"Səmimi etiraf edim ki, çempionatın bu qədər maraqlı və gərgin keçəcəyini gözləmirdim. 2-ci liqada çempionluğa 6-7 komandanın iddia etməsi məni həm sevindirdi, həm də təəccübləndirdi. Çünki rəqabətli turnir gözləmirdim. Çıxışımıza gəlincə, ümumi götürəndə pis keçmədi. Komanda, demək olar, yenidən qurulub. Heyətimiz əsasən gənclərdən ibarətdi. Bizdə həm çimərlik, həm də minifutbol turnirlərində çıxış edən futbolçular yoxdu. Onları da qınamıram, indiki dövrdə hər bir kəs ailəsinin daha yaxşı yaşamasını istəyir. Ona görə də bir neçə komandada oynamaq məcburiyyətindədi. Sadəcə, bu bizim strategiyamıza uyğun gəlmədiyindən elə futbolçulara ehtiyac duymur, daha çox gənclərə üstünlük veririk. Biz əksər komandalar kimi həftədə 2-3 dəfə yox, hər gün məşq edirik. Məqsədimz həm peşəkarlaşmaq, həm də ölkəmizə futbolçu qazandırmaqdı. 13 oyuna 10 qələbə, 3 məğlubiyyətimiz var. Məğlubiyyətlərdən biri texniki xarakterlidi. Protokol qaydalarında səhvə yol vermişdik. Digər iki oyunda məğlubiyyətimiz isə sırf təcrübəsizlikdən dolayı idi. Buraxdığımız qolların az qala hamısı standart vəziyyətdəndi. Bu sahədə hələ çox çatışmazlıqlar var. Amma ümumilikdə komandam pis təsir bağışlamır. Hücumda daha yaxşı çıxış edirik. İlk dövrədə sərgilədiyimiz oyundan və nəticədən razıyam".

"Təbii ki, güclənməyə ehtiyacımız var. Heyətimizə ən azı üç təcrübəli futbolçu qatmaq istəyirik. Amma təcrübəli oyunçu, yuxarıda qeyd etdiyim kimi, başqa turnirlərdə çıxış etməməlidi, yalnız bizdə oynamalıdı. Hazırda da belə futbolçu tapmaq çətindi. Bizə yalnız meydanda yox, həm də məşqlərdə gənclərin örnək götürənə biləcəyi faydalı təcrübəlilər lazımdı. Çempionluğ məsələsində gəlincə, hələlik bu barədə danışmaq çox tezdi. Çünki 1-ci dövrdə komandalar heç də bütün gücünü ortaya qoymadı. Əsas gərginlik, həyəcan 2-ci dövrədə olacaq. Məhz çempionatın 2-ci dövrəsindəki bir neçə turdan sonra çempionluq mübarizəsində estefeti kimdə olacağı bilinəcək".