyasətinin necə müəyyənləşdirilməsindən də asılı olacaq. Daha konkret desək, gələcəkdə AFFA-da söz sahibinin kim olması bu məsələnin də həllinə təsir göstərəcək. İndikilər yerində qalsa, “əcnəbi sevgisi” davam edəcək. İllərdi həmin qrupun əcnəbilərə necə böyük sevgiylə qucaq açdığına hamımız şahidik. Onlar üçün Azərbaycan futbolunun sabahı, uşaq futbolu kimi bir çox vacib məqamların heç bir əhəmiyyəti olmayıb. Şəxsi maraqlar hər şeyin önünə keçsə, milli yenidən əcnəbi mütəxəssisə tapşırılacaq. Sonrasını isə hamımız bilirik.

Nə qədər ki, millinin baş məşqçi postu boşdu, hərə öz namizədinin adını çəkir, həmin adın ətrafında təbliğat qurur. Bir növ gizli reklam aparmaqla məşğuldular. Məlum məsələdi ki, hər qrupun da bu işdə öz marağı var. Hansı tərəf bu mübarizədən qalib çıxıb, “namizədini” millinin başına keçirə bilsə, ikiqat qazancı təmin olunacaq. Birincisi həmin o əcnəbinin adına yazılacaq və valyuta ilə ödəniləcək puldan götürüləcək faizlərdi. İkincisi milliyə dəvət olunacaq futbolçuların siyahısının müəyyənləşdirilməsidi. Riad Rəfiyev illərdi bu üsulla futbolçuları “Sumqayıt”a gətirir. Onlara vəd verilir ki, “Sumqayıt”da forma geymək elə millidə oynamaq kimidi. Həm yerli, həm də əcnəbi futbolçular üçün bu təklif cəlbedicidi. Bir andaca “milli futbolçu” statusu qazanırsan, avtomatik qiymətin qalxır. Digər tərəfdən də milli üzvlərinin aldığı fantastik məbləğdə müfatlarda payın olur. Əcnəbilərin “milliləşdirilməsi” prosesi də bu üsulla sadələşir. Hansısa əcnəbiyə məhz bu bəhanə ilə Azərbaycan paspotru alırlar ki, guya onun xüsusi istedadı var, millidə oynamaqla bizə qələbə qazanmaqda yardımçı olacaq. Bütün bunlar AFFA-ya yaxın olan işbazların illərlə faydalandığı, varlandığı üsullardı. Ümid edirəm ki, bu dəfə belə olmayacaq.
Bəli, yerli məşqçilərin milli komandanı çalışdırması ətrafında da müəyyən manipulyasiyalar izləyirik. Hansısa gənc məşqçinin çalışdırdığı komanda 2-3 oyunda qələbə qazanan kimi “təbliğat maşını” işə düşür. Deyirlər ki, buyurun, Azərbaycan millisini qələbələrə daşıyacaq məşqçi elə filankəs imiş. Daha baxan yoxdu ki, həmin məşqçinin komandası hansı futbolu oynayır, oyunçu seçimi necə aparılıb. Şəxsən mən dəfələrlə demişəm, bir daha təkrarlayıram. Hazırkı məqamda Azərbaycan millisini kimin çalışdırmasının futbolumuzun gələcəyi üçün elə də böyük əhəmiyyəti yoxdu. Biz uşaq futbolunu dirçəltməli, akademiyalarla bağlı ciddi iş aparmalıyıq. Vəssalam. Bu proseslə paralel millidə də yalnız və yalnız sırf azərbaycanlı futbolçular, milli formanı geyməyə layiq olanlar oynamalıdı. Amma nəticələrə ciddi önəm vermədən, udanda pafos axınına qapılıb, uduzanda həmin baş məşqçinin istefasını tələb etmədən.

Hansısa gizli bir əl ciddi-cəhdlə Azərbaycan millisinin başına türkiyəli mütəxəssisin gəlməsi barədə təbliğat aparır. Fatih Terimin də adı çəkilir, Şenol Günəşin də. Hətta nisbətən gənc olan İlhan Paluta xilaskar gözüylə baxanlar da var. Yapmayın, əfəndilər. Bülənt Korkmazı, Mustafa Dənizlini unutmusuzmu? Rusdilli mətbuatda isə tez-tez Stanislav Çerçesovun adına rast gəlirik. İş o yerə gəlib çatıb ki, bu prosesə ruslara, Rusiya futboluna sevgisini heç vaxt gizlətməyən Kazbek Tuayevi də qoşublar. Azərbaycanda və azərbaycanlılara daim yuxarıdan aşağı baxan Kazbek Əliyeviçdən başqa mövqe gözləmək də ağılsızlıq olardı. Həmin təbliğatı aparanların yaxasından tutasan, deyəsən ki, fikrinizi əsaslandırın, dilləri topuq vuracaq. “Qarabağ”ın qarşısında aciz qalan “Ferentsvaroş”un baş məşqçisindən söhbət gedir. Onlar deməsə də, biz bilirik ki, bu yay Çerçesovu Macarıstan klubundan Çempionlar Liqasındakı fiaskoya görə qovublar. Maraqlı məqamlardan biri də odu ki, 2009-cu ildə də Çerçesovun adını Azərbaycan millisi ilə yanaşı çəkir, onu Bakıya “dartmağa” çalışırdılar. Deməli, həmin qüvvələr yenidən fəallaşıb.

Olmayacaq, bəylər. Bu dəfə olmayacaq! Azərbaycan millisini şəxsi biznesinizə çevirdiyiniz, futbolumuzun başına oyun açdığınız yetər. Yığışdırın özününü, Azərbaycan millisi sizin üçün eksperiment meydanı deyil!

AMAL