Sərgən Yalçından Montellanın təyinatı ilə bağlı sərt sözlər
Ən son “Beşiktaş”ı 2020/21 mövsümündə çempion edən və artıq iki ilə yaxındı işsiz olan Sərgən Yalçın “TV100” kanalında Candaş Tolqa İşıkın aparıcısı olduğu “Az önce konuştum” verilişinin qonağı olub.
“Football-plus.az” xəbər verir ki, gündəmdə duran bir çox mövzuya toxunan 51 yaşlı mütəxəssisin xüsusilə Vinçentso Montellanın Türkiyə yığmasının başına gətirilməsi barədə sözləri diqqət çəkib. Sərgən özü də Ştefan Kuntsun istefaya göndərilməsinin ardından yığmanın başına keçməyə namizədlərdən biri idi. O, bu mövzudsa bunları deyib:
“Təbii ki, yığmanın başında duran şəxsi federasiya seçir. Biz bu işə başlayarkən “əvvəlcə baxım görüm, nə bacarıram, bəzi sınaqlardan keçim” deyə düşünürük. Həmin sınaqları keçəndən sonra böyük komanda çalışdırmaq fürsəti yaxaladım. O sınaqdan da üzüağ çıxdım. Nəhəng komandadan sonrakı dayanacaq yığma komandadı. Montellanın ən böyük uğuru nədi? “Adana Dəmirspor”la ölkəmizdə 4-cü pilləni tutub. Bu, uğur sayılırsa, mənim “Beşiktaş”da qazandıqlarım nədi? Bir türk məşqçi olaraq, federasiyamızın yerli məşqçiləri bu qədər yetərsiz görməsi canımı ağrıdır. Federasiya başqanı öz dili ilə Montellanın “Adana Dəmirspor”dakı 4-cü yerini əsas meyar adlandırdı, üstəlik “gələcəyi parlaq bir məşqçi gətirdik” dedi. Bu söz mənə çox pis təsir etdi. Belə çıxır ki, sən Türkiyədə gləcəyi parlaq olan bir dənə yerli məşqçi tapa bilmədin? İtaliya Futbol Federasiyasının və ya İtaliya klublarının görə bilmədiyi gələcəyi biz necə görürük? Məncə, bu təyinat zamanı bir çox türkiyəli həmkarım səviyyəsizləşdirildi. Onların çoxu ilə söhbət etmişəm. Hamısı eyni fikirdədi. Ştefan Kunts haqda, ümumiyyətlə, danışmaq isrəmirəm! Türkiyə yığmasının baş məşqçisi kimi çalışmaq bu dərəcədə asan olmamalıdı. Axı bunlar necə və hansı meyar ilə seçilir? Bunu mən yox, xalq soruşur. Federasiya “biz bu məşqçiyə inanırıq və onunla yolumuza davam edirik” desə, hardasa anlamaq olar. Amma çıxıb ortaya “gələcəyi parlaq məşqçi” demək mənə çox də məntiqli gəlmədi. Bizim duyğularla hərəkət edən insanlar olduğumuzu nəzərə alsaq, bu təyinatlara, sadəcə, inana bilmirəm. Yığma komanda xalqın komandasıdı. Digər tərəfdən çox da tənqi etmək istəmirəm. Amma ortada sual doğuran o qədər məqam varki... “Gələcəyi parlaq” ifadəsindən sonra yığmanın məşqçisi hansı meyar ilə seçilir? İlk növbədə federasiya bunu açıqlamalıdı”.
Türkiyə yığmasından söz düşmüşkən, daha bir xəbəri diqqətinizə çatdıraq. Federasiya Montella üçün hələ də yerli köməkçi tapmağa çalışır. Federasiya przidenti Mehmet Büyükekşi italiyalının imza mərasimində də etiraf etmişdi ki, məşqçilər korpusunda iki yerli məşqçi yer alacaq. Deyəsən, TFF Nuri Şahindən birdəfəlik əlini üzməli olacaq. 2 ilə yaxındı “Antalyaspor”u çalışdıran gənc mütəxəssis bu klubdan ayrılmaq istəmədiyi üçün federasiyanın ilk təklifini geri çevirmişdi. Sonradan TFF ona 3 oyunluq, yəni AÇ-2024-ün seçmə mərhələsinin sonuna qədər məşqçilər korpusunda yer almağı təklif etdi. Amma Şahin əsas diqqətini Antalya klubuna yönəltmək istədiyini bildirərək bu təklifi də geri çevirib! TFF-nin təklif göndərdiyi digər isim Burak Yılmazdı. Bilindiyi kimi, Burak hazırda “Beşiktaş”ın məşqçi korpusunda çalışır və Şenol Günəşin köməkçilərindən biridi. Nuri Şahindən fərqli Yılmaz yığmada çalışmaq təklifini geri çevirməyib. O, federasiya nümayəndələrinə “Beşiktaş” rəhbərliyi və Günəş ilə məsləhətləşdikdən sonra sizə yekun cavabımı bildirəcəm” deyib. Bundan başqa, TFF-nin yaxın keçmişdə Türkiyə yığmasında forma geymiş bəzi başqa isimlərlə də danışıq apardığı məlum olub. Bu arada Montella matçları izləməkdə və məşqçilərlə görüşlər keçirməkdə davam edir. Daha öncə “Hatayspor”un baş məşqçisi Volkan Dəmirəllə görüşən, ötən həftəsonu həm superliqada, həm də 1-ci liqada bir neçə oyunu stadiondan izləyən 49 yaşlı çalışdırıcı bazar ertəsi “Konyaspor”un baş məşqçisi Aleksandar Stanoyeviç ilə görüşüb. Serbiyalı məşqçidən həm komandanın son durumu barədə məlumat alıb, həm də Türkiyə futbolu haqda söhbət edib. Montella daha sonra “Konyaspor”un bazasını ziyarət edərək ordakı şəraitlə yaxından tanış olub. Xatırladaq ki, Türkiyə AÇ-2024-ün seçmə mərhələsi çərçivəsində oktyabrın 15-də Latviyanı məhz Konyada qəbul edəcək.
Digər xəbərlər
