Son günlər hər bir azərbaycanlı başını dik tutur, ayağını torpağın üzərinə qürurla basır, illərlə düşmən tapdağına olan vətən torpaqlarının azad olunmasının sevincini yaşayırıq.

Nə xoş bizə ki, döyüş meydanlarında qazanılan zəfərin davamını başqa sahələrdə də gətirməyi bacarırıq. Milyonlarla azərbaycanlı bu hisslərin verdiyi qürurdan ləzzət alır. Avropanın yaşıl meydanlarında adından söz etdirən “Qarabağ” da yoluna davam edir. Özü də Qarabağda qazanılan zəfərlər, ordumuzun qazandığı parlaq qələbələr Qurban Qurbanovun və onun yetirmələrinin gücünə güc qatıb, “köhlən atlar” hədəfə doğru ikiqar sürətlə irəliləyir.

Söz vaxtına çəkər. Dörd il əvvəl Lüksemburqda elə Avropa Liqasının qrup mərhələsi çərçivəsində keçirilən “F91 Düdelanj” – “Qarabağ” oyununda növbəti erməni təxribatı ilə üz-üzə qalmışdıq. Görüşün 30-cu dəqiqəsində, təmsilçimiz 2:0 hesabıyla öndə olarkən stadionun üzərində dronla qondarma rejimin bayrağı qaldırılmışdı. “Qarabağ”ın bu təxribata cavabı artıqlamasıyla oldu. Lüksemburqun idman nazirinin üzrxahlığından sonra meydana dönən futbolçularımız bizi 4:1 hesablı qələbəylə sevindirdi. Düşmənlərimizə isə bu qələbənin üzüntüsünü yaşamaq qaldı. Onlar gördülər ki, belə təxribatlar nəinki “Qarabağ”ı zəiflədir, gücdən salır, əksinə, Azərbaycan təmsilçisi qəzəbini gücə çevirir, daha yaxşı oynamağa başlayır. Ardıcıl 10 ildi avrokubokların qrup mərhələsinə yüksələn, “köhnə qitə”nin fərqli stadionlarında Azərbaycanı, eləcə də adını daşıdığı müqəddəs torpaqlarımızı qürurla təmsil edən “köhlən atlar” missiyasını uğurla davam etdirir.

Budəfəki hədəfimiz daha böyükdü. “Qarabağ” da həmin hədəfə doğru addım-addım irəliləyir. İndiyə qədər bir neçə dəfə “köhlən atlar”ın Avropa Liqasında qrupdan çıxmaq, pley-off mərhələsinə yüksəlmək şansı olub. Gah hakimlərin kobud səhvləri, bizə qarşı qərəzi önümüzü kəsib, gah da həlledici məqamdakı xırda səhvlər. “Qarabağ” Avropa Liqasında bacarmadığını digər avrokubok yarışında edib, Konfrans Liqasında pley-off həyəcanını azarkeşlərinə yaşadıb, azərbaycanlı futbolsevərlər fevralda da Bakıda avrokubok qarşılaşması izləyiblər. Bu dəfə həmin uğuru Avropa Liqasında təkrarlamaq, ondan da uzağa getmək lazımdı. “Rakuv”la oyundan sonra kimlərinsə hesabdan silməyə çalışdığı, namərdcəsinə arxadan zərbə vurmağa çalışdığı “Qarabağ” yeni tarix yazmağa çox yaxındı. “Həkken”i İsveçdə 1:0 hesabıyla məğlub edən “köhlən atlar” qrupdan çıxmağa imkan verən iki yerdən birini tutmaq yolunda böyük bir addım atmış oldu.

Səfərdəki oyundan öncə yenidən təxribat cəhdi olmuşdu. İsveçli jurnalist Xankəndidən və ətraf rayonlardan Ermənistana qaçan erməniləri Qurban Qurbanova xatırlatmağa, bununla da guya mənfur qonşularımızın məzlum obrazını yaratmağa çalışmışdı. İsveçli həmkarımız unutmuşdu ki, bu illər ərzində Qurban Qurbanov təkcə yaxşı futbol mütəxəssisi kimi yox, həm də əsl vətənsevər və Azərbaycan həqiqətlərini dünyaya layiqincə çatdırmağı bacaran natiq kimi yetişib. Elə Qurban bəyin mətbuat konfransındakı təxribatçı suala verdiyi cavab da bunun sübutudu. Üzərinə düşən vəzifənin öhdəsindən layiqincə gələn Qurbanov mətbuat konfransındakı qətiyyətinin davamını meydanda gətirdi, onun yetirmələri vacib qələbəyə imza atdılar.
Futbolda elə oyunlar var ki, izləyirsən və lazımi qolun tezliklə vurulacağına əmin olursan. Futbolçulardakı inam hissi izləyənlərə də öz təsirini göstərir, meydandakı futbolçular qədər azarkeşlər də qələbə qolunun tezliklə gələcəyinə inanırlar. “Həkken”lə oyun da belələrindən idi. “Qarabağ” o qədər inamla və təmkinlə hücum qururdu ki, Peter Abrahamsonun qoruduğu qapıya nə vaxt yol tapacağımız da an məsələsinə çevrilmişdi. Düzdü, həmişə olduğu kimi, ələ düşən fürsətlərdən yararlanmaqla bağlı problemimiz qalır. Bunun əvəzində “Qarabağ” meydanda xeyli qətiyyətli görünür, topa nəzarəti və ərazi üstünlüyünü ilk dəqiqələrdən əlində saxlayırdı. Elə Juninyonun 70-ci dəqiqədə vurduğu qələbə qolu da oyunun məntiqi axarına uyğun idi.

“Qarabağ” adına daha bir sevindirici məqam “çərçivə”nin etibarlı əllərə tapşırılmasıdı. Mən Şahruddini səhvlərinə görə qınamaq, onu yenidən tənqid hədəfinə çevirmək fikrində deyiləm. Amma Andrey Lunyov səviyyəsini və təcrübəsini faydalı iş əmsalına çevirməyi bacarıb. Bu əmsal da “Qarabağ”a son oyunlarda uğur gətirən vacib amillərdən biridi. Qapıçının özünəinamı, soyuqqanlığı komanda yoldaşlarına böyük təsir göstərir, onlar da meydanda rahat hərəkət edirlər, zəhmətlərinin hədər gedəcəyindən qorxmurlar. “Həkken”lə oyun bunun əyani nümunəsidi. Ayrı-ayrı nüanslar üzərində çox da dayanmaq istəmirəm. Əsas odu ki, “köhlən atlar” yeni tarix yazmaq yolunda inamla addımlayır. Uğur olsun, qalib ölkənin qalib komandası!

AMAL