Yığmamızın son oyunu Belçika mətbuatının da diqqət mərkəzində olub. Bəzi yazılardan seçmələrlə sizi tanış edirik.

Baş məşqçi Canni de Byazinin “tuttomercatoweb.com” saytına açıqlamasından başlayaq. İtaliyalı mütəxəssis Lukakunun perfomansını yüksək qiymətləndirib: “O, bizi daim təhlükədə saxladı. Hələ ideal formada deyil, amma öz üzərində işləyir. Bizimlə görüşdə də bütün xüsusiyyətlərini ortaya qoydu. Lukaku qapı qarşısında həmişə yaxşıdı. Yarımmüdafiədən dəstək verilsə, onu dayandırmaq çox çətin olar. Hücumçunu reaktiv gördüm, meydanda xeyli vaxtı oldu. İndi, sadəcə, müntəzəm oynamalıdı. Fiziki gücü var, tam forma yığandan sonra isə yırtıcı olacaq. “Roma” üçün əla transferdi, onlara belə hücumçu lazım idi. İnanıram ki, Dibala ilə əla cütlük təşkil edəcək”.
Belçikanın futbolçusu Amadu Onana yerli jurnalistlərə danışarkən matçda çətinliklə üzləşdiklərini deyib. Yarımmüdafiəçi azarkeşlərin yanıldığını bildirib: “Rəqib bizə problem yarada bildi. Hörmətəlayiq komandadı. Mürəkkəb meydançada çətin oyun oldu. İnsanlar asanlıqla qalib gələcəyimizi gözləyirdi. Lakin asan matç olmur. Məqsəd Bakıda qol vurmaq və 3 xal qazanmaq idi. Əsas qələbə qazanmaq idi ki, bunu edə bildik. Meydanın mərkəzinə düzgün nəzarət etdiyimizi düşünürəm. Müdafiə ilə yaxşı anlaşma içində olduq və xətlər arasındakı aqressivliyi qorumağa çalışdıq”.

Millimizin buraxdığı yeganə qolun müəllifi Yannik Karrasko isə “DHSports”a açıqlama verib. Futbolçu görüşü belə şərh edib: “Əsas odu ki, üç xalla dönə bildik. Həmin meydanda oynamaq asan deyildi. Effektiv çıxış edə bilməsək də, çoxlu qol epizodumuz yarandı. Ümumilikdə qələbəyə biz layiq idik. Rəqib topu özündə saxlayırdı, çünki itirəcəyi heç nə yox idi. Hər şeyə rəğmən, qapının toxunulmazlığını qoruduq. Fiziki formamız yaxşı idi. Komandamdan razıyam”.
Millinin heyətə daxil edilməyən Tibo Kurtua yerli “Walfoot.be” saytına danışıb. Qapıçı rəqabət apardığı Kastelsi tərifləyib: “Rəqibin güclü zərbələrini dəf etmək asan iş deyildi. Həmkarıma şərəfimizi toxunulmaz saxladığı üçün təşəkkür edirəm. Möhtəşəm seyvlər etdi. Onun sayəsində azərbaycanlıların hücumları məni narahat etmir, əksinə, zövq verirdi”.

Belçika millisinin sabiq müdafiəçisi Filip Albert də qələbəni şərh edənlər sırasındadı. “Le Soir”ə açıqlama verən veteran futbolçu bunları deyib: “Komandamız ilk hissədə yaxşı deyildi. Ümumilikdə hər şey istənilən səviyyədə keçdi. Zəif görünən ikinci hissə haqda dəqiq nəsə demək çətindi. Millimiz ağıllı oynamırdı. İkinci hissədə Dokyudan başqa meydana çıxanların heç biri yadda qalmadı. Son dəqiqələr isə yaxşı alınmadı. Düzdü, hesabı qoruduq, lakin faciəvi ssenari alına bilərdi. Xoşbəxtlikdən hər şey qaydasında getdi”.

Belçika millisinin sabiq baş məşqçisi Rene Vandereyken qələbəyə rəğmən, komandanı tənqid edib. O, “Het Nieuwsblad” portalında matçı təhlil edib. Maraqlıdı ki, mütəxəssis fikirlərinə yığmanın ulduzu Lukakunu tənqid etməklə başlayıb: “Çoxları kimi, mən də düşünürdüm ki, Lukaku meydana çıxmamalıdı. O, “Roma”ya yeni qoşulub və cəmi 19 dəqiqə meydanda olub. Ondan nə qazandıq? Heç nə! Zədələnməkdən çəkindiyi üçün qorxaq oynadı. Sadə epizodlarda ötürmə etməyə gecikirdi. Azərbaycan müdafiəçilərini aldatmaq üçün ciddi cəhdlər etmədi. Həlledici məqamda topu başqasına verib məsuliyyətdən yayınmaq ona yaraşmadı. Dayanmadan 10 metr qaçdığını da görmədik. Biz əsl Lukaku izləmədik və bu, sadəcə, ayıbdı”.

Sabiq çalışdırıcı Azərbaycanla matçda yığmanın bəzi çatışmazlıqlarının üzə çıxdığını qeyd edib: “Komandada çox həssas çatışmazlıqlar gördüm. Rəqib hücumçular asanlıqla müdafiə xəttini keçə bilirdi. Biz, sadəcə, Kastelsə (qapıçı – red.) təşəkkür etməliyik. Düzdü, ümumi üstünlük bizdə idi. Amma azərbaycanlılar daha çox vacib fürsət əldə etdi. Estoniya ilə matça qədər bu çatışmazlıqları aradan qaldırmasaq, bizi acı son gözləyir. Bakıdakı qələbə heç kimi arxayınlaşdırmasın. Ordakı teatrdan ayılın”.

Lukakunun performansı haqda təhlilə İtaliya mətbuatında da rast gəlirik. Məşhur "İtaly24" portalı yazır: “Azərbaycana qarşı oynamaq onun üçün vacib idi. Hücumçu son ana qədər oyunun tempini tutdu. Trossarın zərbəsi dirəyə dəyməsə, qol ötürməsi də etmiş olacaqdı. O, oyunçuları irəli aparan səssiz lider idi. Bu matç Lukakunun yenidən formaya düşməsi üçün əla fürsət idi”.

Sonda “Walfoot.be”nin “matçın ulduzu” sorğusuna nəzər salaq. Sayt oyunun ən yaxşı futbolçusu adına 6 namizəd irəli sürüb ki, Koen Kastels 63 faiz səslə lider olub. Yannik Karrasko, Amadu Onana, Artur Teat, Yan Vertongen və Romelu Lukaku böyük fərqlə geri qalıb.

KƏNAN BAHADIR