Belə məlum olur ki, Lionel Messi 2020-ci ilin avqustunda Pep Qvardiolaya qovuşmaq üçün “Mançester Siti”yə keçmək istəyib.

Ancaq baş məşqçi argentinalının arzusunu gerçəkləşdirmək fikrində olmayıb. Futbol ictimaiyyəti bu məsələdən Marti Perarnaunun yazdığı, 2024-cü ilin martında satışa çıxacaq “Allahım, Pepi qoru” kitabında yer alan bir parça vasitəsi ilə xəbər tutub.
Leo çoxdan “Barselona” rəhbərliyindən narazı idi, ancaq 2020-ci ildə onun məyusluğu son həddə çatdı. Argentinalı ulduz dostu Serxio Aqueroya müraciət etdi ki, o, “Mançester Siti”yə keçidinin mümkün olub-olmadığını öyrənsin. Serxio bu məsələni klub rəhbərliyi ilə müzakirə etdi, ertəsi gün isə Qvardiola Messidən mesaj aldı. Tezliklə Lionellə Pep Barselonada görüşdülər. “Barsa”nın ulduz hücumçusu “şəhərlilər”in baş məşqçisinə kataloniyalıların o vaxtkı prezidenti Xosep Bartomeu ilə bağlı narazılığını çatdırandan sonra bu sözləri əlavə etdi: “Mən, sadəcə, bu münasibətləri qırmaq istəyirəm”.
Ardından köhnə tanışlar arasında belə dialoq baş tutdu:

- Mançesterdə biz çox inadkarcasına, yorulmadan məşq edirik...
- Mən də yorulmadan məşq edəcəm, narahat olmağa dəyməz.
- Mən uzun taktiki məşğələlər keçirəm. Sənə maraqsız ola bilər.
- Nə tələb edirsiz-edin, hər şeyə dözəcəm.
- Leo, biz artıq böyümüşük... Bəlkə də bir daha bir-birimizə dözə bilmərik.
Nəticədə Messi “Barsa”da qaldı, ancaq yalnız bir mövsüm üçün. Növbəti yay Kataloniya klubu əfsanəvi oyunçu ilə müqavilənin müddətini uzatmadı, o isə PSJ-yə keçərək “blauqrana”dan olan köhnə tanışı Neymarla çiyin-çiyinə iki il çalışdı...