Vaxtilə ölkə futbolunda böyük ümidlər bəslənilən oyunçulardan biri də Budaq Nəsirov idi.

Perspektivli gənc "Sportinq"ə keçəndə futbol ictimaiyyəti papağını göyə atdı ki, bizim də futbolçumuz adlı-sanlı kluba transfer olundu. Hətta çoxları düşünürdü ki, Budaq yaxın zamanda Lissabon təmsilçisində aparıcı oyunçuya çevrilərək məşhurlaşacaq və top-klubların marağını cəlb edəcək. Azərbaycanın aşağı yaş qrupları üzrı yığmalarında çıxış etmiş gənc əsas komandaya da cəlb olundu. Hətta yoldaşlıq görüşündə yığmada debüt də etdi. Qısası, onun Azərbaycan futbolunun növbəti ulduzu olacağı gözlənilirdi. Amma Budaq 5 illik müqavilə bağladığı məşhur klubda “Araz Abdullayev sindromu” yaşadı. Yəni komandada debüt etmədən yalnız tərcümeyi-halına "Sportinq" adını yazdırdı. Pireney yarımadasında zirvələri fəth edə bilməyən futbolçu 2018-ci ildə "Zirə"yə keçdi. Burda da özünü doğrulda bilməyərək mövsüm ərzində cəmi 641 dəqiqə meydanda oldu. Qəsəbə təmsilçisində də əsas heyətə düşə bilməyən Budaq 2019-cu ildə futboldan uzaq düşdü. Onun hansı işlə məşğul olması, harda yaşaması haqda müxtəlif fikirlər səsləndirildi. Futbolçunun gah Portuqaliyada ofisiant işlədiyi, gah Türkiyə otellərində resepşndə xidmət göstərdiyi deyildi. Nəhayət, 2023-cü ilin yay “transfer pəncərəsi”ndə Ayxan Abbasov hamının unutduğu və maraq göstərmədiyi oyunçunu 4 ildən sonra böyük futbola qaytardı. Nəticədə futbolu yadırğamış 27 yaşlı Budaq "Turan Tovuz"a cəlb olundu. Amma qara buludlar burda da oyunçunu başının üstündən əskik olmadı. Belə ki, yay toplanışının Bakıdakı ilk mərhələsində "Araz-Naxçıvan"la yoldaşlıq oyunun da zədələndi, ardınca futbolçu Türkiyədəki təlim-məşq prossesinə qoşula bilmədi. Buna səbəb futbolçunun vaxtilə qonşu ölkədə oturum izni ilə bağlı qaydanı pozması idi. Belədə Ayxan bəy böyük ümidlər bağladığı futbolçunu formasını bərpa etməsi üçün əvəzedici komandaya göndərdi. Amma uğursuzluq kölgə kimi Budağı burda da tək qoymadı. Sabiq "Sportinq"li əvəzedicilərin çempionatında geridə qalan 6 turda 5 oyunda şans qazanmaqla 348 dəqiqə meydanda olub. Futbolçu forma yığmaq bir yana, zədəsini sağaltmaqda da çətinlik çəkir. Dünya futbolunda çox olub ki, futbolçular uğursuzluq, faciələr yaşamaqla gəncliyində karyerasını bitirib, amma bir neçə ildən sonra dönüş edərək şöhrət qazanıblar. Onlardan biri yaşlı nəslin yaxşı tanıdığı sovet-rus futbolçusu Eduard Streltsovdu. Futbolçu eyş-işrətə meyilli olduğundan belə məclislərin birində hansısa yüksək zatın qızını zorlamaqda suçlanaraq 12 il həbs cəzası almışdı. 5 il dəmir barmaqlılar arxasında yatandan əfv olunan Streltsov 26 yaşında yenidən futbola qayıtdı. İnadkarcasına üzərində işləməsi, iddiası sayəsində iki dəfə SSRİ-nin ən yaxşı futbolçusu adına layiq görüldü. "Torpedo" ilə çempion və ölkə kubokunun qalibi oldu. SSRİ yığmasında ən çox qol vuran 4 futbolçudan biri kimi tarixə düşdü, 20 yaşında qazandığı “SSRİ idman ustası” fəxri adını bərpa etdi. 

Xoşbəxtlikdən Budaq həbs edilməyib, sürgün olunmayıb. Odu ki, mərhum sovet futbolçusundan fərqli daha şanslıdı. Təbii ki, heç kim Nəsirovun Streltov olacağını gözləmir. Amma bir vaxtlar böyük ümidlər bəslənən futbolçu ən azı ölkə çempionatı səviyyəsində özünü inkişaf etdirmək, yaxşı oyunlar sərgiləməklə uğursuzluqlarını qarşıdakı illərdə qazanacağı nailiyyətlərlə unutdura bilsə, azərbaycanlı fanatlar üçün milli Streltsov olacaq. 

ABDULLA İSMAYILOĞLU