“Öncəliklə klub rəsmisi kimi tərəfdarların narazılığını haqlı sayıram. Amma bir az səbirli olmaqda fayda var. Bilindiyi kimi, baş məşqçi Azərbaycana yeni gəlib və yeni transferlər edərək bir qədər fərqli heyət formalaşdırıb. Məncə, azarkeşlər səbirli olmalıdı. Regekampf kimi çalışdırıcıya 1 il vaxt verilibsə, çox güman, Mutu üçün də o qədər gözləməliyik. Uzun illərdi “Neftçi” azarkeşiyəm. Komandanın bir çox məşqini canlı izləmişəm. Yeni baş məşqçinin ən azı Regekampfdan ikiqat daha yaxşı məşq keçdiyini deyə bilərəm. Azarkeşləri anlamaq çətin deyil. Hər kəs istəyər ki, komandası çempion olsun. Xüsusilə “Neftçi” tərəfdarları buna çoxdan layiqdi. İstər ev, istərsə də səfər oyununda futbolçuları son ana qədər dəstəkləyən, həvəsdən düşməyə qoymayan azarkeşlərin tələbi, təbii ki, yüksək nəticə olmalıdı. Təəssüf ki, zaman keçdikcə onların ümidi azalır. Bu da qəzəb yaradır və belə hallar yaşanır. Hər halda, heyətdə yeni futbolçularn olduğunu da nəzərdə saxlamalıyıq. Onlarəın bir-birinə uyğunlaşması üçün müəyyən vaxt lazımdı. Düzdü, azarkeşlərdə “səbr kasası” deyilən bir şey qalmayıb. Hər gün çoxlu zəng gəlir, mesajlar yazırlar ki, bu işlərin sonu necə olacaq? Haqlıdılar. Artıq mümkün olan 18 xaldan 10-nu itirmişik. Çempion olmaq istəyiriksə, həmin xallar bizə hava-su kimi lazım idi. Ümid bundan sonrakı matçların bəlkə də hamısında qələbə qazanmağa qalıb. İlk hədəf 7-ci turda “Zirə”ni məğlub etmək olmalıdı. Bu işə hardansa start verilməlidi, həm də gec olmadan... Çempionatda rəqabətin artdığını da nəzərə alsaq, bundan sonrakı matçlar daha ağır keçəcək. Bu üzdən azarkeşlərin qələbə üçün tələsməsini də normal qarşılamaq, onlara istədiklərini vermək lazımdı. İndi futbolda vəziyyət elədi ki, bir oyunda şansı qaçırmaq növbəti turlarda da təsirini göstərir. Yenə deyirəm, məhz ardıcıl qələbələrlə liderlik haqda düşünmək olar. Yoxsa bu mövsümü də itirə bilərik. “Neftçi”də belə ənənəyə şahidlik etmişəm ki, klub yeni “futbol ili”nə yaxşı başlayanda axırı pisə doğru gedir, pis başlayanda isə əksinə... Ümid edirəm ki, məhz bu mövsüm xallar itirərək start götürsək də qarşıdakı oyunlarda əvəzini çıxa biləcəyik. “Forza Neftçi”nin hansı planlarının olduğu haqda məlumatım yoxdu. Ümid edirəm ki, tribunalarda xoşagəlməz hallar yaşanmaz. Klub rəsmisi kimi yox, azarkeşlərlə daim əlaqədə olan biri kimi heç vaxt razı olmayacağım işlər var. İstəmərəm ki, “Neftçi” tərəfdarları belə hadisələrlə yadda qalsın. Yenə deyirəm, ancaq səbrlə bu işin sonunu gözləmək lazımdı. Çünki özüm də Mutunun potensiallı məşqçi olduğuna inanıram”.