“Real” azarkeşlərini bədbinliyə qərq edən hadisə baş verib.

“Football-plus.az” xəbər verir ki, Tibo Kurtua məşq zamanı seyv edərkən qazona uğursuz şəkildə düşüb və zədələnib. Təcili tibbi baxış qapıçının çarpaz diz bağlarının qırıldığını göstərib. Tezliklə onun dizində bağların yenidən qurulması əməliyyatı keçiriləcək. Ən nikbin proqnozlara görə belçikalı qapıçı apreldə “çərçivə”dəki yerini tuta biləcək. Ancaq belə ehtimallar da var ki, Kurtua üçün mövsüm başlamadan bitib.

2018-ci ildə “Çelsi”dən transfer olunandan bəri Tibo “Real”da 230 oyun keçirib. Onun hesabında iki ölkə çempionluğu və Çempionlar Liqasının qalibi titulu var. Zədənin ciddiliyi aydınlaşan kimi belçikalı sosial şəbəkə hesabında azarkeşlərə müraciət edib: “Belə hadisələrlə üzləşə biləcəyini heç vaxt gözləmirsən. Bunu qəbul etməyin vaxtıdı. Zədəni arxada qoyub daha güclü qayıtmalıyam. Enerji, bağlılıq və dəstək üçün hər kəsə “sağ ol” deyirəm. Əmin edirəm ki, bu, məni tezliklə sağalmaq üçün motivasiyalandırır”.

Qapıçının iyulda nigah bağladığı Mişel Hertsiq onu dəstəkləyib: “Mənim aslanım. Daha güclü qayıdacaqsan”.

“Real”ın oyunçuları da bu hadisəyə biganə qalmayıb. “Kral klubu”nun həm indiki, həm də sabiq oyunçuları sosial şəbəkələrdə dəstək mesajları yağdırıb.

Marselo: “Tibo, gücün çox olsun. Qayıdacaq və daha güclü olacaqsan”.

Serxio Ramos: “Güc və mətanət! Tezliklə dönüşü təbəssümlə gözləyirik. dostum”.

Luka Modriç: “Dostum, çoxlu güc və mətanət. Daha güclü qayıdacaqsan”.

Cud Bellingem: “Tezliklə yanımıza dön, bro. Sevgimiz və dəstəyimiz səninlədi”.

Orelyen Çuameni: “Sənə güc arzulayıram, qardaş. Hamımız səninləyik”.

Arda Gülər: “Tezliklə sağal. Daha güclü qayıdacağına əminəm”.

Eduardo Kamavinqa: “Əla qapıçı! Tezliklə sağalmağını arzulayıram”.

Kərim Benzema: “Mətanətli ol, dostum”.

Andrey Lunin: “Mətanəli ol. Güclüsən, biz də səninləyik”.

Braim Dias: “Çoxlu güc! Biz səninləyik”.

Vinisius: “Daha güclü qayıdacaqsan, dostum. Biz yanındayıq. Mətanətli ol”.

Eder Militao: “Döz, biz də sənin yanındayıq”.

Antonio Rüdiger: “Mətanətli və dözümlü ol, qardaş”.

Rodriqo Qoes: “Tezliklə sağalmağını arzulayıram”.

Tibonu başqa klubların futbolçuları, idman ulduzları və hətta şou-biznes dünyasının adamları da dəstəkləyib. Qapıçının zədə ilə bağlı paylaşımının altında çoxları isti sözlər yazıb. Belçikalının acı zədəsi “Real”ın rəqiblərini, başqa idman növlərinin təmsilçilərini, hətta futboldan çox uzaq olan adamları da biganə qoymayıb. Təkcə elə Kurtuaya sosial şəbəkələrdəki paylaşımları ilə dəstək verən adamların siyahısına baxın: Karlos Alkaras – kişi tennisinin lideri və “Real”ın azarkeşi; Luis Lopes – “Real”ın ehtiyat qapıçısı; Felipe Luis – “Atletiko”nun sabiq, “Flamenqo”nun indiki oyunçusu; Tobi Alderveyreld – “Atletiko”nun, “Tottenhem”in və Belçika yığmasının sabiq, “Antverpen”in indiki oyunçusu; Dieqo Kosta – “Atletiko”nun sabiq oyunçusu, azad agent; Mark Markes – altıqat Moto GP çempionu, “Barselona” azarkeşi.

Əksər qaynaqların belçikalının əsas əvəzedicisi kimi gördüyü Yassin Bunu da ona xoş arzularını çatdırıb: “Tezliklə, sağal, mənim dostum”.

Yassinlə Tibo futbol meydanından kənarda da yaxındılar. Onlar hələ “Atletiko” dönəmindən bir-birini tanıyırlar. Onda belçikalı əsas qapıçı idi, mərakeşli isə ikinci komandada çıxış edirdi. Bunu hətta Tibonun yaxınlarda baş tutan toyunda da iştirak edib. Bəlkə də Tibonun dostu gerçəkdən zədəli belçikalının yerini ən yaxşı şəkildə tutacaq…