Bu gün Misli premyer-liqasında 4-cü tura start veriləcək.

Çempionatın yeni başlamasına baxmayaraq, artıq bir çox maraqlı oyunların, qeyri-adi hadisələrin və sürpriz nəticələrin şahidi olmuşuq. “Zirə” möhtəşəm başlanğıcla adını dillər əzbəri edib. Mütəxəssislərin əksəriyyəti qəsəbə təmsilçisini indidən Konfrans Liqasında görür. Təbii ki, Rəşad Sadıqovun komandası uğur qrafikini pozmasa, buna nail olacaq. Ötən mövsümün nəhənglərinin - “Sabah” və “Neftçi”nin nəticələri haqda danışmaq hələ ki tezdi. Çünki sözügedən komandaların başı avrokubok matçlarına qarışmışdı. Yaxşı ki “Qarabağ” hələ də bu minvalla irəliləyir. “Səbail”, “Turan Tovuz” və “Kəpəz”in orta pillələrdə qərarlaşmaq arzusu nəzərimizdədi. Son duruma əsasən Tovuz təmsilçisi bu hədəf yolunda daha istəklidi. “Sumqayıt” yaxşı performansla ən yaxın rəqibi, son çempion “Qarabağ”ı üstələyir. Samir Abasovun uğur formulu bəlkə də bu mövsüm “kimyaçılar”ı çoxlu qələbəyə daşıyacaq. “Araz-Naxçıvan” haqda isə mənfi fikirlər söyləmək insafsız olar. Debütant indiyə qədər keçirdiyi hər üç matçda yaxşı çıxış edib. Düzdü, Muxtar Respublika təmsilçisinin cəmi 3 xalı var. Lakin bu, futbol ictimaiyyətini yanıltmasın. Çünki komanda premyer-liqanın startına çox az vaxt qalmış quruldu. Futbolçular birlikdə ilk matçını məhz 1-ci turda “Turan Tovuz”a qarşı oynadı. Xatırlayırsızsa, naxçıvanlılar Qəbələdə keçirilən təlim-məşq toplanışında rəqib tapa bilmədiyindən iki heyətə bölünüb yoldaşlıq matçı keçirmişdilər. İndi həmin komanda az qala “Qarabağ”la heç-heçə edəcəkdi. Zubir və Andrade meydana çıxmasaydı, sensasiya yaşanacaqdı.

Nəhayət, turnir cədvəlinin dibində 2022/23 “futbol ili”ndə sözün əsl mənasında tarix yazan, mövsümü 4-cü yerdə bitirdikdən sonra “Neftçi”ni məğlub edərək ölkə kubokuna sahib çıxan “Qəbələ”ni görürük. O, “Qəbələ” ki Konfrans Liqasının 1-ci təsnifat mərhələsində ev oyununda “Omoniya”ya “dişini göstərdi”. Cənubi Kipr mətbuatı cavab oyununa qədər Allaşdan, Hanidən yazdı ki, adıçəkilənləri dayandırmaq olmayacaq. İkinci görüşdə Roman Bezus “Qəbələ”ni elə dayandırdı ki, komanda hələ də yerindən tərpənə bilmir. Nə “Sabah”ın 5, “Araz-Naxçıvan”ın 2 cavabsız qolu, nə də “Sumqayıt”ın 2:1 hesablı qələbəsi “qırmızı-qaralar”ı ayıltdı. Mütəxəssislər iddia edir ki, cəmi bir qələbə komandanı özünə gətirəcək, ruhlandıracaq və s. və i.a. Əlbəttə, belə ehtimal var. Amma bir çox baş məqşçinin də dediyi kimi, futbolçuların oyun tərzində xarakter daha vacib amildi. Sözümün canı odu ki, “Qəbələ” 5 cavabsız qolla darmadağın edildikdən sonra xarakter göstərməliydi, növbəti matçlar üçün ruhlanmalıydı, özünə gəlməliydi. Bu proses, görəsən, nə vaxt başlayacaq? 4-cü turda “Neftçi”, 5-ci turda “Zirə”, 6-cı turda “Turan Tovuz”, 7-ci turda isə “Qarabağ” səddi var. Sizcə, “qırmızı-qaralar”ın real imkanlara əsasən ilk qələbəsini qazana biləcəyi rəqib “Turan Tovuz”du? Çətin! Çünki bu səfər oyunu olacaq. Tovuzlu azarkeşlərin xüsusilə ev matçlarında tribunalarda yaratdığı ab-hava futbol ictimaiyyətinin istənilən fərdinə bəllidi. “Qəbələ” azarkeşlərinə gəlincə, “Red-Black Army” deyir ki, bizim tribunaları doldurmaq öhdəliyimiz yoxdu, işimiz-gücümüz var. Bəlli meyarlara əsasən baxanda fanklub haqlıdı. Çünki bu azarkeş qrupunun rəsmi statusu yoxdu. Təəssüfləndirici hal oldu ki, “Red-Black Army” “Qəbələ”nin evdə “Omoniya”ya qarşı mübariz çıxışının səbəbini unudub! Xatırladım ki, həmin performansın başlıca səbəbi azarkeş dəstəyi idi.

İndi vəziyyət elə həddə çatıb ki, baş məşqçi Elmar Baxşıyevin getməsini istəyənlər də çoxalıb, klubun məşhur “adımızda qələbə var” devizini lağa qoyanlar da... Yeri gəlmişkən, 0:5 hesablı darmadağını rəsmi sosial şəbəkə hesabında niyə çox kiçik şriftlə paylaşmışdınız? Daha kiçik hesablı məğlubiyyətlərdə isə şriftlər böyüdü. Əvəzedici komandanın mükəməl nəticələri, deyəsən, ən böyük şriftlə yazılmışdı. Nəzərinizə çatdırım ki, indiki azarkeş kütləsi ən xırda detalları belə unutmur və klubundan daha yaxşı işlər gözləyir. Rəqib tərəfdarları bir yana, neytral azarkeşlər o biri yana, heç olmasa, öz fanatlarınızın lağ obyektinə çevrilməyin!

KƏNAN BAHADIR