Bilindiyi kimi, 1-ci liqada 10, daha aşağı dəstədə 14 komanda iştirak edəcək. Oyunlar başlamamış klubların bəziləri PFL-ə narazılıqlarını bildiriblər. Əsas etiraz oyunların günü ilə bağlıdı. 1-ci liqada qarşılaşmalar bazar ertəsi və çərşənbə axşamı, ikincidə isə çərşənbə və cümə axşamı günləri baş tutacaq.

Nəzərə alaq ki, bu turnirlərdə çıxış edən komandaların stadionlarının çoxunda işıqlandırma sistemi yoxdu. Bu səbəbdən də oyunlar günorta saatlarında start götürəcək. Bu da o deməkdi ki, stadionlara az azarkeş gələcək. Çünki adamlar həftəiçi işdə olurlar. Azərbaycanda isə iş saatı 18.00-da bitir. Günorta insanların 1-ci və 2-ci liqa oyunlarında necə gələcəyi sual doğurur.

Redaksiyamıza maraqlı informasiya daxil olub. Sən demə, Region Liqasının görüşləri həftəsonu keçiriləcək. Peşəkar səviyyəli klublar PFL nümayəndələrindən oyunların nə üçün həmin günlərdə keçiriləcəyinin səbəbini soruşublar. Cavab maraqlı olub. Qurum 4 çempionatın təşkilatçılığını boynuna götürüb. Bunlar premyer-liqa, 1-ci, 2-ci liqalar və əvəzedicilərin yarışıdı. Həftə ərzində 5 görüş əsas, 5 oyun əvəzedici, 5 matç 1-ci, 7 qarşılaşma isə 2-ci çempionatda keçiriləcək. Bu da ümumilikdə 22 görüş edir. PFL bu qarşılaşmaların keçirilməsi üçün zaman və hakim çatışmazlığının olduğunu bildirib. Qurum rəsmiləri vaxt problemini həll edə biləcəklərini, lakin referilərin sayının az olmasına çarə tapa bilmədiklərini söyləyiblər. Çünki Region Liqasının oyunlarının həftəsonu keçirilməsi 1-ci liqadakı görüşlərin bazar ertəsi və çərşənbə axşamı günlərində keçirilməsinə səbəb olub.

Gəlin, nəzər yetirək ki, hazırda Azərbaycan neçə hakim fəaliyyət göstərir? AFFA bununla bağlı iyunun 7-də siyahı açıqlayıb. Elit və 1-ci dərəcəli hakimləri toplayanda say 28 edir. Onların köməkçilərinin ümumi sayı isə 38-di. Yəni ölkəmizdə peşəkar hakim kimi fəaliyyət gösərən 66 nəfər var. Bu da 5 liqa üçün çox azdı. Amma nəsə etmək olardı. Onsuz da bəzi hallarda AFFA Hakimlər Komitəsi VAR-a və 4-cü olaraq oyunlara təyinat alan referiləri digər liqalarda əsas hakim kimi sınaya bilir. Baxın, premyer-liqa oyunları üçün 5 əsas, 5 VAR, 5 də 4-cü hakim lazımdı. 10 nəfər də köməkçiyə ehtiyac var. Əvəzedicilərin çempionatında isə əsasən 1-ci dərəcəli hakimlər söz sahibi olur. Burda 5 referi, 5 4-cü, 10 köməkçi hakimin olduğunu nəzərə alsaq, ümumilikdə 20 nəfərin işbaşında olacağını görürük. Yuxarıda qeyd etdiyimiz kimi AFFA-nın yaydığı siyahıda həm elit, həm də 1-ci dərəcəli hakimlərin sayını toplayanda 28 əsas, 38 köməkçi referinin olduğunu görürük. Deməli, həftəsonu premyer-liqada və əvəzedicilərin çempionatında oyunlar baş tutsa, ümumilikdə 3 əsas, 18 köməkçi hakim boşda qalır. Yəni 1-ci liqanın oyunlarını həftəsonu keçirmək olardı. Necə? Premyer-liqada 4-cü və ya VAR hakimi kimi təyinat alanlardan 1-ci liqada istifadə etmək olar. O qədər görmüşük ki, hanslsa referi bir həftədə 2 oyuna təyinat alsın. Yəni PFL bu problemi həll edə bilərdi. Lakin AFFA Region Liqası oyunlarını həftəsonuna salmaqla qurumun planını alt-üst edib.

Bu mövsüm 1-ci liqa çox maraqlı olacaq. Çünki çempionatda yetərincə güclü komandalar çıxış edəcək. 6 klub indidən çempionluğa oynayacağını açıqlayıb. Lakin azarkeşlər öz komandalarının oyunlarına rahat baxa bilməyəcəklər. Çünki AFFA Hakimlər Komitəsində hakim çatışmazlığı var və qurum öz məhsuluna görə bu liqanı qurban verir.

İLKİN SULTANLI