İllər öncə söhbətləşdiyim azərbaycanlı mütəxəssislərdən biri belə deyirdi ki, AFFA-nın əcnəbi mütəxəssislərə sevgisi heç də səbəbsiz deyil. AFFA rəhbərliyi milli komandaların “sükanı arxasına” əcnəbi çalışdırıcıları gətirməklə ciddi iş gördüklərinin, futbolumuzun inkişafına çalışdıqlarının imitasiyasını edirlər. Yəni ki ölkə rəhbərliyinə hesabatı belə təqdim edirlər. Deyirlər ki, tanınmış almaniyalı mütəxəssis Berti Foqtsu Azərbaycan millisinə baş məşqçi təyin etmişik. İndi bütün Avropanın diqqəti bizdədi, onun rəhbərliyi altında inkişaf edəcəyik, böyük qələbələr qazanacağıq. Sonra Foqts yola salınanda, onun yerinə Xorvatiya millisindəki oyunu ilə tanınmış, məşqçi kimi elə də böyük uğurları olmayan Robert Prosineçki gətirildi. Robi estafeti həmyerlisi Nikola Yurçeviçə verdi. Qısa müddətdə milli Qurban Qurbanova tapşırıldı. Sonra yenə də əcnəbilərə sıra gəldi. Uzun müddətdi ki, italiyalı Canni de Byazi millimizdə söz sahibidi.

Bəli, De Byazini “yuxarılar”a təqdim etmək üçün bər-bəzək tapmaq elə də çətin deyildi. Adam italiyalıdı, Albaniya millisi onun rəhbərliyi altında Avropa çempionatının final mərhələsinə vəsiqə qazanıb. Bəh-bəh. Xoşbəxt olmaq üçün bundan artıq nə lazımdı?! Əsl biz axtardığımız məşqçidi. Daha soruşan olmadı ki, əvvəlki əcnəbi çalışdırıcılar sizə nə qazandırdı? Gəlmələr Azərbaycan futboluna nə verdilər, hansı böyük qələbələri qazandıq? İtaliyalıın Bakıya gəldiyi ilk günləri yaxşı xatırlayıram. Tərifdən qulaq tutulurdu. Hər gün De Byazi ilə bağlı xəbərlər yayılırdı, onun şəhərə gəzintiyə çıxması, dənizkənarı bulvarda hava udması belə hadisəyə çevrilirdi. İddia olunurdu ki, yeni çalışdırıcı ilin böyük hissəsini Bakıda keçirməyə söz verib. Bakıya lövbər salacaq, Azərbaycanda yeni istedadların axtarışına başlayacaqdı. Milli komandamız onun rəhbərliyi altında yeni mərhələyə çıxacaqdı. Adamın yadında bu yerdə Ali Baş Komandan, Prezident İlham Əliyevin dilindən eşidib sevdiyimiz kəlmə düşür: nooldu, Paşinyan?!

Ümid edirəm ki, nə vaxtsa cənab prezident üzünü AFFA rəhbərliyinə tərəf də tutacaq, onlardan da itirilən illərin, xərclənən milyonların hesabatını soruşacaq. Nooldu, ay AFFA-nın başbilənləri? Hara yoxa çıxmısız, ay Elxan Məmmədov? Siz niyə susurduz, Vaqif Sadıqov, İsgəndər Cavadov, Kazbek Tuayev və başqaları... Siyahını o qədər uzatmaq olar ki. Futbolumuzun uçuruma sürükləndiyini görənlər və buna göz yumanlar hamısı AFFA-nın cinayət ortaqlarıdı. İndi Sərxan Hacıyevi meydanda tək qoyub, hərə bir tərəfdə gizlənib. Bu cavan oğlan da təkbaşına neynəyə bilər? Meydanı boş görən De Byazi də artıq hikkəsini gizlətmir, həm mətbuat nümayəndələrinə, həm də ümumilikdə Azərbaycan futboluna, onun azarkeşlərinə istədiyi hörmətsizliyi edir. Tallindəki oyunsonrası mətbuat konfransındakı təkəbbürünün davamını Avstriya ilə qarşılaşmanın ardından “CBC Sport” telekanalının əməkdaşlarına göstərdi. Artıq nə etdiyinin fərqinə varmayan italiyalı telekanalın xanım əməkdaşının suallarının bitməsini gözləmədən, tərcüməçisi onun cavabını səsləndirərkən üzünü çevirib getdi. Heç sağollaşmağı da lazım bilmədi. Nə xanım müxbir, nə də ekrandan onu izləyən yüzminlərlə tamaşaçı ilə.
Ola bilsin, AFFA-nın təbliğat maşını rolunu oynayan, bir vaxtlar elə De Byazinin tərifini göylərə qaldıran, onu futbolumuzun xilaskarı kimi təqdim edən “CBC Sport” bunu normal qəbul edir. Bəlkə də De Byazi özü də nələrinsə fərqindədi və məqsədli şəkildi telekanala, onun əməkdaşlarına münasibətdə belə hörmətsizliyi rəva görür. Öz işləridi. Amma ekran qarşısında əyləşən, millinin doğma meydandakı növbəti məğlubiyyətinə üzülən azərbaycanlı futbolsevərlər bu cür hörmətsizliyə layiq deyil. Canni De Byazi kim olur-olsun, bizlə belə rəftar etməyə ixtiyarı yoxdu. Üzümü AFFA-ya da tuturam, qurumun mətbuat xidmətinə də. Lap elə “CBC Sport” telekanalına da. Bu adama etdiyi səhvi başa salın, davranışına, dediklərinə diqqət yetirsin. Bizim ona heç bir borcumuz yoxdu. Əksinə, De Byazinin bizə borcu var. Ümid edirəm ki, budəfəki müqaviləsi sonuncu olacaq, onu bir daha millinin “sükanı arxasında” saxlamayacaqlar.

Onun boş-boş danışıqlarından, uydurduğu nağıllardan artıq iyrənirik. Özünə hörmət edən mütəxəssis bu qədər yalançı, qeyri-səmimi ola bilərmi? Yetər artıq. Bizim millini bertilərə, robilərə, conilərə, cannilərə əmanət edib, qanımızı qaralatmayın. Əcnəbi heyranlığınıza da, “yuxarılar”ı da, azarkeşləri də aldatmaq üçün hoqqa çıxarmağa da son qoyun. Bezmişik!

AMAL