"Neçə ildi futbolda işləyirəm, lakin birinci dəfə belə halla rastlaşıram"
Yarımhəvəskar 2-ci liqada elə bu statusa tam uyğun gələn hadisələr baş verməkdədi.
Son turlarda klubların adı protokolda olmayan futbolçuları oynatdığına görə texniki məğlubiyyətlə üzləşməsi halları artıb. Hələ heç 4 tur arxada qalmayıb, amma üç belə hadisə ilə üzləşmişik. Belə ki, 2-ci turun “Ağdaş”la “Baku Sportinq” arasındakı qarşılaşmasında qonaqlar adı protokolda olmayan oyunçunu meydana buraxmışdı, 3-cü turda “Şəmkir də “Dinamo” ilə oyunda eyni səhvi təkrarladı.
Nəhayət, Şamaxıda “Şahdağ Qusar”la qarşılaşan “Cəbrayıl” da bu problemlə üzləşib. Yaşıl meydanda keçirdiyi 4 oyunun heç birində uduzmayan və turnir cədvəlinə başçılıq edən qarabağlıların AFFA İntizam Komitəsinin növbəti iclasında texniki məğlubiyyətlə üzləşməsi qaçılmazdı. Bəs təcrübəli Cavid Hüseynovun rəhbərlik etdiyi komanda nədən belə hadisə ilə üzləşib. Bu sualı “Cəbrayıl”ın müşaviri Səbuhi Səfiyarlıya ünvanladıq:
“Bəli, belə xoşagəlməz hadisə baş verdi. Birdən-birə komanda sayı artdığından klublarda kadr çatışmazlığı hiss olunur. Bu qaçılmazdı. Premyer-liqa təmsilçilərini də bura əlavə etmək olar. Son görüşdə də bizim başımıza belə hadisə gəldi. Deməli, olduğun yerdən, kimliyindən aslı olmayaraq, arxayınlaşmaq olmaz. Ona görə də daha diqqətli olmazq lazımdı. Neçə ildi futbolda işləyirəm, lakin birinci dəfə belə halla rastlaşıram. Bir məsələ də var ki, komandamızın heyətində həm Nurlan Quliyev, həm də Nurlan Quluzadə yer alıb. Oyunun protokolunda da Quluzadə və Quliyev soyadları qarışdırılıb. Buna görə də azarkeşlərdən və əziyyət çəkən hər kəsdən üzr istəyirik. Baş məşqçimiz Cavid Hüseynovun da qeyd elədiyi kimi, səhv bir nəfərin yox, hamınındı. İnanıram ki, itirəcəyimiz bu 1 xal gələcək hədəflərimizə çatmağımıza mane olmayacaq”.
CAVİD ƏLİYEV
Digər xəbərlər
