Premyer-liqanın ilk turunda "Kəpəz" doğma meydanda "Neftçi"ni məğlub etdi.

Tarixi derbidə qələbə bütün gəncəliləri sevindirdi. Klubun rəhbər şəxslərindən siravi işçilərinə kimi hamı məmnun görünürdü. Onlardan biri də, təbii ki, Mehman Allahverdiyev idi. "Football-plus.az" olaraq İdarə Heyətinin üzvü ilə yenilənmiş "Kəpəz" haqda söhbətləşdik...

- Premyer-liqanın ilk turunda əzəli rəqib "Neftçi"ni məğlub etmək necə hissdi?
- Sevincimizin həddi-hüdudu yoxdu. Mövsümdə ev oyununda qələbə qazanan ilk komanda olduq. Düzdü, bizdən sonra "Sabah" "Qəbələ"ni darmadağın etdi. Hər iki komandaya uğurlar arzulayırıq. Çox sevinirik. Azər Məmmədovu da təbrik edirəm. Premyer-liqada debüt matçında qələbə qazandı. "Kəpəz" azarkeşləri ondan yaxşı nəticələr gözləyir. 

- Bu qələbədə əsas pay sahibi gəncəlilərdən ibarət məşqçilər korpusu oldu, yoxsa komanda oyuna çox yaxşı hazırlaşmışdı?
- Hər iki məqam təsir etdi. Çünki onlar bilirdilər ki, "Neftçi"ni udmaq bizim üçün vacibdi. Bu görüşdən bir gün öncə "Qarabağ" "Zirə"yə məğlub oldu. Bu görüşləri eyniləşdirmək olmaz. Çünki "Neftçi" bizim əzəli rəqibimizdi. "Ağ-qaralar"la görüşdə qələbə bizim üçün çox vacibdi. Hər bir nəticəni qiymətləndiririk. İnanıram ki, oyundan-oyuna nəticələrimiz daha yaxşı olacaq.

- "Kəpəz"in bu "futbol ili"ndə hədəfi nə olacaq? Bir çoxları qeyd edir ki, Gəncə təmsilçisi 9-10-cu yerlər uğrunda mübarizə aparacaq...
- Futboldu hər şey ola bilər. 9-cu yeri də tuta bilərik. Premyer-liqadan düşə də bilərik. Hətta 3-cü ya 4-cü olmaq da şansımız var. Bu komandanın güclənməyə ehtiyacı var. Bunun üçün sponsor lazımdı. Bu məsələ həll olunandan sonra yeni futbolçular cəlb edərik. Rəhbərlik olaraq danışıb, hədəflərimizi bəlli edərik.

- Mövsüm başlamamış klubun strukturunda dəyişikliklər oldu. Siz də İdarə Heyətinin üzvü seçildiz. Bu haqda nə deyə bilərsiz?
- Mən həm də idman direktoruyam. Bu da mənim üçün böyük stimul oldu. Çalışmalıyıq ki, "Kəpəz"ə dəstək olaraq inkişaf etdirək. 

- Həmişə iddialı insan olmusuz. İndi klubda iki vəzifəni icra edirsiz. Başqasının idman direktoru kimi təyinatına ehtiyac var?
- Düşünürəm ki, başqa birinə ehtiyac yoxdu. Sağlıq olsun, hər iki işin öhdəsindən gələcəm. 

- Rusiya mətbuatının yazdığı xəbər inansaq, 3-cü MDB Oyunları Gəncədə keçiriləcək. Düşünmək olar ki, bununla da şəhərinizdəki stadion problemi artıq həllini tapacaq?
- Əlbəttə, buna inanıram. Bu gündən sonra Gəncədə stadion tikilməlidi. Bütün idman növləri üzvlər yarışlar olacaqsa, buna uyğun arenamız olmalıdı. Rusiya mətbuatında yazıldığı kimi 3-cü MDB Oyunlarının burda keçirilməsi şəhərimizdə stadion probleminin həlli deməkdi. 

- Stadion öz yerində, amma əsas çatışmazlıq sponsorla bağlıdı. Media nümayəndələri tez-tez sizə söz atırlar. Sizə yönələn atmacalardan biri də budu ki, "Mehman Allahverdiyev klubda gəncəlilər çalışsa, özüm sponsor tapacam deyirdi, bəs nə oldu…". İndi siz "Kəpəz"də İdarə Heyətinin üzvüsüz, məşqçilər korpusu yerlilərdən ibarətdi. Üfüqdə yeni sponsorluq anlaşması gözlənilir?
- Bilirsiz, tez-tez iş adamları ilə görüşürük, onlarla əlaqə yaradırıq. Bu gün sponsorluq etmək əvvəlki kimi deyil. Burda milyonlardan söhbət gedir. Elə-belə dəstək olmaqla iş bitmir. Burda tək mən yox, başqa insanlar da iş adamları ilə görüşür. İdarə Heyətinin üzvləri də çalışırlar ki, "Kəpəz"ə güclü sponsor tapsınlar. İnanırıq ki, yaxın günlərdə bu məsələ də həllini tapar.

- Ötən mövsün Gəncə futbolu ətrafında gedən söz-söhbət azarkeşləri çox üzdü. Düşünürsüz ki, bu məsələlər artıq keşmişdə qaldı?
- İnanıram ki, söz-söhbətlər artıq bitdi. Düşünürəm ki, yazılanların çoxu əsassız və yersiz idi. Necə ola bilər ki, bir yerdə işləyə-işləyə, kimlərsə haqda mənfi fikirlər formalaşdıraq?

- Bir çoxları qeyd edir ki, sizinlə İlqar Nadiri arasında taxt-tac savaşı gedir...
- Boş söhbətlərdi.

- "Neftçi" ilə oyundan sonra ən çox sevinənlər İlqar Nadiri ilə siz idiz. Hətta öpüşüb, görüşüb, qucaqlaşıb, bir-birinizi təbrik etdiz. Belə başa düşdüm ki, aranızda soyuqluq yoxdu.
- Əvvəlcə onu qeyd edim ki, komandamızın rəhbəridi. Mən ondan yaşda böyük olsam da, İlqar bəy İdarə Heyətinin sədridi. Mən onu birinci təbrik etməliyəm. Belə də olmalıdı. Ən sadə işçidən böyüyə kimi hamımız bir-birimizi təbrik etdik. Biz bir komandayıq. Aramızda heç vaxt problem olmayıb. Sadəcə, söz-söhbət idi.

- Bəs niyə mediada bu haqda çox yazılırdı?
- Bunun səbəbini deyə bilmərəm. Ola bilər ki, bizi istəməyən qüvvələr var idi. Ola bilər ki, kimsə bizim aramızda problem yaratmağa çalışırdı. İlqar Nadiri ilə mənim aramda heç vaxt problem olmayıb. Bu gün də münasibətlərimiz əladı.

İLKİN SULTANLI